00:00:00 IGIHE NETWORK KN KINYARWANDA EN ENGLISH FR FRANCAIS

Depite Mukabalisa yagiranye ibiganiro na Ambasaderi w’u Bushinwa mu Rwanda (Amafoto)

Yanditswe na Akayezu Jean de Dieu
Kuya 10 Mutarama 2023 saa 06:00
Yasuwe :

Ambasaderi w’u Bushinwa mu Rwanda, Wang Xuekun yavuze ko umubano w’ibihugu byombi uzakomeza gutezwa imbere hibandwa cyane ku bufatanye mu mishinga igamije guteza imbere abaturage.

Ni ibyo yatangaje mu kiganiro yagiranye n’itangazamakuru kuri uyu wa 10 Mutarama 2023, ubwo yari amaze kwakirwa na Perezida w’Umutwe w’Abadepite mu Nteko Ishinga Amategeko, Mukabalisa Donatille.

Ambasaderi Wang yari kumwe n’Umunyamabanga wa Mbere muri Ambasade y’u Bushinwa mu Rwanda, Zhang Xiaohong ndetse n’Umujyanama wa Ambasaderi, Sun Chenguang.

Ni mu gihe ku ruhande rwa Mukabalisa we yari aherekejwe na ba Visi Perezida w’Umutwe w’Abadepite, Sheikh Harerimana Mussa Fazil na Mukabagwiza Edda.

Umubano w’u Rwanda n’u Bushinwa umaze igihe kirekire ushingiye ku bufatanye, ubwubahane no gushyigikirana. Mu Ugushyingo 2021, nibwo hizihijwe imyaka 50 y’umubano mwiza n’ubufatanye bw’impande zombi.

Ibihugu byombi bifatanya mu mishinga y’ishoramari, ibikorwaremezo, ikoranabuhanga, ubucukuzi bw’amabuye y’agaciro, ubwikorezi bwo mu kirere, uburezi, kubaka ubushobozi, ubuzima, ubucuruzi, ubukerarugendo, ubuhinzi, umutekano n’indi iteza u Rwanda imbere.

Ambasaderi Wang yavuze ko ubwo bufatanye buri mu byo yaganiriye na Perezida w’Umutwe w’Abadepite, hibandwa ku kureba icyakorwa ngo umubano urusheho gutezwa imbere no kwaguka.

Ati “Twaganiriye ku mubano w’u Bushinwa n’u Rwanda, twifuza gukorana mu guteza imbere ubutwererane n’ubufatanye hagati y’ibihugu byacu, byose bigakorwa mu nyungu z’abaturage bacu. Hari imishinga myinshi iri guteganywa mu guteza imbere iterambere ry’abaturage bacu.”

Yakomeje agira ati “Dusanzwe dukorana mu burezi, ubuzima, ubuhinzi, ibijyanye no guhanahana abakozi cyangwa ubumenyi n’ibindi. Twishimira kuba mu bafatanya n’u Rwanda mu guteza imbere Abanyarwanda.’’

Ambasaderi Wang yavuze ko ubu butwererane n’ubufatanye bwakomeje kuranga impande zombi buzakomeza kubaho kugira ngo hatezwe imbere abaturage b’ibihugu by’u Bushinwa n’u Rwanda.

Inteko zishinga amategeko z’ibihugu byombi kandi zifitanye imikoranire myiza cyane ko mu 2016, uwari Perezida w’Inteko Ishinga Amategeko y’u Bushinwa, Zhang Dejiang, yagiriye uruzinduko i Kigali.

Mukabalisa yavuze ko “Hari ahantu hatandukanye duhurira nk’abagize inteko zishinga amategeko, hari byinshi cyane, abagize inteko ishinga amategeko y’u Bushinwa bagiye basura u Rwanda mu bihe bitandukanye natwe abacu bakajyayo kugira ngo twigiraneho muri za nshingano zacu zo gushyiraho amategeko, kumenya no kugenzura ibikorwa bya guverinoma.’’

Yakomeje agira ati “Umubano w’impande zombi ugenda utanga umusaruro ugira uruhare mu iterambere ry’abaturage. Hari imishinga itandukanye mu buhinzi, ubuzima, uburezi, ikoranabuhanga, ubucuruzi n’ishoramari kandi bakaba bari mu bihugu bishora imari mu gihugu cyacu.’’

U Bushinwa busanzwe ari umufatanyabikorwa w’u Rwanda mu nzego zitandukanye ahanini zirimo inganda n’ibijyanye n’ibikorwaremezo.

Mu 2020, u Bushinwa bwohereje mu Rwanda ibicuruzwa bifite agaciro ka miliyoni 282$ mu gihe ibyo u Rwanda rwoherejeyo bingana na miliyoni 38,7$.

Ishoramari ryabwo ryageze kuri miliyoni 23,16$ rivuye kuri miliyoni 17$ yo mu 2019. Imibare yo mu 2020 yerekana ko muri uwo mwaka ingano y’ibikorwa byashibutse ku ishoramari ry’u Bushinwa ringana na miliyoni 191$.

Mu bijyanye n’ibikorwaremezo, u Bushinwa ni bwo bwatanze inkunga nini mu kubaka imihanda myinshi mu Rwanda; bwafashije igihugu mu iyubakwa ry’ingana na 70% by’iyo gifite.

Visi Perezida w'Inteko Ishinga Amategeko ushinzwe imari n'abakozi, Sheikh Musa Fazil Harelimana aeamutsa Ambasaderi w'u Bushinwa mu Rwanda
Visi Perezida w'Inteko Ishinga Amategeko ushinzwe amategeko no kugenzura ibikorwa bya guverinoma, Depite Mukabagwiza Edda aramutsa Ambasade w'u Bushinwa mu Rwanda
Impande zombi zagiranye ibiganiro
Bafashe ifoto y'urwibutso
Ambasaderi Wang yahawe impano na Perezida w'Umutwe w'Abadepite, Mukabalisa Donatille
Perezida w'Umutwe w'Abadepite , Mukabalisa Donatille yashimye umubano ukomeje kuranga ibihugu byombi

Amafoto: Irakiza Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .