Depite Ngabitsinze yasabiye abakozi ba RCA bakoze amakosa guhagarikwa

Yanditswe na Evariste Nsengimana
Kuya 20 Nzeri 2019 saa 08:00
Yasuwe :
0 0

Perezida wa Komisiyo ishinzwe gukurikirana imikoreshereze y’umutungo wa Leta mu Nteko Ishinga Amategeko (PAC), Dr. Ngabitsinze Jean Chrysostome, yavuze ko bitumvikana ukuntu abayobora Ikigo cy’Igihugu gishinzwe guteza imbere Amakoperative, RCA, bashyira abakozi mu kazi nta matangazo bagatangiye.

Babigarutseho kuri uyu wa 18 Nzeri 2019 ubwo ubuyobozi bwa RCA, bwitabaga PAC kugira ngo busobanure amakosa agaragara muri Raporo y’Umugenzuzi Mukuru w’Imari ya Leta y’umwaka wa 2017/18.

Iyo raporo igaragaza amakosa arimo gushyira abakozi mu kazi nta matangazo y’akazi yigeze itangwa, guhemba abakozi miliyoni zisaga 970 Frw mu mushinga wo kwinjiza Sacco mu ikoranabuhanga watwaye miliyari 2.3 Frw ntiwagira icyo ugeraho.

Hari kandi gutanga amasoko ya miliyoni zisaga 700 Frw arimo ayatanzwe inshuro ebyiri, amafaranga miliyoni 40 Frw yishyuwe ku mushinga wapfuye, miliyoni 4 Frw RCA yaciwe z’amande y’imisoro yatinze kwishyura n’ibindi.

Depite Niyorurema Jean René wasomaga amakosa yakozwe yagize ati“Hari ishyirwa mu bikorwa ry’umushinga nta muhuzabikorwa, hashyizweho abakozi nta matangazo y’akazi yatanzwe, amakosa yo gukomeza gushyira abantu mu kazi kandi umushinga uri kurangira.”

Umuyobozi ushinzwe abakozi muri RCA, Museruka Rwigamba Ivan, yavuze ko amatangazo y’akazi yatanzwe ahubwo bayashatse ngo bayashyire muri raporo akabura.

Ati “Ku bijyanye n’abakozi bashyizwe mu myanya ariko amatangazo ntashobore kugaragara muri raporo mu by’ukuri ni amakosa yabaye mu kubona amatangazo twanyujije mu binyamakuru ariko inzira zinyurwamo mu gushyira abakozi mu kazi zarubahirijwe.”

Yakomeje avuga ko nk’ishami rishinzwe abakozi ryakabye rifite ayo matangazo ariko ko ritayabonye igihe cyo gutanga raporo ariko “turizera ko tuyashyatse twayabona.”

Perezida wa PAC, Dr. Ngabitsinze Jean Chrysostome, yavuze ko ubwo bwaba ari uburangare bukabije bwo kubura amatangazo watanze y’akazi kuko nubwo wajya mu binyamakuru wayatanzemo bitabura kuyaguha.

Umugenzuzi Mukuru w’Imari ya Leta, Obadiah Biraro, yavuze ko ayo makosa arambiranye, abaza Dr Ngabitsinze igihe atekereza ko azarangirira.

Dr. Ngabitsinze yasubije ati “Ntabwo nzi igihe bizarangirira, icyo nzi ni uko iyo ibintu bidahindutse hahinduka ababikora nibwo buryo buzima kandi sinshidikanye ko bitahinduka kuko niba ushobora kubura aho watangiye akazi ushobora no kuzabura igihugu kandi barakigushinze.”

Dr Ngabitsinze yasabye ubuyobozi bwa RCA guhagurikira abakoze ayo makosa bakayahanirwa kuko ayo bita mato ariyo asubiza inyuma ibigo.

Depite Ngabitsinze yavuze ko umuyobozi ubura aho yabitse amatangazo y'akazi ntaho yaganisha igihugu
Depite Niyorurema wabazaga ibibazo ku makosa yakozwe na RCA
Umuyobozi Mukuru wa RCA, Prof Harerimana Jean Bosco ubwo yatangaga ibisobanuro
Abayobozi bayobora n'abayoboye RCA ubwo bitabaga PAC

Amafoto: Dushimimana Ami Pacifique

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza