CP Kabera yavuze ku bapolisi bafunzwe bazira gukoresha ingufu z’umurengera n’abirukanwa ku bw’imyitwarire mibi

Yanditswe na Philbert Girinema
Kuya 7 Nzeri 2020 saa 09:18
Yasuwe :
0 0

Umuvugizi wa Polisi, CP John Bosco Kabera, yatangaje ko hari abapolisi bari gukurikiranwa ku bwo gukoresha imbaraga z’umurengera mu iyubahirizwa ry’amategeko, barimo nk’uwarashe abaturage mu Karere ka Nyanza hamwe n’undi wakubise umuturage bikaza kumuviramo urupfu.

Bitangajwe mu gihe hashize iminsi hari ubwiganze bw’amajwi y’abantu banenga abapolisi bamwe mu iyubahirizwa ry’amategeko, barengera bagakoresha ingufu kugeza nubwo barasa abaturage cyangwa bakabahohotera mu bundi buryo.

Perezida Kagame mu kiganiro yagiranye na RBA kuri iki Cyumweru, yavuze ko iki kibazo cy’aba bapolisi yacyumvise, ndetse ko yatanze amabwiriza ku buyobozi bukuru bwa Polisi ko gikwiriye gushakirwa umuti, kigacika burundu.

CP John Bosco Kabera yatangaje ko bidakwiriye ko Umupolisi akoresha ingufu z’umurengera, ndetse ko Polisi igiye gushyira imbaraga mu kumenyesha abanyarwanda uko bene abo barenga ku mategeko bakurikiranwa.

Yatanze ingero ku bapolisi barimo uwarashe abaturage mu Karere ka Nyanza n’uwakubise umuturage i Rwamagana akitaba Imana, aho bose ko bari gukurikiranwa n’inkiko.

Ati “Ubu umukoro dufite ukomeye cyane twahawe, ni ukugaragaza uburyo abantu bakurikiranwa. Ngira ngo ni cyo kintu abantu bibaza. Ubu rero nubwo n’uwo mupolisi umwe adakwiriye kuba yabikora, imbaraga zizashyirwa mu buryo nta n’ukwiriye kugaragara muri iki kibazo cyo gukoresha ingufu z’umurengera, ariko noneho imbaraga zigiye kujya, iyo umupolisi akoze icyaha bigaragara ko yakoresheje ingufu z’umurengera, bimenyekanishwa bite mu banyarwanda?”

“Nk’umupolisi iyi COVID-19 igitangira mu kwezi kwa gatatu warashe abantu i Nyanza bari kuri moto, nk’uwo mupolisi yarafunzwe, arakurikiranwa mu nkiko. Ari muri gereza, ariko abantu ntibazi uko byagenze. Baheruka havugwa ko byabaye ariko ntibazi icyakurikiye.”

Ku mupolisi uherutse gukubita umuturage mu Karere ka Rwamagana i Karenge bikaza kumuviramo urupfu aguye mu bitaro nawe ngo ari mu nkiko ari kuburana, kimwe n’undi uherutse kurasa umuturage ahitwa i Zaza muri Ngoma uri gukorwaho iperereza.

Ati “Kugira ngo bijye kugaragara ko wakoresheje ingufu z’umurengera, bigomba kugaragazwa n’iperereza. Ese ubundi wakoraga iki? Wakabaye wakoze iki mu bihe wisanzemo n’aho wagiye gukorera mu kazi?”

Yakomeje avuga ko usibye guhana mu rwego rw’amategeko, abapolisi bahabwa ibihano mu buryo bw’imyitwarire ku wabwiye nabi umuturage, ku wakanze umuturage, ku wamuhaye serivisi mbi, ku wanze kumutabara kandi yamutabaje n’ibindi.

Ati “Ibyo nabyo bibera mu rwego rw’imyitwarire mu mategeko agenga polisi, ari naho hava n’abapolisi benshi birukanwa mu gipolisi. Murabizi ko buri mwaka dusohora urutonde, bimenyekana bite? [...] no kudaha umuturage serivisi birahanirwa. Ubwo rero dufite umukoro w’uburyo tugaragaza ibyo bintu kugira ngo bumve mu by’ukuri ko n’icyo cyizere impamvu bari bafite kigomba gukomeza.”

Polisi igiye kujya itangaza icyatumye abapolisi runaka birukanwa

Polisi y’u Rwanda iheruka kwirukana abapolisi 56 bo ku rwego rwa ofisiye, aho urutonde rwabo rugaragaraho ba Ofisiye Bakuru batatu n’umwe wari ku cyiciro cy’abakomiseri muri Polisi y’u Rwanda.

Umugereka w’Iteka rya Perezida ryo ku wa 17/08/2020 ryirukana burundu ba Ofisiye muri Polisi y’u Rwanda, ugaragaraho Assistant Commissioner of Police (ACP) Mutsinzi Eric, na ba Senior Superintendent of Police (SSP) batatu, SSP Vuningoma Alex, SSP Kabanda Emmanuel na Kamali Celestin, nk’abafite ipeti rikuru.

ACP Eric Mutsinzi yari amaze igihe muri Polisi, ndetse yabaye Umuyobozi wa Polisi mu Ntara y’Amajyaruguru, yanayoboye Batayo y’abapolisi b’ u Rwanda bagiye mu butumwa bw’amahoro muri Sudani y’Epfo mu 2016.

Ni mu gihe SSP Kabanda yabaye Umuvugizi wa Polisi mu Ishami rishinzwe umutekano wo mu muhanda. Muri Mutarama 2019 yari mu itsinda ry’abapolisi 140 berekeje mu butumwa bw’amahoro bw’Umuryango w’Abibumbye muri Repubulika ya Centrafrique (MINUSCA), yambaye ipeti rya Chief Superintendent of Police.

Mu birukanwe kandi ba Chief Inspector of Police (CIP) icyenda, ba Inspector of Police (IP) 20 na Assistant Inspector of Police (AIP) 23.

Ntabwo higeze hatangazwa impamvu zatumye abo bapolisi birukanwa, ari nacyo CP Kabera asanga gikwiriye gushyirwamo ingufu mu buryo bufatika.

Ati “Runaka uyu wagiye yakoze iki? Ariko noneho bigahera bikiba kugira ngo n’undi muntu wababajwe n’icyakozwe cyangwa n’icyamukorewe, erega n’icyakorewe polisi, ugira ngo umupolisi wakoze iryo kosa iryo ariryo ryose ntaba yangije isura ya polisi? Wagira ngo umupolisi wakoresheje ingufu z’umurengera ntaba yangije isura ya polisi, byitirirwa polisi kandi ari umuntu ku giti cye.”

“Ubuyobozi bwa polisi ntabwo bwamutuma gukoresha izo ngufu, kwica umuntu, kuba atatabara umuntu, kuba yamubwira nabi [...] ni ukubitangariza abanyarwanda kugira ngo n’uwahohotewe cyangwa uwagize ikibazo, bimugaragarire yumve ko yarenganuwe.”

CP Kabera yavuze ko abantu bakwiriye kumvira amategeko, bakirinda kurwanya abapolisi, ndetse umupolisi nawe akwiriye kwirinda kurakara nubwo umuturage yamurakaza, akirinda gukoresha imbunda ahubwo akitabaza bagenzi be kuko iyo ayikoresheje bimugiraho ingaruka bikanangiza isura ya polisi.

Ku muturage wumva ko yahohotewe n’umupolisi, uwo asabwa kwitabaza Ishami rishinzwe ubugenzuzi bw’imikorere ya Polisi rikamurenganura.

Ati “Abaturage ni ukubasaba, abenshi barabyumva. Niba umupolisi agusanze yubahiriza amabwiriza, akaguha amabwiriza, ukwiye kuyubahiriza. Wakumva wahohotewe ukaba wakwisunga polisi [...] nta muturage ukwiriye kurwanya polisi, no kugerageza kuyirwanya, ibyo ntabwo byemewe.”

“Niba wafashwe, ukekwaho icyaha, ufunze, ukwiye kumva ko ugomba kurangiza igihano cyawe, cyangwa ukwiye kumva ko ugomba gutegereza inkiko, ubutabera, aho kugerageza gutoroka. Hari n’abantu bashaka gutoroka bari mu nkiko, iyo ni imico mibi, ntabwo byemewe.”

CP Kabera avuga ko Polisi ifite inzego zayo zishobora guhana umupolisi ariko iyo hari uhawe igihano kirengeje amezi atandatu, ahita yirukanwa burundu.

Amakosa ahanishwa kwirukanwa muri Polisi y’u Rwanda arimo guta akazi mu gihe kirenze iminsi cumi n’itanu, kugurisha ibikoresho by’akazi n’ibyafatiriwe; gutunga ibikoresho bishobora kwaka cyangwa guturika bigamije guhungabanya umutekano cyangwa ugaragarwaho imyifatire iteye amakenga ko yakiriye ruswa ubwe cyangwa binyujijwe ku wundi n’iyo Inkiko zaba zitarafata ibyemezo byazo n’andi.

Umuvugizi wa Polisi, CP John Bosco Kabera, yatangaje ko nta mupolisi n'umwe ukwiriye guhohotera umuturage, ndetse ko n'uwo bigaragayeho abihanirwa

Inkuru bifitanye isano:

- Perezida Kagame yijeje ko ikibazo cy’abapolisi bakoresha imbaraga z’umurengera mu kubahiriza amategeko kigiye gucika


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .