00:00:00 IGIHE NETWORK KN KINYARWANDA EN ENGLISH FR FRANCAIS

COVID-19: U Rwanda rumaze gukingira 30% by’abarutuye

Yanditswe na Ferdinand Maniraguha
Kuya 8 Ukuboza 2021 saa 01:30
Yasuwe :

Minisiteri y’Ubuzima yatangaje ko 30% by’abaturarwanda bamaze guhabwa doze ebyiri z’urukingo rwa COVID-19, bikaba bitanga icyizere cy’uko umwaka wa 2022 uzarangira hakingiwe 70%.

Byatangajwe kuri uyu wa Gatatu na Minisitiri w’Ubuzima Dr Daniel Ngamije, abinyujije kuri Twitter.

Ngamije yavuze ko iyo ntambwe imaze guterwa ari umusaruro “w’ubuyobozi bwiza, ubufatanye, n’imikoranire myiza y’abaturage n’abayobozi”.

Minisitiri w’Intebe, Dr Edouard Ngirente aherutse kubwira Inteko Ishinga Amategeko ko ubariyemo n’abahawe urukingo rumwe, abaturage 6.065.691 bangana na 46% aribo bamaze gukingirwa.

Ni intambwe yatewe biturutse ku nkingo za COVID-19 zigera kuri 12.900.760 u Rwanda rumaze kubona.

Minisitiri w’Intebe, Dr Ngirente, yavuze ko nyuma yo kwiyemeza gukingira COVID-19 ingimbi n’abangavu bafite imyaka 12-17, abazahabwa urukingo, byatumye umubare w’abo igihugu kigomba gukingira uzamuka, uba 9.063.245.

Ati “Aba bose bazaba bamaze gukingirwa bitarenze Ukuboza 2022 ariko dukurikije imbaraga tubishyiramo dushobora no kubigeraho mbere yaho.’’

Mu Mujyi wa Kigali uhereye ku bafite imyaka 12 kuzamura, abangana na 869.909 [89.2%] bamaze guhabwa dose zombi mu gihe abamaze guhabwa byibura doze ya mbere ari 1.032.499.

Mu zindi ntara enye, muri iki cyiciro, abangana na 2.755.727 [34%] bamaze guhabwa dose zombi mu gihe abahawe imwe ari 5.033.192 [62%].

U Rwanda rukoresha ubwoko bw’inkingo umunani. Kugeza ku wa 2 Ukuboza 2021, rwari rumaze kwakira inkingo 12.900.760 zishobora gukingira abaturage 6.736.220 hatabariwemo urukingo rushimangira (dose ya gatatu).

Gukingira abagurage niyo ntwaro ikomeye mu guhangana n’icyorezo cya COVID-19 kigiye kumara imyaka ibiri gihagaritse ubuzima bw’abatuye Isi, by’umwihariko ibikorwa by’iterambere byari bitunze benshi.

Kugeza ubu 30 % by'abaturarwanda bamaze guhabwa inkingo ebyiri za COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .