COVID-19: Hitezwe ingamba zikomeye mu Nama y’Abaminisitiri iza kwemerezwamo isubikwa ry’Umushyikirano

Yanditswe na Philbert Girinema
Kuya 14 Ukuboza 2020 saa 08:45
Yasuwe :
0 0

Nyuma y’ubwiyongere bukabije bw’ubwandu bw’icyorezo cya Coronavirus, kuri uyu wa Mbere hateganyijwe Inama y’Abaminisitiri idasanzwe yitezwemo gufatirwamo ingamba zikomeye zigamije gukumira ubwiyongere bw’abandura iyi ndwara mu Rwanda.

Mu minsi 13 ishize, mu gihugu hamaze kwandura abantu 678 mu gihe abamaze gupfa bo ari batandatu. Ni umubare munini ugereranyije n’uko ubwandu bwari bumeze mu minsi ishize.

Byitezwe ko Inama y’Abaminisitiri iteganyijwe kuri uyu wa Mbere iza gufata ingamba zigamije gukumira ubwandu bw’iki cyorezo bukomeje gufata indi ntera. Kimwe mu byitezwe harimo nko gufunga ibikorwa bihuza abantu benshi byagaragajwe nk’ibyabaye icyuho cy’icyorezo, restaurant zahindutse utubari n’ibindi.

Byitezwe kandi ko haza gufatwa umwanzuro wa nyuma ku Nama y’Igihugu y’Umushyikirano ishobora gusubikwa. Hari hashize iminsi mike bitangajwe ko iyi nama izabera muri Kigali Convention Centre, ikitabirwa n’abantu 500 aho kuba abarenga ibihumbi bibiri nk’uko byari bisanzwe.

Imyiteguro yayo yari irimbanyije, ndetse guhera kuri uyu wa Mbere kuri wa Mbere kuri Petit Stade i Remera hari hateganyijwe ko abazayitabira batangira gupimwa icyorezo cya Coronavirus.

Mu kiganiro cyatambutse kuri Televiziyo Rwanda ku wa 13 Ukuboza 2020 kigaruka ku ngamba zo gukumira ikwirakwira ry’iki cyorezo, Minisitiri w’Ubuzima, Dr Ngamije Daniel, yatangaje ko mu byumweru bibiri bishize, hagaragaye ubwandu ku kigero giteye inkeke aho nk’umubare w’ubwandu ku wa Gatandatu wageze ku bantu 100, ku Cyumweru nabwo ukaba 131, umubare waherukaga muri Kanama ndetse impfu zikiyongera aho abantu batanu bapfuye mu cyumweru kimwe.

Dr Ngamije yavuze ko abantu barenze ku mabwiriza, bajya mu busabane, guhana intera biribagirana aho nka restaurant zahindutse utubari ku buryo abantu bicara badahanye intera n’ibindi.

Ati “Badohoka ku mabwiriza, nko muri restaurant ugasanga zahindutse utubari, no muri hoteli ugasanga bicaye badahanye intera, kandi bakahamara amasaha menshi.”

Yanavuze ko hari abantu barenga ku mabwiriza yo kwirinda iki cyorezo, bakanakora ingendo bitwaje ibyangombwa by’uko bapimwe COVID-19 bagasanga ari bazima kandi ari ibihimbano, ndetse ngo “hari abagiye bafatwa na polisi bahimbye ibyangombwa ko batanduye, bakagaruka mu gihugu.”

Umuvugizi wa Polisi, CP John Bosco Kabera, we yavuze ko mu mezi icyenda ashize iki cyorezo kigeze mu Rwanda, nta gihe na kimwe cyigeze kibaho ngo usange abantu barenze ku mabwiriza yo kwirinda Covid-19 nk’uko bimeze muri iki gihe.

Ati “Bivuze ko abantu barushijeho kudohoka, kutubahiriza amabwiriza, iki gihe birakomeye nta n’ikindi gihe byigeze bibaho. Biragaragaza ko hari abantu bisabira ibihano, barasaba ko hakwiye gukazwa ingamba kurusha izari zisanzwe. Yaba ari izijyanye n’amasaha y’ingendo n’abantu bitabira ibikorwa bitandukanye, aho bigaragaye ko hari serivisi zirenga ku mabwiriza zikaba zahagarikwa aho bibaye ngombwa.”

Hashize amezi icyenda Coronavirus igeze mu Rwanda, kuva icyo gihe abantu 6659 bamaze kwandura mu gihe 56 bo bapfuye.

Inama y’Umushyikirano ni kimwe mu biza kuganirwaho mu Nama y'Abaminisitiri idasanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .