00:00:00 IGIHE NETWORK KN KINYARWANDA EN ENGLISH FR FRANCAIS

Imvano ya ‘Guverinoma y’Ubumwe’ n’uko FPR Inkotanyi yatezwe iminsi

Yanditswe na Akayezu Jean de Dieu
Kuya 25 July 2022 saa 07:35
Yasuwe :

Ubwo FPR Inkotanyi yari irimbanyije iganisha ku gutsinda urugamba rwo kubohora igihugu no guhagarika Jenoside yakorerwaga Abatutsi mu 1994, hari benshi barimo ab’imbere mu gihugu n’abanyamahanga bavugaga ko nubwo izarutsinda itazabasha kuyobora.

Ku rundi ruhande ariko, ubwo FPR Inkotanyi yari imaze gutsinda urugamba yashyizeho ‘Guverinoma y’Ubumwe bw’Abanyarwanda’, ibintu byakozwe hanubahirizwa amasezerano ya Arusha, yari yarasinywe mu 1993.

Ni ukuvuga ko hashize imyaka 28 hashyizweho Guverinoma y’Ubumwe bw’Abanyarwanda igiyeho kuko abari bayigize barahiriye inshingano zabo tariki 19 Nyakanga 1994, ubwo hari hashize ibyumweru bibiri urugamba rwo kubohora igihugu rurangiye.

Perezida w’Inteko Ishinga Amategeko, Umutwe wa Sena, Dr Iyamuremye Augustin, yavuze ko kugira ngo nyuma ya Jenoside yakorewe Abatutsi hashyirweho ‘Guverinoma y’Ubumwe bw’Abanyarwanda’ ari ibintu bifite imvano y’ubwo bumwe bwari bwarasenywe n’abahisemo kwimakaza amacakubiri no gutanya Abanyarwanda.

Dr Iyamuremye Augustin wari muri iyo Guverinoma nka Minisitiri w’Ubuhinzi n’Ubworozi, avuga ko impamvu yiswe ‘Guverinoma y’Ubumwe’ ari uko intambara yo kubohora igihugu yari igamije kugarura ubumwe ndetse n’abari impunzi bagatahuka.

Ati “Intambara yo kubohora igihugu yari igamje kugarura ubwo bumwe n’abari impunzi bagatahuka. Habaye amasezerano ya Arusha, ni ikintu tujya twibagirwa, wenda tugomba no kubwira abakiri bato ko kugira ngo ubwo bumwe bugaruke, bamwe bagombye kwitanga ndetse baranabirwanira. Urwo rugamba rwamaze hafi imyaka ine.”

Yakomeje agira ati “Kugira ngo rurangire [urugamba rwo kubohora igihugu] n’abari intagondwa mu Rwanda bageze aho kubera ingufu zari mu gihugu z’abatavuga rumwe na guverinoma y’icyo gihe ndetse n’urwo rugamba bemera kuganira.”

Dr Iyamuremye yabigarutseho mu kiganiro yatangiye kuri RBA aho yari yahuriye n’Umunyamabanga Mukuru w’Ishyaka Riharanira Ukwishyira Ukizana kwa buri Muntu (PL), Nyiramirimo Odette, kuri iki Cyumweru tariki 24 Nyakanga 2022.

Yavuze ko mu biganiro byabereye i Arusha, aribwo hemejwe ko hazashyirwaho ‘Guverinoma y’Ubumwe bw’Abanyarwanda’.

Ati “Mu masezerano yabaye mbere na mbere abantu bakayumvikanaho, kwari ukugarura ubumwe bw’Abanyarwanda no kubaka leta igendera ku mategeko. Nyuma haza n’ibiganiro mu bijyanye no gusangira ubutegetsi ariko amasezerano y’ibanze hari ukubaka leta igarura ubumwe bw’Abanyarwanda.”

Dr Iyamuremye avuga ko muri icyo gihe cy’ibiganiro bya Arusha, itegeko rya nyuma iyari Inteko Ishinga Amategeko y’u Rwanda icyo gihe yatoye, ryemeraga amasezerano ya Arusha.

Avuga ko iyi guverinoma yagiyeho tariki 19 Nyakanga 1994, yari iri mu masezerano ya Arusha nubwo yatindijwe n’ukwikanyiza n’abatarayishakaga bahitse bashyira mu bikorwa Jenoside yakorewe Abatutsi.

FPR nta wayiciraga akari urutega, barababwiye ngo ‘murwigere muruduhe’

Perezida wa Sena, Dr Iyamuremye Augustin, avuga ko ikintu gikomeye kigaragaza intego yo kunga Abanyarwanda no kubaka igihugu FPR Inkotanyi yagaragaje, ari uko nyuma yo gutsinda urugamba yubahirije ibyateganywaga n’amasezerano ya Arusha.

Ati “Ikintu twashima ni uko FPR imaze gutsinda urugamba yashoboraga no gushyiraho guverinoma, igategeka ikurikije gahunda yayo uko ibyumva ariko bubahirije amasezerano ya Arusha.”

Icyo gihe ngo hari benshi batayiciraga akari urutega bavuga ko nubwo ibonye igihugu ariko itazashobora kukiyobora. Muri bo avugamo na François Mitterrand wari Perezida w’u Bufaransa muri icyo gihe.

Ati “Hari umuperezida w’u Bufaransa, [François Mitterrand] yaravuze ngo FPR irimo iratsinda ariko ntizayobora.Ibyo biri mu binyamakuru yarabivuze.”

Yakomeje agira ati “N’abantu benshi rero bumvaga bayiteze aho, bati izatsinda ariko ntizashobora kuyobora. Ngira ngo n’ingorane nyinshi abantu bagize ni icyo kintu cyo kumva abantu badafite icyizere mu bandi, cyane cyane abantu twari mu gihugu n’amashyaka twabagamo.”

“Ariko icyo nakubwira ni uko ishingiro rya Guverinoma y’Ubumwe riri ku mahame FPR yari yarwaniye kandi iyaganiraho n’izindi nzego z’igihugu. N’ikimenyimenyi ayo masezerano ya Arusha niyo yayoboye inzibacyuho kugeza habaye amatora.”

Nyiramirimo waje kwinjira muri Guverinoma y’Ubumwe mu 2000, avuga ko icyo gihe hari abantu benshi batumvaga ko FPR Inkotanyi izabasha kuyobora igihugu ku buryo hari n’aho yigeze kujya bakamubwira ko bagomba kukivamo mu bihe bya vuba.

Ati “Ndibuka ko nagiye muri Kenya ngahura n’umuntu akikanga, akandamutsa ambaza ngo wowe ntabwo wapfuye? ’Ngo uvuye he se?’ Nti ’mvuye i Kigali’. ’Ngo uje muri Kenya kandi? Ngo yeee, nimurwigere muruduhe.’ Mbese n’imbyino babyinaga ’nimurwigere, muruduhe’, ngo ubwo namwe muzi ko muzayobora.”

Yakomeje agira ati “Nk’ubwo yari atangiye kukubwira neza ko muziranye mwiganye, yakwibuka ko we atakiri mu Rwanda wowe uhari, ibintu bigacika, bo babaga bitoreza kugaruka. Leta icyo yihutiye ni ukugarura amahoro mu Rwanda.”

Hari abanze akazi ka leta…

Nyiramirimo icyo gihe yari umwe muri ba Komiseri b’ishyaka rya PL, avuga ko abanyepolitiki bari imbere mu gihugu babonye FPR Inkotanyi imaze kubohora igihugu no guhagarika Jenoside yakorerwaga Abatutsi, nta cyizere bari bafite cy’uko hazabaho ubumwe.

Ati “Icya mbere twari tukiri mu ntambara nubwo urugamba twizihiza ko rwahagaritse Jenoside iriya tariki 4 Nyakanga, ariko bwa bwicanyi bwarakomeje […] icyo gihe rero umuntu wari mu Rwanda nta n’iby’ubutegetsi yatekerezaga.”

Yakomeje agira ati “Aho wanyuraga hose hari imirambo ahandi inzu zimwe zigicumba umwotsi, ubona umuntu wese yirukanka, ufite akajerekeni yiruka abaza abandi ati wambwira aho amazi ari, undi ajya kureba […] iby’ubutegetsi cyangwa iby’ubuyobozi bw’icyo gihe nta wabitekerezaga.”

Avuga ko aho yari yihishe n’abo mu muryango we, [mu mujyi ahazwi nko kwa Gasasira], umuntu umwe mu bari bagiye kujya muri guverinoma yabanyuzeho ababwira ko bagiye kuri CND [Inteko Ishinga Amategeko] kurahirira kujya muri Guverinoma y’Ubumwe bw’Abanyarwanda.

Ati “Ati nibuka ko uwo munsi w’itariki 19 Nyakanga 1994, hari abantu batunyuzeho, umuntu araza aratubwira ati ’mbese ntabwo mwakurikiye amakuru ko guverinoma igiye kurahira’, tuti ese ubwo harajyamo bande? […] ntabwo rero icyo gihe abantu batekerezaga uko biri burangire.”

Yakomeje agira ati “Ariko abo twari twahuye na bo barimo ba Joseph Nsengimana bari batubwiye bati ’nyamara kanaka na kanaka bari bujye muri iyo guverinoma’ ariko nibwo twahise twemera ko igiye kuba ya Guverinoma y’Ubumwe yemerejwe Arusha, uwo munsi nibwo twabyemeye bamaze kurahira.”

Dr Iyamuremye yavuze ko muri ibyo bihe bitari byoroshye kubera ko hari n’abantu bahabwaga akazi ka leta bakakanga.

Ati “Birumvikana ibihe twarimo, ibikomere abantu bari bafite, hari abahigwaga barokotse ku bw’Imana kubera ko bagombaga kwicwa, ariko Imana irabarokora, urumva kujya mu bya politiki no gutekereza kuba abaminisitiri, si byo byari bibashishikaje.”

Yakomeje agira ati “Abandi na bo barishishaga bavuga bati ’twe ntitwahigwaga cyangwa se abicanyi ni bene wacu’, urumva ko hari icyo kintu cyo kutizera, ubwabo umuntu atifitiye icyizere kandi atagifitiye […] hari uwigeze kubyandika ati ’hari urunturuntu.’”

Avuga ko n’abari abasirikare bari bamaze guhagarika Jenoside icyo gihe nabo wasangaga batarajwe ishinga no kujya mu buyobozi cyangwa imyanya ya politiki.

Ati “N’abari mu ngabo nabo, urumva umuntu urwanye imyaka ine n’ibibi yabonye byose akaza agahagarika Jenoside kandi icyo gihe n’amasasu yari akiriho n’abacengezi bakiriho, icyo kintu navuga ko cyari kiruhije.”

Yakomeje agira ati “Ni na yo masezerano yasinywe hagati y’imitwe ya politiki njye n’ubu nshimira FPR, yavuze iti ’abantu nibaze bafatanye’, nyuma wenda hari abagiye batabyemera cyangwa se batanabishoboye babivamo, hari n’abandi bari mu gihugu banashoboye ariko bakanga kujya muri guverinoma.”

“Hari n’abahisemo kwigumira muri ‘Zone Turquoise’ bakumva ariho bafite amahoro , twabahamagara ngo baze mu buyobozi bakanga ariko hari n’abigiraga mu miryango itari iya leta kuko yahembaga amafaranga menshi. Akazi ka leta barakangaga, kwari uguhendahenda ntabwo ari nk’ubu umuntu yandika asaba akazi ahubwo akazi kaburaga abagakora.”

Nyiramirimo avuga ko nyuma yo gushyirwaho kwa Guverinoma y’Ubumwe bw’Abanyarwanda, icyakurikiyeho ndetse cyihutirwaga kurusha ibindi kwari ugusana amagara y’abari babashije kurokoka, akaba ari akazi gakomeye kanakozwe na Minisiteri yari ifite Imibereho y’Abaturage mu nshingano ari na yo yaje kubera Umunyamabanga wa Leta mu 2000.

Perezida wa Sena y'u Rwanda, Dr Iyamuremye Augustin, yagaragaje ko nyuma ya Jenoside yakorewe Abatutsi hari abantu bateze iminsi FPR Inkotanyi
Dr Iyamuremye na Nyiramirimo Odette bashimangiye ko FPR Inkotanyi yakoze ibyo benshi batakekaga ubwo yashyiragaho Guverinoma y'Ubumwe bw'Abanyarwanda nk'uko byateganywaga n'amasezerano ya Arusha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .