Dosiye y’abaregwa iterabwoba 18 barimo Rusesabagina yashyikirijwe Urukiko Rukuru

Yanditswe na Philbert Girinema
Kuya 16 Ugushyingo 2020 saa 08:56
Yasuwe :
0 0

Ubushinjacyaha Bukuru bwatangaje ko dosiye ya Rusesabagina n’iy’abandi 18 bari mu Mutwe wa MRCD-FLN, bakurikiranyweho ibyaha birimo iterabwoba, ubwicanyi, gushimuta no gutwikira abantu yaregewe Urukiko Rukuru.

Aba 18 barimo Rusesabagina Paul wari Umuyobozi Mukuru wa FLN n’abandi bari abarwanyi b’uyu mutwe bagabye ibitero mu bice bya Nyabimata n’ahandi mu Ntara y’Amajyepfo.

Nsabimana Callixte uzwi nka Sankara wari Umuvugizi wayo na Nsengimana Herman wamusimbuye ubwo yari amaze gutabwa muri yombi bo bari basanzwe barashyikirijwe urukiko ndetse bari no kuburana.

Mu Ukwakira Ubushinjacyaha bwari bwatangaje ko bwifuza ko dosiye z’aba bose zahuzwa kuko ibyo bakurikiranyweho bifitanye isano.

Mu butumwa bwashyize ku rukuta rwa Twitter ku mugoroba wo kuri uyu wa Mbere bugira buti “Uyu munsi Ubushinjacyaha bwaregeye mu mizi Urukiko Rukuru, dosiye iregwamo abantu 18 bari mu Mutwe MRCD-FLN, bakurikiranyweho ibyaha birimo iterabwoba, ubwicanyi, gushimuta no gutwikira abantu.”

Paul Rusesabagina aregwa ibyaha bitandukanye birimo iterabwoba, gutera inkunga imitwe y’iterabwoba, gushyira abana mu mitwe yitwara gisirikare, gushimuta, gutwika no kurema imitwe y’iterabwoba.

Ni ibyaha bijyanye n’umwanya w’ubuyobozi yari afite mu mutwe witwara gisirikare witwa MRCD/FLN.

Mu bari muri iyi dosiye hari abandi basirikare bawo nka Nsanzubukire Félicien (uzwi nka Fred Irakiza), Anastase Munyaneza na Ndagijimana Jean-Chrétien (umwana w’uwahoze ayobora FLN, Laurent Ndagijimana wari uzwi nka Wilson Irategeka).

Umushinjacyaha Mukuru, Havugiyaremye Aimable, yari aherutse gutangaza ko bifuza ko dosiye z’aba bose zazahuzwa ubwo zaba zigeze mu rukiko kuko bisanzwe bikorwa kandi biteganywa n’amategeko.

Ati “Bisanzwe bikorwa kandi biteganywa n’amategeko. Iyo abantu baregwa ibyaha bimwe bakoreye ahantu hamwe igihe kimwe, biba ari mu nyungu z’ubutabera ko baburanishirizwa hamwe.”

Paul Rusesabagina wari ukuriye aba bose mu mpera za Kanama nibwo yatawe muri yombi, urukiko ruherutse kwemeza ko akomeza gufungwa by’agateganyo mu gihe iperereza rikomeje ku byaha akekwaho.

Mu mpera za Nzeri yemereye urukiko ari ari umwe mu bashinze Umutwe wa FLN, ndetse ko wakoze ibyaha ku butaka bw’u Rwanda binyuze mu bitero wagabye, nubwo ngo atari cyo wari washyiriweho.

Ubwo yitabaga Urukiko Rwisumbuye rwa Nyarugenge tariki ya 25 Nzeri kugira ngo rutangire kuburanisha ubujurire bwe ku mwanzuro w’Urukiko rw’Ibanze rwa Kicukiro w’uko afungwa iminsi 30 y’agateganyo, yemeye ko uyu mutwe wakoze ibyaha kandi ko ariwe wawushinze.

Ati “Nk’uko nabivuze, FLN ntabwo twayikoze nk’umutwe w’iterabwoba ahubwo yari uburyo nk’impunzi ziri hanze, twashakaga kwereka Umuryango Mpuzamahanga na Leta y’u Rwanda ko hari impunzi zibagiranye, zateshejwe agaciro, ziba mu Nkambi za Zambia, Malawi, ziri kuzerera hirya no hino, kugira ngo zitekerezweho (attirer l’attention)."

“Ntabwo umugambi wa FLN wari iterabwoba, ahubwo kwari ukureshya ngo imiryango mpuzamahanga imenye ko abo bose ari imbabare.”

Yakomeje avuga ko yemera ko uyu mutwe wakoze ibyaha ku butaka bw’u Rwanda. Ati “Ntabwo mpakana ko ibyo FLN yakoze ari ibyaha. Ni na zimwe mu mpamvu zatumye twe MRDC dutandukana na CNRD/FLN. MRDC igasigara ukwayo ikozwe na RRM, RDI Rwanda Rwiza na PDR.”

Umutwe wa FLN wari uwa gisirikare ushamikiye ku Mpuzamashyaka yitwa MRCD yari irimo Ishyaka PDR Ihumure rya Rusesabagina, RDI Rwanda Rwiza rya Twagiramungu Faustin, RRM rya Nsabimana Callixte na CNRD ya Gen Irategeka Wilson.

Wagabye ibitero mu Ntara y’Amajyepfo ku matariki atandukanye nko ku ya 3 Kamena, 19 Kamena, 1 Nyakanga, 13 Nyakanga na 15 Ugushyingo mu 2018 byahitanye inzirakarengane, imitungo y’abaturage igasahurwa, abandi bagafatwa bugwate n’ibindi.

Urugero ni nka tariki ya 15 Ukuboza 2018 ubwo abarwanyi b’uyu mutwe bishe abaturage batandatu, abandi 19 bagakomereka. Icyo gihe mu bapfuye harimo Mutesi Diane, Niwenshuti Isaac, Atete Sine Ornella, Mukabahizi Hiralie, Samuel Ntiziryayo na Niyomugabo Jeannine.

Mbere yaho abarwanyi b’uyu mutwe mu ijoro ryo ku wa Kabiri tariki ya 19 Kamena 2018 bagabye igitero ku Biro by’Umurenge wa Nyabimata, bakomeretsa Umunyamabanga Nshingwabikorwa w’Umurenge batwika n’imodoka ye.

Muri icyo gitero bishe uwitwa Munyaneza Fidèle wari Perezida wa Njyanama y’Umurenge wa Nyabimata, uwitwa Maniriho Anathole wari ushinzwe amasomo ku Rwunge rw’Amashuri rwa Nyabimata n’uwitwa Habimana Joseph.

Inkuru bifitanye isano:

Imyirondoro y’inzirakarengane z’ibikorwa bya FLN na Rusesabagina

Hasigaye mbarwa, utarapfa yarafashwe: Ibyo wamenya ku bari mu mugambi umwe na Rusesabagina muri FLN

Rusesabagina yemereye urukiko ko yagize uruhare mu ishingwa rya FLN

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .