00:00:00 IGIHE NETWORK KN KINYARWANDA EN ENGLISH FR FRANCAIS

COVID-19: Gukingirira abayobozi mu ruhame mu byatinyuye ab’i Rubavu

Yanditswe na Hakizimana Jean Paul
Kuya 31 Ukuboza 2022 saa 11:25
Yasuwe :

Ubuyobozi bw’inzego z’ubuzima mu Karere ka Rubavu, buravuga ko ibihuha ku rukingo rwa Covid-19 byagiye bituma hari abaturage bamwe na bamwe bahungira hanze y’igihugu urukingo, bukemeza ko ku bufatanye n’inzego z’ibanze ubukangurambaga bwagiye bukorwa buri mu bwagaruye aba baturage.

Kuva icyorezo cya Covid-19 cyaduka, hagiye hatangazwa amakuru y’ibihuha byatumaga bamwe mu baturage bagira imyumvire itandukanye mu kwirinda iki cyorezo.

Ubwo urukingo rwa Covid-19 rwabonekaga hirya no hino ku Isi bwari bumwe mu buryo bwo gukumira ubwandu bushya no kwirinda ko iki cyorezo gikomeza gushegesha benshi, hari bamwe bagiye bakwirakwiza ibihuha ko umuturage ufashe urukingo bimugiraho ingaruka mu mibereho ye y’ahazaza harimo kutabasha gutera akabariro ku bagabo, kurwaragurika bya hato na hato abandi bakavuga ko ari uburozi bwo kwica abantu bwazanywe n’abazungu n’ibindi byinshi bitandukanye.

Bamwe mu baturage bo mu Karere ka Rubavu nk’Akarere kegereye umupaka ndetse kanakunze kugira urujya n’uruza rw’abantu batandukanye babwiye IGIHE ko ibi bihuha hari abo byagiye bibuza kwikingiza gusa ngo uko Leta yongeraga ubukangurambaga byagiye bibatinyura bituma bikingiza.

Ndayambaje Théoneste yagize ati “Ibihuha byarazaga bakavuga ngo ziriya nkingo iyo umuntu arwiteje ngo arazahara, ngo agacika intege umubiri wose ntiyongere gukora no kugenda mbese akamera nk’umurwayi, ibyo bihuha byose byabagaho mbere yo kwikingiza.”

Ndayambaje yakomeje avuga ko we icyatumye batinyuka bakajya kwikingiza ari ubukangurambaga bwakozwe n’abayobozi bakitangaho ingero aho bo ubwabo babanzaga kwikingiza babona ko za nkingo ntacyo zabatwara.

Yavuze ko nawe amaze kwikingiza ngo yakomeje gukora ibikorwa bye by’iterambere bitandukanye na bya bihuha yavugaga.

Rusine Célestin ukora umwuga wo kogosha yavuze ko bo ibihuha bari bafite ari uko inkingo zari zije guhuhura abakuze zikanabuza kubyara abakiri bato mu rwego rwo kuringaniza imbyaro abaturage bakabyara bake bashoboye kurera.

Zagabintwari Emmanuel we yavuze ko benshi mu baturanyi be batinyaga kwikingiza ngo kuko bumvaga nibikingiza batazongera kubyara.

Yavuze ko we yaje kwikingiza nyuma yo kubona ko umukoresha we yikingije urukingo ntirugire icyo rumutwara.

Ati “Kubera njye nkorera mu ruganda rwa Bralirwa turi mu bikingije mu ba mbere twese kandi baheraga ku bayobozi bacu, twe rero bahereye ku muyobozi wa Bralirwa bajya kumukingira natwe dukurikiraho nyuma rero twagize icyizere turikingiza abantu barabyara tubona byari ibihuha batubwiraga.”

Umuyobozi w’Ibitaro bya Gisenyi, Dr Tuganeyezu Oreste, avuga ko bakoze ubukangurambaga mu nzego zose bereka abaturage ko kwikingiza ntacyo bitwaye.

Ubu bukangurambaga ngo bwatumye imiryango isaga 20 yari yarahungiye muri Repubulika Iharanira Demokarasi ya Congo itahuka ibona ko urukingo ntacyo rutwaye.

Dr Tuganeyezu yanavuze ko byanabaye ngombwa ko bamwe mu bayobozi bakingirirwa imbere y’abaturage kugira ngo babereke ko gufata urukingo ntacyo bitwaye.

Mu Karere ka Rubavu abakingiwe doze ya mbere ni 387 777, doze ya kabiri ni 334 350 mu gihe urukingo rwa gatatu kuri ubu abamaze kuyifata ari 167 104, urukingo rwa kane kuri ubu rumaze gufatwa n’abaturage 8 871 gusa imibare ikaba igikomeje kwiyongera kuko izi nkingo zose zigitangwa.

Bamwe mu baturage bo mu Karere ka Rubavuga bavuga ko kuba hari abayobozi babo bagiye bakingirirwa Covid-19 mu ruhame byabatinyuye bituma nabo batangira kwikingiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .