COVID-19: Abantu basohowe ku rutonde rw’abarengeje amasaha yo gutaha basabwe kwitaba Polisi

Yanditswe na IGIHE
Kuya 20 Nyakanga 2020 saa 09:05
Yasuwe :
0 0

Nyuma yo gusohora urutonde rw’abagera kuri 498 barenze ku mabwiriza yo kwirinda ikwirakwira ry’icyorezo cya Coronavirus, Polisi y’Igihugu yongeye gusaba abatarayitaba kwihutira kugana ubuyobozi bwayo.

Uru rutonde ruriho abagera kuri 495 mu Mujyi wa Kigali na batatu bo mu Ntara y’Amajyaruguru. Bafashwe kubera kurenga ku mabwiriza yo kwirinda COVID-19, agena ko buri wese agomba kuba ari mu rugo kuva saa tatu z’ijoro kugera saa kumi n’imwe z’igitondo.

Itangazo rya Polisi rivuga ko “Polisi y’Igihugu iramenyesha abatwara ibinyabiziga barenze ku mabwiriza yo kurwanya ikwirakwira ry’icyorezo cya COVID-19, ntibubahirize amabwiriza bahawe n’abapolisi ko bagomba kugana ubuyobozi bwa polisi bitarenze ku wa 24 Nyakanga 2020, bazanye n’ibyo binyabiziga.”

Abari mu Mujyi wa Kigali basbwe kujya ku Cyicaro cy’Ishami rya Polisi rishinzwe Umutekano wo mu Muhanda ku Muhima. Abari mu ntara bagomba kugana polisi ku cyicaro cyayo ku ntara cyangwa mu turere.

Ubwo yari mu kiganiro n’abanyamakuru cyagarutse ku ntambwe u Rwanda rugezeho mu guhangana na Coronavirus kuva muri Werurwe 2020, Umuvugizi wa Polisi y’u Rwanda, CP John Bosco Kabera, yibukije abarenze ku mabwiriza yo kwirinda COVID-19 kwihutira kugana ubuyobozi batarafatwa.

Iki kiganiro cyitabiriwe na Minisitiri w’Ubuzima, Dr Ngamije Daniel; uw’Ubutegetsi bw’Igihugu, Prof Shyaka Anastase n’uw’Ubucuruzi n’Inganda Soraya Hakuziyaremye.

CP Kabera yavuze ko abatangajwe ari abantu barengeje amasaha yo gutaha bakanarenga ku mabwiriza aho kujya kuri stade aho bari boherejwe bakigendera batagezeyo.

Yagize ati “Turasaba abantu bari kuri urwo rutonde kwitaba. Turabibutsa ko abatazitaba bazashakishwa, bagafatwa, bakabihanirwa.’’

‘‘Abarenga ku mabwiriza nkana ntibanumvire ibyo bategekwa n’abashinzwe umutekano, bazafatwa. Abakomeje gukwirakwiza ibihuha bagamije guhindanya isura ya Polisi turababwira ko ntacyo bizahindura ku mikorere n’inshingano zacu, ahubwo bazahura n’amategeko.’’

Yakomeje avuga ko abitabye Polisi nta kibazo bafite, yongera ati ‘‘Abatarayitaba bagerageze bayitabe, abagerageza kurushya Polisi nababwira ko itaruha, abarakaza Polisi, ntirakara.”

Kuva umurwayi wa mbere wa COVID-19 iterwa n’agakoko gashya ka Coronavirus agaragaye mu Rwanda ku wa 14 Werurwe 2020, hamaze kuboneka 1582 banduye mu bipimo 210 236 bimaze gufatwa, 834 barayikize mu gihe 743 bakiri mu bitaro naho batanu bitabye Imana.

Kanda hano urebe urutonde Polisi y’Igihugu yasohoye rwerekana abantu bagera kuri 500 barenze ku mabwiriza yo kwirinda Coronavirus

Ku wa 10 Nyakanga 2020, Polisi y'Igihugu yerekanye abantu 11 barenze ku mabwiriza yo kwirinda icyorezo cya COVID-19, barimo abafashwe bigisha gutwara imodoka n’abatubahirije amasaha ntarengwa yo kugera mu rugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .