Dr Francis Habumugisha uregwa gukubitira umukobwa mu ruhame yarekuwe atanze ingwate

Yanditswe na Habimana James
Kuya 23 Nzeri 2019 saa 03:55
Yasuwe :
0 0

Urukiko rw’ibanze rwa Nyarugenge rwarekuye by’agateganyo Dr Francis Habumugisha, umushoramari akaba na nyiri Goodrich TV, ukurikiranyweho gukubitira mu ruhame umukobwa witwa Kamali Diane.

Akurikiranweho ko tariki 15 Nyakanga uyu mwaka ubwo yari mu nama n’abakozi be, yahohoteye uwitwa Kamali Diane.

Mu kuburana ku ifungwa n’ifungurwa ry’agateganyo, ubushinjacyaha bwasabye ko Habumugisha afungwa by’agateganyo mu gihe hakomeje iperereza, kugira ngo atazasibanganya ibimenyetso.

Kuri uyu wa Mbere ariko urukiko rwategetse ko arekurwa by’agateganyo kuko yakurikiranywe ari hanze amezi abiri mbere yo gutabwa muri yombi kandi ntabwo yigeze abangamira iperereza.

Ikindi kandi baburana ku ifungwa n’ifungurwa Dr Habumugisha yatanze abishingizi urukiko rusanga ari abantu bazwi kandi b’inyangamugayo.

Dr Habumugisha yategetswe kwitaba ubushinjacyaha buri wa Mbere w’icyumweru kandi akaba nta nama yemerewe kujyamo. Ntabwo kandi yemerewe gusobanura kuri video imushinja guhohotera Kamali Diane. Hari kandi n’imitungo ye yafatiriwe.

Perezida w’inteko iburanisha yavuze ko urukiko rwategetse ko “Mu minsi mike Dr Habumugisha agomba kuba yatanze ibyangombwa by’umwimerere by’ubutaka yatanze nk’ingwate ku rukiko.”

Icyumba cy’Urukiko nticyagaragayemo Dr Habumugisha n’abamwunganira mu mategeko, mu gihe uruhande rw’ubushinjacyaha rwo rwari ruhagarariwe.

Umucamanza yabanje gusobanura ibyo ababuranyi bombi babanje kuburanaho ku ifungwa n’ifungurwa, aba ariho ahera afata umwanzuro wo kurekura uyu mugabo agakurikiranwa ari hanze.

Urukiko rwagaragaje ko kuba icyaha Dr Habumugisha, akurikiranyweho kitamufungisha igifungo kirenze imyaka itanu, ibi biri mu bituma akurikiranwa ari hanze.

Kuba ubushinjacyaha bwarashakaga ko Dr Habumugisha akurikiranwa afunze kuko ngo yasibanganya ibimenyetso, Urukiko rwavuze ko nta bimenyetso butanga bifatika byerekana ko koko yabisibanganya.

Ubwo yitabaga urukiko tariki 13 Nzeri uyu mwaka ku ifungwa n’ifungurwa, Dr Habumugisha yaburanye avuga ko atemera ibyaha byose, ko akwiye no kurekurwa akaburana ari hanze cyane ko ngo afite umutungo mwinshi, abamwishingira n’ibindi byatuma adacika ubutabera.

Me Idahemuka Tharcisse wunganiraga Dr Habumugisha, we yavuze ko kugeza ubu nta kimenyetso kigaragaza ko uwo yunganira yakubise Diane ndetse nta kimenyetso cyo kwa muganga kibigaragaza, ko akwiye kurekurwa.

Mu minsi ishize nibwo Kamali Diane yanditse kuri Twitter ubutumwa buherekejwe n’amashusho yafashwe na camera yo mu nyubako, avuga ko Dr. Habumugisha yamukubitiye mu ruhame, abimenyesha Urwego rw’Ubugenzacyaha, RIB, ariko ngo “hashize amezi abiri atarahanwa”.

Ubwo Dr Francis yagezwaga mu rukiko aburana ku ifungwa n'ifungurwa ry'agateganyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza