DSPA Rwanda yahuguye abantu 40 ku gukoresha ikoranabuhanga rigezweho mu kuzimya no gukumira inkongi

Yanditswe na Evariste Nsengimana
Kuya 20 Gicurasi 2019 saa 09:32
Yasuwe :
0 0

Sosiyete mpuzamahanga ikora ikanatanga serivisi zo kuzimya umuriro no kuwurinda (Dry Sprinkler Powder Aerosol) yahuguriye abantu 40 barimo abakorera ibigo byigenga bicunga umutekano, abubatsi n’abandi ku buryo bwo kwifasha ikoranabuhanga mu kuzimya inkongi.

Bimenyerewe ko mu nyubako usangamo ibikoresho bizimya inkongi [kizimyamwoto] bikoreshwa intoki ariko abahanga bavuga ko bisaba ubumenyi ku buryo utabufite byamugora kubikoresha cyangwa byararerengeje igihe ntibiyizimye ahubwo bikaba byamushyira mu byago.

DSPA yarebye kure ibishaka igisubizo, izana ibikoresho byifashisha ikoranabuhanga rikoreshwa mu byuma bifite ubushobozi bwo guhagarika inkongi y’umuriro mu gihe gito hatangiritse ibintu byinshi.

Umwihariko w’ibi bikoresho n’ikoranabuhanga rya DSPA ni uko bihendutse, byoroheye buri wese kugura, bikaba bito kandi byoroshye gukoresha kandi byujuje ubuziranenge.

Iryo koranabuhanga rigaragaza ahantu habaye inkongi ndetse rikagira uburyo bwo kuyikumira mu kanya nk’ako guhumbya nta kintu cyangiritse, abari ahabaye ikibazo rikabamenyesha hakiri kare ku buryo umutekano wabo ucungwa neza.

DSPA Rwanda yahisemo kongerera ubumenyi abakora imirimo ifitanye isano n’ibikorwa byibasirwa n’inkongi barimo abakozi bayo, ab’urugaga rw’Abenjeniyeri, abagena ibishushanyo by’inyubako [Architecture] n’abanyeshuri babyiga.

DSPA yabahuguye ifatanyije n’ikigo kizobere mu gukora, gucuruza no gukoresha ibikoresho by’ikoranabuhanga mu kuzimya inkongi n’ibindi bikoresho n’ikoranabuhanga rijyanye n’umutekano w’ibintu n’abantu, AHI Career.

Ni amahugurwa yasojwe kuri uyu wa 17 Gicurasi nyuma y’icyumweru basobanurirwa uburyo iryo koranabuhanga rikora.

Inzobere mu gukoresha ibikoresho by’ikoranabuhanga bizimya inkongi muri AHI Careers watanze aya mahugurwa, Kiran Nagaraj, yasobanuye uburyo camera zicunga umutekano zihuzwa n’ibikoresho bitanga uburenganzira bwo kwinjira ahantu n’ibizimya inkongi bikoroshya kuyikumira no kuyihagarika.

Yavuze ko iyo ‘Uburyo bumwe bubasha guhana amakuru n’ubundi mu gihe habaye ikibazo cy’inkongi, biba byoroshye kugenzura aho cyabereye’.

Ati “Rihita rimenyesha ibyuma bitanga uburenganzira bwo kwinjira cyangwa gusohoka, umuryango ugakinguka bidatwaye igihe bikaba byoroshya n’ibikorwa by’ubutabazi.”

Umuyobozi Mukuru wa DSPA mu Rwanda, Gatebera John, yavuze ko akenshi usanga uburyo bwo gucunga umutekano no gukumira inkongi bwifashishwa nta mikoranire bugira.

Ati “Niba ari camera zicunga umutakano usanga ntaho zihurira n’ibyuma bitanga uburenganzira bwo kwinjira cyangwa se ibizimya inkongi. Amahugurwa tumaze iminsi dutanga, twabahuguraga ukuntu byose byakorana.”

Yakomeje agira ati “Icyo bifasha, ntabwo ari mu buryo busanzwe usanga ibyuma biburira bisakuza, abantu bose bagira ubwoba bagatangira kwiruka. Icyo gihe ahagize ikibazo niho imiryango ibanza gufunguka abantu bagasohoka hagakurikira ahatagize ikibazo nabo bagasohoka.”

Iryo koranabuhanga rikoze mu buryo rihita rizimya inkongi mu buryo bwihuse ariko rikanamenyesha abari hafi y’icyumba cyagize ikibazo bakimuka ku buryo nta kibazo bagira.

Abahuguwe bavuga ko ari ingirakamaro ku bakora imirimo ifitanye isano no kuzimya inkongi cyangwa ibikorwa yakwibasira nk’uko Rugamba Albert wiga ikoranabuhanga muri SOS Technical High School yabitangaje.

Ati “Ni uburyo bwikoresha buzaba bwashyizweho noneho mu gihe umuntu adahari umuriro ukaba wabasha kuzima utabanje kujya guhamagara cyangwa ngo hagire ugira ikibazo muri iyo nyubako.”

Nduwamungu Darius wari uhagarariye ikigo cy’ubwubatsi, yagize ati “Ni bwiza ugereranyije n’ubusanzwe bukoreshwa washoboraga kuba wagura kizimyamwoto ukabitereka hariya rimwe na rimwe kubyitaho ugasanga bigoye ntumenye ko byashaje cyangwa uko bikora ariko iyo uzanye ikintu cyikoresha kibasha kubona ahaba inkwongi biba ari byiza.”

Umukozi ushinzwe kumenyekanisha ibikorwa bya DSPA, Furaha Joana, yavuze ko mu myaka itatu imaze ikora imaze kwagura imikoranire n’ibigo bya Leta n’abikorera ku kigero cya 60%.

DSPA mu Rwanda ikorana n’ibigo bitandukanye harimo Amabanki, Amahoteli,ibigo by’itumanaho,Ibigo bya leta n’iby’abikorera hamwe n’ibigo by’Umuryango w’Abibumbye bikorera mu Rwanda.

DSPA imaze kubaka izina mu bikorwa byo kuzima inkongi mu Rwanda no mu Karere, by’umwiharimo mu Rwanda yagaragaje ko ishoboye ubwo yacyahaga mu kanya nk’ako guhumbya inkongi yari yibasiye ibiro bya Loni i Kigali mu Ugushyingo 2018.

DSPA Rwanda Ltd ihagarariye uruganda rwo mu Buholandi rwitwa DSPA nl muri aka karere, yatangiye gukorera mu bihugu bigize Afurika y’Iburasirazuba ikaba ifite n’umugambi wo gutangira gukorera muri Ethiopie, Sudani, Angola, Gabon na Congo kugera mu mpera za 2019.

Aba bakozi bahuguwe ku bijyanye no gukumira inkongi
Abantu 50 bahawe amahugurwa yo gukoresha ikoranabuhanga
Inzobere mu gukoresha ibikoresho by’ikoranabuhanga bizimya inkongi muri AHI Careers, Kiran Nagaraj, niwe wabahaye amahugurwa
Nduwamungu Darius yavuze ko iryo koranabuhanga rifasha mu gukumira inkongi
Rugamba Albert wiga ikoranabuhanga muri SOS Technical High School avuga ko aya mahugurwa azabafasha mu byo bakora
Umukozi ushinzwe kumenyekanisha ibikorwa bya DSPA, Furaha Juana, yavuze ko mu myaka itatu imaze ikora imaze kwagura imikoranire n’ibigo bya Leta n’abikorera ku kigero cya 60%
Umuyobozi Mukuru wa DSPA Rwanda, Gatebera John, yavuze ko ahenshi usanga uburyo bwo gucunga umutekano no gukumira inkongi bwifashishwa nta mikoranire bugira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza