Dr Kaberuka yashyizwe mu kanama k’Umuryango w’Abibumbye kazashakira umuti ibibazo by’abavanwe mu byabo

Yanditswe na IGIHE
Kuya 6 Ukuboza 2019 saa 09:19
Yasuwe :
0 0

Dr Donald Kaberuka yagizwe umuyobozi mu kanama ko ku rwego rwo hejuru kagizwe n’abantu umunani, kashyizweho n’Umuryango w’Abibumbye, gashinzwe gushakira umuti ibibazo by’abantu bavanwe mu byabo ku mpamvu zitandukanye.

Ni akanama Umunyamabanga Mukuru w’Umuryango w’Abibumbye, António Guterres yashyizeho ku wa 3 Ukuboza, nyuma y’uko ku wa 23 Ukwakira ari bwo yatangaje ko ako kanama kagiye kujyaho.

Kazayoborwa na Federica Mogherini wahoze ari Visi Perezida wa Komisiyo y’Umuryango w’Ubumwe bw’u Burayi akaba n’intumwa yihariye mu bijyanye n’umubanyi n’amahanga, afatanyije na Dr Donald Kaberuka wahoze ayobora Banki Nyafurika Itsura Amajyambere, ubu ni umuyobozi w’inama y’ubutegetsi y’ikigega Global Fund, gitera inkunga ibikorwa byo kurwanya Sida, Malaria n’Igituntu.

Ni akanama kazagira uruhare mu gushakira umuti ibibazo by’abantu bavanwa mu byabo mu bihugu bitandukanye, bakomeza kwiyongera.

Nko mu mwaka ushize bibarwa ko abavanywe mu byabo kubera amakimbirane yakoreshejwemo intwaro n’ubugizi bwa nabi, bageze ku mubare wari utarabaho mu mateka, miliyoni 41 ku Isi. Muri uwo mwaka kandi miliyoni 17 bavavuye mu byabo bitewe n’ibiza.

Itangazo ry’umuvugizi w’Umuryango w’Abibumbye rivuga ko “Umunyamabanga Mukuru yahaye aka kanama inshingano zo gushaka ibisubizo birambye no kuzamura ubukangurambaga ku bavanwa mu byabo mu bihugu binyamuryango ndetse Umuryango w’Abibumbye ukazamura uruhare rwawo mu gufasha abagizweho ingaruka, baba abavanwe mu byabo n’imiryango yabakiriye.”

Mu bandi bagize ako kanama harimo Paula Gaviria Betancur (Colombia) uyobora Fundacion Compaz; Senateri Nasser Judeh (Jordan) akaba no mu kanama k’Umunyamabanga Mukuru w’Umuryango w’Abibumbye mu bijyanye n’ubuhuza. Harimo kandi Per Heggenes (Norvege) uyobora IKEA Foundation, Mitiku Kassa Gutile (Ethiopia), Pauline Riak (Sudani y’Epfo) na Sima Samar (Afghanistan).

Biteganyijwe ko aka kanama kazatanga raporo y’imyanzuro yako mu mwaka utaha wa 2020, kakazahura nibura inshuro enye mbere yo gutanga raporo, abakagize bakazahurira mu mijyi irimo Genève, New York n’ahandi.

Umunyamabanga Mukuru kandi yanashyizeho itsinda ry’impuguke (Expert Advisory Group) rizunganira ako kanama, rigizwe na Chaloka Beyani (UK/Zambia); Umufaransakazi Alexandra Bilak; Umusuwisi Walter Kälin n’Umunyamerikakazi Elizabeth Ferris, bose bakaba impuguke mu bijyanye no gufasha abavanywe mu byabo no mu mategeko mpuzamahanga.

Dr Kaberuka yashyizwe mu kanama k’Umuryango w’Abibumbye kazashakira umuti ibibazo by’abavanwe mu byabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza