Dr Ndahimana yanenze ‘abakora ibitangaza’ bagatanga ubukire, bagakiza n’indwara

Yanditswe na Emma-Marie Umurerwa
Kuya 22 Kanama 2018 saa 06:29
Yasuwe :
0 0

Umusesenguzi mu birebana n’amadini, Dr Jean d’Amour Ndahimana, yagaragaje ko ibitangaza by’abapasiteri bizeza abakirisitu ubukire no gukira indwara nta shingiro bifite.

Iyi mpuguke ivuga ko iby’aba bapasiteri bishobora kugira ingaruka mbi ku muryango nyarwanda.

Yabigarutseho mu kiganiro Imboni cyatambutse kuri Televiziyo y’u Rwanda cyari cyatumiwemo Bishop Rugagi Innocent na Pasiteri Nsabimana Innocent bafatwa nk’abakora ibitangaza mu matorero yabo.

Dr Ndahimana usanzwe ari n’umuganga, yavuze ko kwizeza abantu iterambere n’ubukungu mu bitangaza aho kubashishikariza gukora, bifite ingaruka mbi ku muryango nyarwanda.

Yatanze urugero ku izamuka ry’ubukungu bw’u Bushinwa, avuga ko bufite abakirisitu 9% ariko bitabubuza kugira umuvuduko w’ubukungu ukubye inshuro nyinshi uw’u Rwanda.

Ku bijyanye n’ubuvuzi ho, yagize ati “Kwizeza abantu gukira indwara binyuze mu kwizera no mu gusengerwa n’ibindi, ibyo ni inzitizi ikomeye cyane ku buzima bw’abantu muri iki gihe turi kurwana nacyo.”

Pasiteri Bosco Nsabimana yavuze ko ibitangaza byabayeho kuva Isi ikiremwa kandi ibyo Yesu yakoraga ku gihe cye hari abo yahaye impano yo kubikomeza none.

Ati “Abapasiteri twemera ko umuntu kugira ngo atere imbere ari uko akora. Tumusengera twunganira icyo yatangiye, ababuza abantu gukora ni ubujiji n’imyizerere ipfuye. Ntabwo duca intege abatuyoboka dukoresheje Bibiliya.”

Dr Ndahimana yavuze ko iyo abapasiteri baba basengera abantu bakabona ubukire, bakwiye gusaba Leta urutonde rw’abaturage bari mu kiciro cya Mbere cy’ubudehe bakabasengera, bagakira.

Yanageze kure ati “Rwose niba mushobora gusenga hakaba igitangaza hano turi imbere ya televiziyo, abanyarwanda baradukurikiye nimusenge mpinduke ikiragi kuko ibyo mwavuze byose nta na kimwe mpa agaciro.”

Ni ijambo ariko Bishop Rugagi yahuje n’ibihe bya Yesu ashukwa na Satani, isomo rikunze kugarukwaho cyane mu Gisibo, igihe cyo kwigomwa no gusenga.

Ati “Yesu yabwiwe ijambo na satani ngo fata ibuye urihindure umugati niba uri umwana w’Imana, abwira satani ngo ntukagerageze umwana w’Imana. Ntabwo nkoreshwa nawe nkoreshwa na data wampamagaye, ndamutse nkoreshejwe n’uko ukoresheje iyo mvugo naba numviye ikikurimo.”

Dr Ndahimana yasoje avuga ko ubukire bw‘igihugu hamwe n’ubuzima bwiza bw’abanyarwanda bazabikesha gukora cyane no gukoresha ubwenge.

Bishop Rugagi Innocent ni umwe mu bavuga ko bakora ibitangaza
Pasiteri Bosco bakunda kwita Fire avuga ko ibitangaza Yesu yakoraga yamuhaye ubushobozi bwo kubikora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .