Dr. Francis Habumugisha ushakishwa n’Ubushinjacyaha yagaragaye i Paris

Yanditswe na IGIHE
Kuya 6 Ukuboza 2019 saa 07:51
Yasuwe :
0 0

Dr. Francis Habumugisha ushakishwa n’Ubushinjacyaha kugira ngo hashyirwe mu bikorwa umwanzuro w’Urukiko Rwisumbuye rwa Nyarugenge, w’uko aburana afunzwe, yagaragaye mu mujyi wa Paris mu Bufaransa.

Ku wa 23 Nzeri 2019 nibwo Urukiko rw’Ibanze rwa Nyarugenge rwarekuye by’agateganyo Dr Francis Habumugisha, umushoramari akaba na nyiri Goodrich TV, ukurikiranyweho gukubitira mu ruhame umukobwa witwa Kamali Diane, icyaha ashinjwa ko yakoze ku wa 15 Nyakanga.

Mu kuburana ku ifungwa n’ifungurwa ry’agateganyo, Ubushinjacyaha bwasabye ko Habumugisha afungwa by’agateganyo mu gihe hakomeje iperereza, kugira ngo atazasibanganya ibimenyetso.

Gusa urukiko rwaje gutegeka ko arekurwa by’agateganyo kuko yakurikiranywe ari hanze amezi abiri mbere yo gutabwa muri yombi kandi ntabangamire iperereza.

Ikindi ubwo yaburanaga ku ifungwa n’ifungurwa, Dr Habumugisha yatanze abishingizi urukiko rusanga ari abantu bazwi kandi b’inyangamugayo.

Irekurwa rya Dr. Francis Habumugisha atanze ingwate ntabwo ryanyuze Ubushinjacyaha, buhita bujuririra Urukiko Rwisumbuye rwa Nyarugenge, rwemeza ko uregwa agomba kuburana afunzwe.

Gusa umwanzuro ntabwo urashyirwa mu bikorwa, kuko Ubushinjacyaha buvuga ko bugishakisha uyu mugabo.

Kuri uyu wa 5 Ukuboza 2019 abinyujije ku Twitter yagaragaje ko ari mu gihugu cy’u Bufaransa, ku ifoto imugaragaza ku kibuga cy’indege cya Paris.

Inkuru y’uko Dr Habumugisha yakubitiye Kamali mu ruhame yasakaye ku wa 5 Nzeri 2019 ubwo yanyuzaga ubutumwa kuri Twitter buherekejwe n’amashusho.

RIB yamutaye muri yombi ku wa 6 Nzeri 2019, kugira ngo akorerwe dosiye aburanishwe ku cyaha ashinjwa cyo gukubitira umuntu mu ruhame, ku munsi ukurikiyeho dosiye ishyikirizwa Ubushinjacyaha.

Icyo cyaha kiramutse kimuhamye, ingingo ya 121 mu Itegeko riteganya ibyaha n’ibihano muri rusange ivuga ko umuntu wese ubishaka, ukomeretsa undi, umukubita cyangwa umusagarira ku buryo bwa kiboko bubabaje, aba akoze icyaha.

Iyi abihamijwe n’urukiko ahanishwa igifungo kitari munsi y’imyaka itatu ariko kitarenze imyaka itanu n’ihazabu y’amafaranga atari munsi y’ibihumbi 500 Frw ariko atarenze miliyoni 1 Frw.

Iyo icyaha cyakorewe umwana, umubyeyi, uwo bashyingiranywe cyangwa umuntu udashoboye kwitabara kubera imiterere ye ku mubiri cyangwa mu bwenge, ahanishwa igifungo kitari munsi y’imyaka itanu ariko kitarenze imyaka umunani n’ihazabu y’amafaranga atari munsi ya miliyoni imwe ariko atarenze miliyoni 2 Frw.

Dr. Francis Habumugisha ushakishwa n'ubutabera yagaragaye mu Mujyi wa Paris

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza