Dr Mbonye arimo gutanga umusanzu mu bushakashatsi kuri Coronavirus

Yanditswe na Habimana James
Kuya 7 Gicurasi 2020 saa 01:36
Yasuwe :
0 0

Muri ibi bihe Isi yibasiwe na Coronavirus, abashakashatsi batandukanye ntibicaye, barashaka urukingo cyangwa umuti byarokora abantu bakomeje kwandura no kwicwa n’iki cyorezo.

Ishami ry’Umuryango w’Abibumbye ryita ku Buzima, OMS, rivuga ko rikomeje gukorana n’abafatanyabikorwa hirya no hino ku Isi, hagamijwe kwihutisha ubushakashatsi ku muti n’urukingo bya Coronavirus.

OMS ivuga ko abantu miliyoni 3.8 bamaze kwandura Coronavirus, abantu ibihumbi 265 bamaze gupfa naho miliyoni 1.3 bamaze gukira.

Kugeza ubu kandi ibihugu birenga 90 byemeye cyangwa se byagaragaje ubushake bwo kugira uruhare mu igerageza ry’umuti n’urukingo.

Abashakashatsi b’Abanyarwanda barimo n’abakora mu nzego z’ubuzima, bavuga ko batangiye urugamba rwo gushakashaka no gufatanya na bagenzi babo mu buryo bwo gushakira ibisubizo icyorezo cya Coronavirus.

Dr Uri Mbonyi ni Umunyarwanda w’umuhanga mu bijyanye n’ibinyabuzima, akaba ari umwe mu bashakashatsi uri gukorana n’abandi ngo bamenye neza agakoko ka SARS-CoV-2, gatera COVID-19. Ari mu itsinda ry’abashakashatsi barimo kwiga inzira zatumye haduka COVID-19, kuko kugeza ubu hari ibitaramenyekana kuri iyi virus.

Avuga ko arimo kwiga ibintu bine bigize COVID-19, intego ari ukugera ku gikorwa cyo guhangana nayo, ndetse no kugera mu nzira zo gushaka uko iyi virus yavurwa.

Muri rusange abahanga bavuga ko barimo gushaka kumenya bimwe mu bigize amatembabuzi barimo gufata mu bamaze kwandura Coronavirus.

Bavuga ko ibiva muri ibi bipimo bishobora gusesengurwa biciye mu bushakashatsi ku buryo haboneka umuti, ndetse bikaba byafasha kwitegura mu gihe kiri imbere haramutse hadutse ikindi cyorezo kimeze nka Coronavirus.

Dr Mbonye ni umushakashatsi muri siyansi ukorera muri Leta Zunze Ubumwe za Amerika, yari asanzwe yibanda cyane ku bushakashatsi ku cyorezo cya Sida.

Gusa ubwo Isi yibasirwaga na Coronavirus, ubushakashatsi bwe bwerekeje amaso kuri iki cyorezo nk’uko n’abandi bashakashatsi muri rusange babigenje.

Dr Mbonye usanzwe ari n’umunyamuryango w’Inteko Nyarwanda y’Ubumenyi (Rwanda Academy of Sciences), yabwiye itangazamakuru ko ubushakashatsi arimo gukora bugamije kugera ku makuru ahagije kuri iyi ndwara no gufasha mu kuyipima mu buryo bwihuse.

Ati "Nk’uko mubizi bimwe mu bipimisho birimo gukoreshwa mu guhangana na Coronavirus, ntabwo birimo gukora neza mu buryo bwo gutanga amakuru neza.”

Kugeza ubu ibihugu hirya no hino ku Isi bikomeje guhura n’imbogamizi zikomeye mu gupima abantu benshi, ku buryo bamenya ko banduye cyangwa batanduye iyi virus.

Ubushakashatsi bwa Dr Mbonye kandi ngo bugamije kubaka ubudahangarwa bushobora gutuma umubiri wihagararaho kuri iyi virus ndetse no guhagarika kuba yajya kwangiza ibihaha.

Avuga ko yiteguye gufatanya n’abashakashatsi bari mu Rwanda n’inzego zitandukanye, mu guhangana n’iki cyorezo. Ashimangira ko ibikorwa by’ubushakashatsi bikwiye guterwa inkunga ifatika, kuko aribyo bituma bwihuta ku buryo iki cyorezo cyavurwa muri buri gihugu.

Dr Uri Mbonye avuga ko Abanyarwanda bakomeje gufatanya na bagenzi babo mu gushaka ibisubizo kuri Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .