Dr Binagwaho yavuze ku kwikubira urukingo rwa Covid-19 biri gukorwa n’ibihugu bikize

Yanditswe na Ndahayo Emmanuel
Kuya 14 Ukuboza 2020 saa 01:54
Yasuwe :
0 0

Nyuma y’igihe kijya kugera ku mwaka Coronavirus imaze iyogoza abatuye Isi, mu minsi ishize hatangajwe inkuru nziza y’uko inganda zirimo Pfizer na BioNTech zamaze kuvumbura urukingo rushobora kurinda umuntu ku kigero kiri hejuru ya 90%, bityo ko zifite ubushobozi bwo kurandura icyorezo cya Coronavirus cyashegeshe Isi mu buryo bukomeye cyane.

Iyi nkuru nziza yari imaze igihe yiteguwe ndetse harashyizweho ihuriro ryiswe Covax rigamije gukwirakwiza inkingo za Coronavirus mu buryo bungana.

Iri huriro ririmo ibihugu 186, birimo 94 byishoboye ndetse bizanigurira inkingo zabyo ndetse n’ibindi 92 bitishoboye, bikeneye ubufasha mu mizo ya mbere kugira ngo na byo bitazasigara inyuma mu guhangana na Coronavirus.

Dr Agnes Binagwaho wigeze kuba Minisitiri w’Ubuzima mu Rwanda na Kedest Matheos uri mu buyobozi bwa Kaminuza ya Global Health Equity banyujije ibitekerezo byabo ku rubuga rw’Ikigo gishinzwe ibijyanye n’Ububanyi n’Amahanga muri Australie.

Bagaragaje impungenge z’uko intego ya Covax ishobora kutagerwaho, bitewe n’imico yo kwikubira kw’inkingo kuri kugaragara mu bihugu bikize, ari na byo bifite amahirwe yo kugira inganda zishobora gukora izo nkingo.

Ibihugu nk’u Budage bizwiho kuba byarasabye inganda zabyo zikora imiti n’inkingo kwanga ishoramari riturutse mu bindi bihugu rigamije kubafasha mu bushakashatsi bwo gukora urukingo rwa Coronavirus.

Iki gihugu kandi cyanaguze imigabane ingana na 23% mu ruganda CureVac, bigakweka ko ari ukugira ngo igihe uru ruganda ruzaba rumaze kubona urukingo rwa Coronavirus, u Budage buzagene ikoreshwa ryarwo nk’umwe mu banyamigabane banini.

Imigirire nk’iyi, kimwe n’indi yaranze ibihugu bikize mu kwikubira ibikoresho by’ingenzi mu rugamba rwo guhangana na Coronavirus birimo udupfukamunwa n’ibindi bikenerwa cyane n’abaganga, ni yo ikomeje gutera impungenge, kuko iki cyorezo kidahagurukiwe icya rimwe, gishobora n’ubundi kudacika ku Isi hose burundu.

Uku kwikubira kw’ibihugu kandi kunagaragarira mu kugenda biguru ntege mu rugendo rushyigikira Covax. Nk’ubu iri huriro rikeneye miliyari 7$ kugira ngo rizabashe guha ibihugu bikennye inkingo zishobora gukingira nibura 20% by’ababituye mbere y’uko umwaka wa 2021 urangira.

Muri aya mafaranga, amaze kuboneka ni miliyari 2$, bivuze ko hari icyuho cya miliyari 5$, kandi igihe cyo gutanga inkingo kikaba cyegereje.

Ku rundi ruhande, ibihugu nka Leta Zunze Ubumwe za Amerika n’u Burusiya, bisanzwe biri mu bihugu bifite ubukungu bukomeye ku Isi, byanze kwinjira muri iri huriro, nyamara ari yo mizero y’urukingo ku bihugu bikiri mu nzira y’iterambere.

Nta gikozwe, Dr Binagwaho na mugenzi we bemeza ko Isi ishobora kugira ingorane nk’izo yagize ihangana n’icyorezo cy’ubushita. Iki cyorezo cyaradutse ku mugabane wa Afurika mu mwaka ushize, nyamara cyari kimaze imyaka irenga 25 kiranduwe ahandi ku Isi.

Aba bahanga bavuga ko mu gihe Isi nta gikozwe, icyorezo cya Coronavirus kitazashiraho mu gihe kimwe, ibi kandi bikazatuma gikomeza gukwirakwira, cyangwa se kikazahaza abaturage mu gice kimwe mu gihe ahandi cyarandutse.

Dr Binagwaho yagaragaje ko nta gikozwe, hari ibice bimwe bishobora kuzazahazwa na Covid-19 mu gihe ibindi bizaba bitekanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .