Dr Vuningoma yashyinguwe, avugwa ubutwari bwamuranze kugeza yitabye Imana (Amafoto)

Yanditswe na Habimana James
Kuya 25 Mutarama 2020 saa 07:04
Yasuwe :
0 0

Dr Vuningoma James wari Umunyamabanga Nshingwabikorwa w’Inteko Nyarwanda y’Ururimi n’Umuco uherutse kwitaba Imana, yashyinguwe mu cyubahiro mu muhango waranzwe n’ubutumwa bugaragaza ubwitange n’ubutwari bwamuranze mu buzima bwe, byaba ku muryango we, ku gihugu no mu nshingano yagiye ashingwa.

Umuhango wo gusezera bwa nyuma kuri Dr Vuningoma, wabaye kuri uyu wa Gatandatu, aho yasezeweho mu rugo rwe n’abo mu muryango ku Kacyiru, nyuma haba igitambo cyo kumusabira cyabereye ku rusengero rw’Abangilikani i Remera mu Mujyi wa Kigali, mbere y’uko ashyingurwa mu irimbi rya Rusororo.

Ni umuhango witabiriwe n’abatari bake barimo abo bakoranye, n’abayobozi batandukanye mu gihugu.

Mu buhamya bwatanzwe, bwose bwagarutswe ku buryo Dr Vuningoma yari umuntu witangira abandi n’igihugu.

Anthony Vuningoma umuhungu wa Dr Vuningoma, yashimye ubutwari bwaranze Se, avuga ko yari umugabo ukunda igihugu cye kandi agakunda na Afurika muri rusange.

Yagize ati “Yari umugabo ufite umutima wo kwigomwa, yampaye amahirwe yo kubaho neza, yakoze ibyo yari ashoboye kandi neza 100%, yarwaniye u Rwanda n’Abanyafurika muri rusange, yari umugabo witonda kandi utavuga byinshi.”

Umugore wa Dr Vuningoma yahishuye ko yazize Kanseri

Goretti Kambayire, umugore wa Dr Vuningoma, yavuze ko yari umugabo wamugaragararije indangagaciro zikomeye kugeza yitabye Imana.

Yagize ati “Ndashimira Imana yampuje na Dr Vuningoma, mu myaka twabanye yari umuntu udasanzwe, yarankunze, yarantetesheje, yankundiye umuryango n’inshuti.”

Ubwo yagarukaga ku burwayi bwamwishe, Kambayire yavuze ko bwihuse mu buryo budasanzwe.

Ati “Uburwayi uko bwamufashe byari bimeze nk’umuryabyo, byarihuse ku buryo ntazi ariko ndashima Imana ko igihe yari arwaye namubaye hafi, ni umugabo wavuze kugeza ku munota wanyuma, ntiyigeze arwana n’urupfu.”

Kambayire yavuze ko ubwo Dr Vuningoma yafatwaga, bihutiye kujya mu Buhinde, agezeyo bamubwira ko arwaye kanseri kandi ko ibihaha byamaze kwangirika.

Yagize ati “Bamubwiye ko bagomba kumuvura, we yahise ambwira ati Oya, ntabwo ibi babinkorera ndi hano kuko no mu Rwanda ibi barabivura, dutahe mu gihugu cyacu bazankorera ubu buvuzi, ubu urabona uri hano wenyine, nibampa imiti nkamera nabi bizakugora. Tugeze mu Rwanda yambwiye ko agiye kuba ari mu kazi, agakora iherererakanya bubasha atanga dosiye, nyuma y’ukwezi ambwira ko kubera impamvu z’uburwayi yagombaga guhita asezera.”

Ku wa Gatandatu tariki 18 Mutarama, Dr Vuningoma yabyutse afite umuriro mwinshi, umugore we afata umwanzuro wo kumujyana mu bitaro byitiriwe umwami Faisal.

Ati “Tugezeyo batubwiye ko tugomba guhamagara abana ariko twe twumvaga bidashoboka, wabonaga avuga ariko abaganga bakambwira bati, nubwo mubona avuga ni uko ari umugabo ukomeye, igihaha kimwe Kanseri yaracyangije ntigikora, ikindi na cyo cyarangiritse igice kimwe.”

“Nareba muganga mu maso uburyo abimbwira, mbona ko hari ikibazo, nibwo nahamaye uyu mwana uba mu Bufaransa.”

Mukabacondo Thérèse wari uhagarariye RALC, yavuze ko Dr Vuningoma yabaye umuyobozi ukomeye mu kazi ke, cyane ko yagiye muri iyi Nteko batangirana abakozi batandatu gusa, akaba asize ari 27.

Yagize ati “Yari umuyobozi mwiza kandi w’umuvandimwe, yari umujyanama w’abo bakorana, yari umunyamahoro kandi akayaha n’abandi, mu myaka tumaranye ntitwigeze tubona arakaye, yari umuntu buri muntu yisangagaho kandi agakemura ibibazo by’abantu, yacaga bugufi kandi akubaha, yari umuntu wemeraga amakosa n’iyo yabaga atari we wayakoze.”
Minisitiri w’Urubyiruko n’Umuco, Mbabazi Rosemary, yavuze ko igihugu cyahaye amahirwe Dr Vuningoma yo kugikorera, nawe agakorana ubuhanga budasanzwe mu kazi.

Ati “Tubuze umuyobozi wakundaga umurimo unoze, ikintu yemeraga yagikoraga kandi neza, ntabwo twakoranye igihe kinini kuko iyi minisiteri yahujwe n’iy’umuco mu mpera z’umwaka ushize, ariko ndibuka ko twahise dukora umwiherero w’ibigo bishamikiye kuri minisiteri, wabonaga Dr Vuningoma afasha abandi bose kumva gahunda ihari.”

Dr Vuningoma James yavutse tariki 25 Ugushyingo 1948, kuri Rev.Meshack Vuningoma na Dorothy Vuningoma.

Yari umwana wa kabiri muri bagenzi barindwi bavukanaga.

Amashuri abanza yayize i Shyogwe, ayisumbuye ayigira ahitwa Nyakasura muri Uganda, ahava ajya muri Kaminuza ya Makerere.

Uyu mugabo yavugaga akanandika indimi zitandukanye zirimo Igifaransa n’Icyongereza n’Ikinyarwanda.

Mu mirimo yakoze, Dr Vuningoma yabaye Umuyobozi w’Ishami n’Umwarimu w’Igifaransa muri Makerere College School muri Uganda mu 1976 – 1980; yateguye ibizamini muri East African Council muri Kampala mu 1977- 1980; yabaye umwarimu udahoraho mu Ishami ry’Uburezi rya Kaminuza ya Makerere n’umutoza w’abarimu muri Teachers College Kyambogo muri Uganda mu 1977 – 1980.

Yabaye Umwarimu w’Icyongereza muri Lycée de Blaye mu Mujyi wa Bordeaux mu Bufaransa. Umwarimu w’Icyongereza ku banyeshuri biga nijoro mu yahoze ari Kaminuza ya KIST.

Umwanditsi Mukuru muri The New Times, yananditsemo inkuru nyinshi hagati ya 1997– 2000. Yabaye mu bateguraga ibizamini mu yahoze ari Kaminuza y’u Rwanda (UNR)

Yabaye inzobere mu bijyanye n’imicungire y’abakozi mu Ishami ry’Umuryango w’Abibumbye rishinzwe gutsura amajyambere (UNDP), umwarimu muri KIST, muri KIE, umugenzuzi mu Nama y’Amashuri Makuru na Kaminuza na Komiseri ushinzwe Itumanaho n’Itangazamakuru muri PAM Rwanda.

Dr Vuningoma yari umwe mu bagize Inama y’Ubutegetsi y’Inama y’Igihugu y’Itangazamakuru (Media High Council-MHC) yinjiyemo mu 2018.

Mu 2000 yahawe inshingano nk’Umuyobozi w’Ishyirahamwe ry’Abanyamakuru mu Rwanda (ARJ), yari yarabaye Visi Perezida wawo mu 1997; mu 1999 – 2000 yayoboye Umuryango w’abagiraneza bafasha abatishoboye wa Rotary Club Kigali – Virunga.

Mu 1999 yari Umunyamabanga w’Umuryango United Kingdom Goodwill Organisation (RUGO).

Mu buzima bwe, yakoze ubushakashatsi butandukanye, yanditse ibitabo anatanga ubujyanama butandukanye.

Dr Vuningoma James yari asanzwe ari Umunyamabanga Nshingwabikorwa w’Inteko Nyarwanda y’Ururimi n’Umuco (RALC), umwanya yagiyeho bwa mbere mu Ukuboza 2011.

Umuhungu wa Dr Vuningoma yananiwe kwihangana ubwo yamusezeragaho bwa nyuma
Umubiri wa Dr Vuningoma ukurwa mu rugo nyuma yo gusezerwaho, ngo umuhango ukomereze mu rusengero
Imiryango yakoranye ngo imuherekeze mu cyubahiro
Dr Vuningoma yitabye Imana azize kanseri
Inshuti n'umuryango babanje kumusezeraho mu rugo ku Kacyiru
Amb Charles Kayonga na Prof Laurent Nkusi basezera bwa nyuma kuri Dr Vuningoma
Byari amarira n'agahinda gakomeye
Mu rusengero hari hateguwe agatabo gakubiyemo amateka ya Dr Vuningoma James
Umuhango wo kumusezeraho wabereye mu rusengero rw'Itorero Angilikani i Remera
Abaherekeje Dr Vuningoma iwe ku Kacyiru
Inshuti n'umuryango zabanje kumusabira mu itorero i Remera
Umuyobozi w'Ishami ry'Umuco muri RALC, Dr. Jacques Nzabonimpa, agera ku rusengero aherekeje bwa nyuma Dr Vuningoma bakoranaga
Minisitiri w'Ubutabera akaba n'Intumwa nkuru ya Leta Johnston Busingye (hagati) n'Umunyamabanga Nshingwabikorwa wa Komisiyo yo kurwanya Jenoside, Dr Bizimana Jean Damascène bitabiriye uyu muhango
Umuhungu wa Dr Vuningoma atwaye umusaraba wo gushyira ku mva ya Se
Umubiri wa Dr Vuningoma winjizwa mu rusengero rw'Itorero Angilikani i Remera
Inshuti n'umuryango baherekeje Dr Vuningoma mu rusengero
Musenyeri Nathan Amooti Rusengo uyobora itorero ry'Abangilikani mu Mujyi wa Kigali
Abashumba basabira Dr Vuningoma ngo Imana imwakire mu bayo
Minisitiri w'Urubyiruko n'Umuco Rosemary Mbabazi yitabiriye umuhango wo gusezera Dr Vuningoma, wayoboraga ikigo kiri muri Minisiteri akuriye
Dr Bizimana ni umwe mu baherekeje Dr Vuningoma wayoboraga RALC
Dr James Ndahiro ni umwe mu baherekeje bwa nyuma Dr Vuningoma
Umunyarwenya Nkusi Arthur ni umwe mu bitabiriye uyu muhango
Umuhanzi Sintex na we yaherekeje Dr Vuningoma wayoboraga RALC
Umuhanzi Mariya Yohana mu baherekeje Dr Vuningoma
Intebe y'Inteko w'Umusigire Sr. Mukabacondo Thérèse, yashimangiye ko Dr Vuningoma yagiraga ubuntu n'ubumuntu
Minisitiri w'Urubyiruko n'Umuco Rosemary Mbabazi yashimye ubutwari bwaranze Dr Vuningoma mu mirimo yakoze
Umuryango wa Dr Vuningoma warase ibikorwa byamuranze mu buzima bwe
Umwana wa Dr Vuningoma yagarutse ku rwibutso Se amusigiye

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza