Croix Rouge Rwanda yatangije uburyo bwo gufasha abahuye n’ibiza hifashishijwe Mobile Money

Yanditswe na Hakizimana Jean Paul
Kuya 22 Kanama 2019 saa 10:18
Yasuwe :
0 0

Umuryango utabara imbabare Croix Rouge Rwanda wakoze umwitozo wo gufasha imiryango yahuye n’ingaruka z’ibiza mu buryo bushya ubaha amafaranga kuri Mobile Money bakigurira ibintu runaka bakeneye aho kubaha ibiringiti, amasafuriya n’ibindi.

Ni igikorwa cyabereye mu Karere ka Kayonza mu Murenge wa Rwinkwavu mu Kagari ka Gihinga, ahatoranyijwe abaturage 100 baheruka kugirwaho ingaruka z’ibiza maze hategurwa abakozi ba Croix Rouge babegereye bakababarura nyuma bakabaha amafaranga kuri Mobile Money cyangwa impapuro mpamyafaranga ( voucher)

Aba baturage 100 batoranyijwe buri umwe yahawe amafaranga 33 720 kugira ngo bayakoreshe mu buryo runaka bifuza bitandukanye n’inkunga uyu muryango wajyaga uha abaturage bahuye n’ingaruka z’ibiza, aho watangaga ibikoresho bitandukanye nyamara ngo hari igihe bahaga umuturage ibintu asanganywe.

Umurisa Florence ushinzwe gufasha abahuye n’ibiza muri Croix Rouge y’u Rwanda, avuga ko bamaze iminsi itatu muri uyu mwitozo, aho batoranyije abaturage bahuye n’ingaruka z’ibiza bakagerageza kubaha amafaranga kugira ngo buri wese agure ibyo akeneye ku giti cye.

Akomeza agira ati “ Ubusanzwe twafashaga abantu dukoresheje ibintu runaka birimo ibyo kurya n’ibindi ariko muri iki gihe turimo gukoresha uburyo bw’amafaranga kuko twasanze ari bwo buha umuntu amahitamo yo kugura icyo akeneye ndetse twanasanze bunahendutse kuko ubusanzwe iyo twagiye ku isoko dushyiramo n’ibindi bintu byinshi birimo imodoka itwara ibikoresho n’andi mafaranga menshi ajya ku bandi bantu batari abagenerwabikorwa.”

Umurisa yakomeje avuga ko nubwo hagiye kujya hakoreshwa ubu buryo cyane ngo n’ubusanzwe ntabwo bazareka kubukoresha ahubwo bazajya babanza babaze abaturage icyaborohera abe aricyo bakora.

Umunyamabanga Nshingwabikorwa w’Umurenge wa Rwinkwavu, Bizimana Claude yavuze ko muri uyu murenge bakunda kwibasirwa n’ibiza bibiri harimo ikijyanye n’imvura nyinshi ivanze n’umuyaga bikunze gusiga byangije ingo nyinshi, icya kabiri ngo ni icyiza cy’izuba aho riva ari ryinshi rikabuza abaturage kweza.

Yakomeje avuga ko nko muri Mata uyu mwaka mu tugari tubiri twa Gihinga na Mbarara hasenyutse inzu 46 bitewe n’imvura nyinshi irimo umuyaga yaguye, agasanga ubufasha bw’amafaranga ku baturage ari ingirakamaro kuko buzajya butuma bihitiramo ibyo bagura byabagirira umumaro.

Ati “Ityo ibyo biza byabaga bazanaga ibirangiti, amasafuriya n’ibindi byinshi byoroheje gusa hari igihe wasangaga bidakenewe cyane none uyu munsi yatangiye guha abaturage amafaranga bo bakigurira ibyo bakeneye bitewe n’ibyangiritse, turabishima cyane kandi aya mafaranga ashobora gufasha abaturage mu kongera kwiyubaka.”

Abaturage basaga 100 bahawe inkunga y’amafaranga hifashishijwe uburyo bwa Mobile Money basazwe n’ibyishimo bavuga imyato Croix Rouge.

Ngufuyaleta Celestin yagize ati “ Imvura yaguye muri Mata yasize inyangirije cyane, yansenyeye inzu yangiza imyaka yanjye, hakurikiraho izuba ryo mu mpeshyi naryo ritatworoheye, ubu rero turashima cyane Croix Rouge y’u Rwanda kubufasha iduhaye. Aya mafaranga ndaje nyashore mu bucuruzi ncuruze ibitoki anteze imbere.”

Mukanyabyenda Pascasie utuye mu Kagari ka Gihinga yagize ati “ Ndashimira cyane Croix Rouge ku bufasha bw’amafaranga iduhaye, ubusanzwe bajyaga baduha ibikoresho rimwe na rimwe bakaguha n’ibyo ufite, ariko kuduha gutya amafaranga bituma ujya kugura ikintu runaka ukeneye cyane Imana ibahe umugisha.”

Uyu mwitozo w’iminsi itatu ngo uzakomereza mu turere twa Rubavu na Nyarugenge ahitezwe gukomeza gufasha abandi baturage bahuye n’ingaruka z’ibiza, Iki gikorwa kikaba giterwa inkunga na Croix Rouge yo mu gihugu cy’u Bubiligi.

Claire Deschamps wari uhagarariye Croix Rouge y'u Bubiligi yanatanze inkunga yo gufasha abaturage bahuye n'ibiza yashimiye ubuyobozi bwa Croix Rwanda abwizeza ubufatanye mu byo bakora byose
Mukandayisenga Francise w'imyaka 49 ufite abana batanu yasazwe n'ibyishimo ubwo yari amaze kubikuza amafaranga ibihumbi 32 700 Frw
Mukandayisenga ubwo yari amaze kwakira ubutumwa bugufi bwerekana ko ahawe amafaranga
Muri uyu mwitozo abaturage bahuye n'ingaruka z'ibiza babanza kubazwa ibibazo bakabona guhabwa amafaranga hakoreshejwe Mobile Money
Nyuma yo guhabwa amafaranga yahise ajya kugura amabati ngo asakare inzu ye
Nyuma yo kubona amafaranga Mukandayisenga yagiye kugura amabase n'akawunga ngo ashyire abana be
Ubwo yamaraga kubikuza yasazwe n'ibyishimo
Umurisa Florence yavuze ko ubu buryo buzajya bwifashishwa mu gihe abaturage babuhisemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza