00:00:00 IGIHE NETWORK KN KINYARWANDA EN ENGLISH FR FRANCAIS

Covid-19: Uko kwigira mu rugo byabaye umusemburo wo gutuma abanyeshuri badata ishuri

Yanditswe na IGIHE
Kuya 27 May 2022 saa 07:59
Yasuwe :

Icyorezo cya Covid-19 cyahungabanyije inzego z’ubuzima bw’igihugu harimo n’uburezi kuko amashuri ari mu byafunzwe rugikubita aho byasabye ko hatekerezwa uburyo abanyeshuri bakomeza kwihugura igihe bari mu ngo.

Igisubizo cy’iki kibazo cyabonetse binyuze mu mushinga wari ugamije gushyigikira ibikorwa by’uburezi mu gihe cya Covid-19 watewe inkunga n’Umuryango wita ku Bufatanye Mpuzamahanga mu Burezi (Global Partnership for Education/GPE).

Uyu mushinga ni igice cy’inyongera ku mushinga w’Uburezi Bwiza bw’Ibanze usanzwe uterwa inkunga na Banki y’Isi ukaba ari na wo wagize uruhare mu iyubakwa rya kimwe cya kabiri cy’ibyumba by’amashuri birenga ibihumbi 22 u Rwanda rwubatse mu rwego rwo kubagabanya ubucucike n’ingendo ndende abanyeshuri bakoranga bajya cyangwa bava ku ishuri.

Ibikorwa bya GPE byari bigamije kunganira Leta mu guhanga n’ingaruka za COVID19 mu burezi, harimo gufasha mu itegurwa ry’amasomo abanyeshuri bakurikiranye hakoreshejwe Radiyo na televiziyo, kwigira kuri internet binyuze ku rubuga rucishwaho amasomo rwa REB (elearning platform) n’ibindi.

Amasomo 2.996 yafashwe ku buryo bw’amajwi n’amashusho arimo 139 yo kuri radio agenewe abana b’incuke, 401 agenewe abiga mu cyiciro cya mbere cy’amashuri abanza na 462 agenewe abiga mu cyiciro cya kabiri cy’amashuri abanza.

Hari kandi amasomo 1010 ya televiziyo agenewe abiga siyansi n’ikoranabuhanga mu mashuri yisumbuye ndetse na 984 ya radio agenewe abiga ubumenyi rusange mu mashuri nderabarezi nk’uko byatangajwe n’Umuhuzabikorwa w’Ishami ry’Imishinga mu Rwego rw’Igihugu rushinzwe Uburezi bw’Ibanze (REB) , Shyaka Emmanuel.

Ati “Ubona ko byatanze umusaruro ugaragara mu gutuma abana batibagirwa ishuri bikabarinda ibindi birangaza bidafite aho bihuriye n’ishuri.”

Amashuri yafunguwe ubukungu butifashe neza kubera ko ibikorwa byinshi byari byarafunze, bituma abanyeshuri bo mu miryango itishoboye bafashwa kubona ibikoresho bari bakeneye

Nyuma y’amezi umunani amashuri yongeye gufungura ubukungu butifashe neza bitewe n’uko ibikorwa byinshi byari byarakozwe mu nkokora n’ingamba zo kurwanya iki cyorezo.

Ibi byatumaga imiryango imwe n’imwe itabasha kubona ibikenewe byose ngo abanyeshuri babashe gukurikirana amasomo nta nkomyi, birimo amafaranga y’ishuri, umusanzu wo gufatira ifunguro ku ishuri, ibikoresho by’ishuri byagombaga kwiyongeraho n’udupfukamunwa.

Binyuze muri uyu mushinga, Abanyeshuri bagera ku 807.694 bo mu miryango itishoboye mu turere 11 two hirya no hino mu gihugu, bafashijwe gufatira ifunguro ku ishuri banahabwa ibikoresho nkenerwa ubwo amasomo yongeraga gufungura mu ntangiriro z’Ukwakira 2020 nyuma y’amezi umunani yari amaze ahagaritswe kubera ingamba zo kurwanya ikwirakwira ry’ubwandu bwa Covid-19.

Umunyamabanga wa Leta Ushinzwe Amashuri Abanza n’Ayisumbuye muri Minisiteri y’Uburezi, Gaspard Twagirayezu, yavuze ko ifungurwa ry’amashuri ryatangiranye na gahunda yo kugaburira abana ku ishuri mu byiciro byose kubera ko ubushakashatsi bwagaragaje ko iyo umunyeshuri afatiye ifunguro ku ishuri yiga neza kandi agakunda ishuri kandi ko GPE yagize uruhare mu gutuma bishoboka.

Umuhuzabikorwa w’Ishami ry’Imishinga muri Minisiteri y’Uburezi, Nociata Mukamurenzi, yavuze ko abanyeshuri 807.694 biga ku mashuri 979 ari bo bahawe ubufasha muri gahunda yo gufatira ifunguro ku ishuri ituma intego yari iteganyijwe igerwaho 100% ndetse umubare nk’uwo w’abiga ku mashuri 1084 bahawe ibikoresho by’ibanze by’ishuri.

Kayitesi Diane wo ku Rwunge rw’Amashuri rwa Murambi mu Karere ka Rulindo, umwe mu bagezweho n’iyi nkunga yasobanuye uburyo byamufashije gutsinda neza.

Ati “Nanjye nahawe ibikoresho by’ibanze nk’amakayi, amakaramu n’ibindi ndetse banantangira umusanzu kugira ngo njye mfatira ifunguro ku ishuri kuko umuryango wanjye utari ufite ubushobozi buhagije kandi byatumye ntsinda neza.”

Umubyeyi witwa Basabose Emmanuel na we wo mu Karere ka Rulindo, yavuze ko uyu mushinga wamugobotse mu gihe ubukungu bwari bwifashe nabi kubera ingaruka za Covid-19, abana be bahabwa ibikoresho by’ishuri kuko na byo biri mu byakozwe muri uyu mushinga.

Yagize ati “Njye mfite abana batatu kandi bose bahawe ibikoresho ndetse banatangirwa umusanzu muri gahunda yo kugaburira abana ku ishuri. Mu by’ukuri byaradushimishije kuko natwe nk’ababyeyi twagizweho ingaruka na Covid-19 byari bigoye amashuri agitangira.”

“Ibikoresho babahaye n’umusanzu babatangiye kugira ngo babashe kurya ku ishuri waduteye umwete wo gukora iyo bwabaga kugira ngo hatagira usiba ishuri.”

Inkunga yahawe abanyeshuri yafashije n’abarimu gushyira mu bikorwa inshingano zabo za buri munsi nk’uko bisobanurwa na Mujawamariya Clarisse wigisha kuri GS. Murambi.

Yagize ati “Iyi gahunda yo gufasha abana yagize akamaro gakomeye. Burya nta kintu gishishimisha umwarimu nko kubona abanyeshuri bafite ibikoresho bihagije kuko bibafasha gutsinda neza.

Urugero nka gahunda nzamurabushobozi (remedial program) no kugaburira abana ku ishuri zaradufashije cyane kuko hari abana bari barasubiye inyuma ku buryo bugaragara ariko kubera ko twafataga igihe mbere y’uko amasomo atangira tugafasha abo banyeshuri. Mu gihe cy’ukwezi kumwe na bo bari bageze ku rugero rwa bagenzi babo.”

Gahunda yo gutegura amasomo yihariye yari agenewe abana basigaye inyuma yageze ku mashuri 2308. Hanakozwe ubukangurambaga bugamije gusubiza mu ishuri abari bararitaye ku bufatanye bw’ibigo by’amashuri, inzego z’ibanze, komite zihagarariye ababyeyi ndetse n’ababyeyi ubwabo bakangurirwa kugira uruhare mu myigire y’abana babo.

Mukamana Eugenie, umwarimu mu mashuri abanza mu Karere ka Rulindo, yavuze ko iki gikorwa cyatanze umusaruro ufatika.

Ati “Nk’abarezi hari byinshi twakoze dufatanyije n’inzego z’ibanze mu kugarura abana ku ishuri. Twakoze amatsinda tugasura abana mu ngo kubera ko tuba dufite imyirondoro yabo ku buryo twamenyaga neza abazagaruka n’abagifite imbogamizi. Ni ibintu byatanze umusaruro kuko nkanjye nari mfite abana 12 muri 55 batari batangiriye rimwe n’abandi ariko twongeye gusubira kubasura nyuma y’iminsi itatu bose bari bagarutse.”

Muri uyu mushinga hanatanzwe ubutumwa bwo kurwanya ihohoterwa rishingiye ku gitsina no kurwanya by’umwihariko inda ziterwa abangavu.

Mu ngamba z’isuku no guhangana na Covid-19, hubatswe ubukarabiro ku mashuri 1099 harimo atanu yakira impunzi kugira ngo abanyeshuri babashe gukaraba inshuro nyinshi zishoboka.

Ibikorwa byose by’uyu mushinga washyizwe mu bikorwa na Ministeri y’Uburezi n’Urwego rw’Igihugu rushinzwe Uburezi bw’Ibanze (REB), byashowemo agera kuri miliyoni 10 z’amadolari ya Amerika, ni ukuvuga arenga miliyari 10 z’amafaranga y’u Rwanda kandi bikaba byarafashije mu kuhangana n’ingaruka zatewe na covid-19 mu burezi by’umwihariko kugabanya umubare w’abana bata ishuri.

Kwigira kuri internet no kuri radio ni bimwe mu byo uyu mushinga watanzemo inkunga
Abanyeshuri bagejejweho ibikoresho bari bakeneye kugira ngo basubukure amasomo
Abana bo mu miryango itishoboye bafashijwe gufatira ifunguro rya saa sita ku bigo by'amashuri
Ibikorwaremezo bifasha abanyeshuri gukaraba intoki byubatswe mu mashuri yo hirya no hino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .