Dr Mutsinzi wayoboye iperereza ku ihanurwa ry’indege ya Habyarimana yitabye Imana

Yanditswe na Cyprien Niyomwungeri
Kuya 21 Ugushyingo 2019 saa 12:17
Yasuwe :
0 0

Dr Jean Mutsinzi wayoboye itsinda ryashyizweho n’u Rwanda mu kumenya uwarashe indege ya Perezida Habyarimana Juvénal, yitabye Imana mu gitondo cyo kuri uyu wa Kane mu bitaro byitiriwe Umwami Faysal.

Dr Mutsinzi wavutse kuwa 5 Mata 1938, ni umwe mu banyarwanda ba mbere babonye impamyabumenyi y’ikirenga (Doctorat) mu mategeko, ayikuye mu Bubiligi. Yakoze muri Repubulika Iharanira Demokarasi ya Congo, muri Komisiyo Nyafurika y’uburenganzira bwa muntu n’ahandi.

Yabaye Perezida w’Urukiko rw’Ikirenga wa mbere nyuma ya Jenoside yakorewe abatutsi, mu gihe cyari kigoye cyane mu bijyanye no gutanga ubutabera ku bari bamaze kugira uruhare muri aya mahano.

Dr Mutsinzi kandi yibukwa cyane ubwo yari ayoboye Komisiyo y’abantu barindwi yakoze iperereza ku ihanurwa ry’indege ya Habyarimana, iyi ikaba yaranakoze raporo yamwitiriwe.

Abandi bari bagize iyi komisiyo ni; Dr. Jean Damascene Bizimana wari Visi Perezida, Alice Rugira wari umunyamabanga, Augustin Mukama, Jean Baptiste Mvano, Judith Mbabazi na Peter Mugenzi.

Raporo Mutsinzi yatangajwe mu 2010 yemeje ko ibisasu byarashe indege ya Habyarimana byavuye mu nkambi ya Kanombe, birashwe n’abahezanguni bari mu ngabo z’u Rwanda (FAR) bashakaga kumwikiza, kugira ngo haburizwemo ishyirwa mu bikorwa ry’amasezerano ya Arusha ndetse babone n’uko barangiza umugambi wo kwica Abatutsi.

Mu kiganiro IGIHE yagiranye na Tom Ndahiro wamenye cyane Dr Mutsinzi, yavuze ko ‘ari umuntu wagize akamaro atari mu Rwanda gusa ahubwo no mu karere kacu na Afurika’

Ati “Yagize inshingano zikomeye kandi zose akazikora neza nko kuba yarabaye Perezida w’Urukiko rw’Ikirenga Jenoside igihagarikwa ntabwo ari ikintu cyoroshye”.

Ndahiro avuga ko Dr Mutsinzi hari umurage asigiye abanyarwanda w’ubushishozi no kujya inama zubaka.

Ati “Ni umuntu wagiraga ubushishozi cyane. Iyo mwaganiraga cyangwa hari nk’inyandiko ategura cyangwa umuhaye ngo ayinyuremo, yari umuntu wita cyane ku gukora ikintu kinoze. Ikindi ni umuntu wajyaga inama atitangiriye itama niba wayimugishije arayikubwira kandi akayikubwira neza, muri make yari umunyarwanda w’imfura”.

Dr Mutsinzi yabaye Perezida w’Urukiko rw’Ikirenga kuva mu 1995-1999, umucamanza mu rukiko rwa Comesa mu 2001-2003, Perezida w’Urukiko rwa Afurika, yari muri Komisiyo yateguye Itegeko Nshinga ry’u Rwanda rya 2003, ryavuguruwe mu 2015, Umuyobozi w’ubushakashatsi muri Université Libre de Bruxelles n’ibindi.

Dr Mutsinzi ni umwe mu banyamategeko bakomeye u Rwanda rwari rufite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza