Dr Ndimubanzi yasabye ubufatanye bwihariye mu gufasha abarwaye indwara zidakira

Yanditswe na Evariste Nsengimana
Kuya 21 Nzeri 2019 saa 07:55
Yasuwe :
0 0

Umunyamabanga wa Leta muri Minisiteri y’Ubuzima, ushinzwe ubuvuzi bw’ibanze, Dr. Ndimubanzi Patrick, yasabye ibihugu byo ku mugabane wa Afurika n’ababituye guhuza imbaraga mu gufasha abaturage babyo barwaye indwara zidakira kandi zitera uburibwe.

Ubu butumwa yabutangiye i Kigali kuri uyu wa 20 Nzeri 2019 asoza inama nyafurika yiga ku gutanga ubufasha ku barwaye indwara zidakira kandi zitera uburibwe.

Ni inama yahuje abafite mu nshingano ibikorwa by’ubuvuzi bo mu bihugu 58 yitezweho kongera imbaraga mu kwinjiza ubuvuzi bw’indwara zidakira muri serivisi z’ubuvuzi budaheza, kongera ibikoresho byifashishwa ku kuvura abazirwaye n’ibindi.

Zimwe mu ndwara zidakira harimo Sida, Kanseri, indwara z’imitima, Diabetes n’izindi.

Umuyobozi w’umuryango Al hamal, ufasha abafite uburwayi budakira, Hakizimana Halimas, yabwiye IGIHE ko abarwaye indwara zidakira baba bakeneye ubufasha bwihariye kugira ngo bagire ubuzima bwisumbuye ubwo bakabaye bafite.

Ati “Ufite icyo kibazo cy’indwara ikomeye abanza guhangayika no kwiheba. Icya mbere akenera ni ukumuremamo icyizere, ukamwereka ko ibihe bitarangiye, ukamuha ingero z’abandi bantu bafite ibibazo nk’ibye. Nkatwe hari n’ubwo tuzana abarwayi bakajya gusura abandi kugira babahe n’ubuhamya.”

Hakizimana yavuze ko uretse ibyo uwo muntu aba anakeneye kuvuzwa n’ubundi bufasha bwo mu mibereho ya buri munsi umuntu ufite intege nke akenera.

Umuhuzabikorwa wa gahunda zo gufasha abarwaye indwara zidakira muri Minisiteri y’ubuzima, Mukasahaha Diane, yabwiye IGIHE ko mu Rwanda abakeneye ubwo bufasha bangana na 25% by’abarwayi bari hirya no hino mu bitaro.

Mu Rwanda nibura buri kagari gafite abantu babiri bashinzwe gufasha abantu bafite uburwayi budakira. Minisante igaragaza ko mu mwaka umwe bakurikiranye abantu 280 bari barembye cyane na 3950 bari bari bakeneye ubwo bufasha ariko batarembye.

Ati “Gahunda zo gufasha abarwaye indwara zidakira mu Rwanda bikorwa neza ariko iyi nama itumye tugera ku yindi ntera, itumye tumenyekana, twagiye tubona abadusaba kuza gukorana natwe ku buryo ubona ko abarwaye indwara zidakira bakeneye ubufasha bafiye kuzajya babubona mu buryo bwiza.”

Dr Ndimubanzi yavuze ko iyi nama imaze iminsi ibera mu Rwanda abayitabiriye babonye umwanya wo kuganira ku bibazo byugarije abarwaye indwara zidakira n’ubufasha bwihariye bakenera ku buryo hari icyizere ko bazazana impinduka.

Ati “Mureke dukorane bya hafi, dufatanye dufite intego imwe yo kunoza ubuvuzi n’ubufasha bw’indwara zidakira bo ku mugabane wacu.. abazirwaye tubafashe, tubaherekeze bagire ubuzima bwiza.”

Iyi nama ibaye ku nshuro ya gatandatu yitabiriye n’abanyacyubahiro batandukanye barimo abaminisitiri b’ubuzima b’u Rwanda, Gambia, Angola, Liberia,Nigeria, Ghana, abahagarariye ibihugu 13, Arikiyepiskopi wa Vatican, Vincenzo Paglia, impuguke mu by’ubuzima n’abandi.

Ishami ry’umuryango w’Abibumbye ryita ku buzima rigaragaza ko ku Isi habarirwa abarwaye indwara zidakira barenga miliyoni 40.

Iyi nama y'iminsi itatu yahuje ab'ingeri zinyuranye mu rwego rw'ubuzima
Arkiyepiskopi Vincenzo Pagrilia yasabye abihayimana gufatanya mu gufasha abarwaye indwara zidakira
Dr Ndimubanzi yasabye Afurika gufatanya byihariye mu gufasha abarwaye indwara zidakira
Hakizimana Halimas(ibumoso), yabwiye IGIHE ko abarwaye indwara zidakira baba bakeneye ubufasha bwihariye kugira ngo bagire ubuzima bwisumbuye
Mukasahaha Diane, yabwiye IGIHE ko mu Rwanda abakeneye ubwo bufasha bangana na 25% by’abarwayi bari hirya no hino mu bitaro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza