Dr Tedros yahakanye kwifatanya n’ingabo zihanganye na Guverinoma ya Ethiopia

Yanditswe na IGIHE
Kuya 20 Ugushyingo 2020 saa 07:53
Yasuwe :
0 0

Umuyobozi Mukuru w’Ishami ry’Umuryango w’Abibumbye ryita ku Buzima, OMS, Dr Tedros Ghebreyesus, yitandukanyije n’abamushinja ko ari umwe mu baterankunga b’ingabo za leta ya Tigray, ihanganye n’iza Guverinoma ya Ethiopia, mu ntambara imaze iminsi.

Guverinoma ya Ethiopia ishinja ishyaka riyoboye iyo Leta, Tigray People’s Liberation Front, TPLF, kwigomeka kuri guverinoma y’igihugu, kugeza ubwo Minisitiri w’Intebe, Dr Abiy Ahmed, yategetse ko ingabo za guverinoma zigaba ibitero ku ngabo z’iyo Leta, imwe mu zigize Ethiopia.

Umugaba Mukuru w’Ingabo za Ethiopia, Birhanu Jula, mu ijambo ryanyuze kuri Televiziyo y’Igihugu, yavuze ko “We [Tedros] ku giti cye ni umunyamuryango wa ririya tsinda kandi ni umunyabyaha”. Ntabwo yigeze atanga ibimenyetso.

Tedros yabaye Minisitiri w’Ubuzima wa Ethiopia n’uw’Ububanyi n’Amahanga hagati ya 2005 na 2016. Icyo gihe Guverinoma yari iyobowe n’Ihuriro rirangajwe imbere n’ishyaka TPLF, ryayoboye igihugu kugeza ubwo Minisitiri w’Intebe, Abiy Ahmed yajyaga ku buyobozi mu 2018.

Birhanu yashinje Tedros gukoresha ijambo afite ku rwego mpuzamahanga, akagerageza gufasha mu buryo bwa dipolomasi n’intwaro iri shyaka rya TPLF.

Mu itangazo Dr Tedros yasohoye, yavuze nta ruhande na rumwe abogamiyeho muri iyo ntambara.

Ati "Hari amakuru yakomeje kuvugwa ko hari uruhande mpagazeho muri iki kibazo. Ibyo ntabwo ari ukuri kandi ndifuza kuvuga ndi ku ruhande rumwe, uruhande rw’amahoro."

Abantu babarirwa mu magana bamaze gupfira mu mirwano ihanganishije Intara ya Tigray na Guverinoma ya Ethiopia kuva mu ntangiriro z’uku kwezi, abandi bahungiye muri Sudan.

Dr Tedros yahakanye kwifatanya n’ingabo zihanganye na Guverinoma ya Ethiopia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .