Coronavirus: Uburyo Leta yakemuye ikibazo cy’abashoferi b’amakamyo, abambukiranya igihugu bagaherekezwa na polisi

Yanditswe na Rabbi Malo Umucunguzi
Kuya 2 Gicurasi 2020 saa 05:11
Yasuwe :
0 0

Guverinoma y’u Rwanda ikomeje gufata ingamba zitandukanye mu koroshya urujya n’uruza rw’ibicuruzwa mu gihugu, bigakorwa hirindwa ubwandu bwa Coronavirus bukomeje kugaragara mu bashoferi b’amakamyo yambukiranya imipaka.

Kuva mu minsi ishize ubwo imibare y’abandura Coronavirus ku munsi yatangiraga kuba myinshi, Minisiteri y’Ubuzima yatangiye gutangaza ko “bigaragaza ubwiyongere bw’abanduye mu batwara amakamyo yambukiranya imipaka n’abo bakorana.”

Imwe mu ngamba zafashwe ni uko serivisi za gasutamo zose zimuriwe ku mipaka aho ibicuruzwa byinjirira mu gihugu, hanategurwa uburyo abashoferi baturukana hanze aya makamyo bajya bagarukira ku mupaka ntibagere mu gihugu.

Mu kiganiro n’abanyamakuru, Minisitiri w’Ibikorwa remezo, Gatete Claver, yavuze ko aribwo buryo bworoshye, kuko basanze umushoferi utamunyuza mu kato k’iminsi 14 nk’abandi bantu bagera mu Rwanda muri iki gihe.

Ati “Ubu twaravuze ngo reka serivisi zose tuzijyane ku mipaka, kuko iyo [abashoferi] baje bakagera i Kigali baba bafite uburyo bagenda bahura n’abantu. Aho barara, abo bahura nabo, ugasanga rero muri iki cyorezo bishoboka ko uwo asanze yamwanduza, cyangwa we yaba ayirwaye atabizi na we akanduza abandi.”

Imodoka zijya ahandi ziraherekezwa, izo mu Rwanda zikakirirwa ku mupaka

Minisitiri Gatete avuga ko ubwo hafatwaga ibyemezo ku modoka zitwara ibicuruzwa by’Abanyarwanda, hanatekerejwe ku zinyura mu Rwanda zigiye mu bihugu by’abaturanyi nka RDC cyangwa u Burundi.

Ati “Izo modoka zo polisi iraziherekeza ikazivana ku mupaka kugeza zigeze aho zijya, aho ngaho ho urumva nta buryo bwo kwanduzanya n’abaturage bo mu Rwanda n’abashoferi bazo, n’aho zihagarara umwanya muto haba hazwi.”

“Ariko hakaba n’izindi modoka usanga zizanye ibicuruzwa hano mu Rwanda, byaba ibijyanye na peteroli, ibiribwa, amafumbire, byaba ari ibijyanye n’iki, byose biza hano, [ku mupaka] twahubatse ububiko, ubu hariya dufiteyo Magerwa, dufiteyo ahakorera ibigo bya Bolloré na Dubai Port World, bagiye bagira ububiko n’aho bakorera.”

Kugira ngo ibyo bishoboke, Leta yafashe ubutaka bwa hegitari 7.5 ku Rusumo mu Karere ka Kirehe, bwubakwaho gasutamo ifite n’ububiko bw’ibicuruzwa bukoreshwa n’ibyo bigo bizobereye muri ako kazi, hubakwa nibura kuri hegitari eshanu.

Muri ubwo buryo, ibyo bigo bipakurura ibicuruzwa bikanyuzwa mu nzira zose ziteganywa cyangwa niba ari kontineri zibikwa, hakaba n’ibindi bidapakururwa nka peteroli, igomba gukomeza ikajya mu bigega byagenwe.

Minisitiri Gatete yavuze ko mu buryo bwateganyijwe, nko ku mizigo idapakururirwa ku mupaka, nyirawo agomba guteganya umushoferi wo mu gihugu, ari na we uwinjirana mu Rwanda, awakiriye ku mupaka.

Minisitiri Gatete yakomeje ati “Wa wundi utarwaye mu by’ukuri banapimye, imodoka yahagera, ikintu kibanza ni ukuyitera umuti kuko hari abaganga, imodoka yose igaterwa umuti, noneho umushoferi uvuye mu Rwanda akabitwara, ibintu akabizana hano i Kigali, yarangiza imodoka akayisubizayo.”

Ibicuruzwa bikeneye gupakururwa nabyo imodoka zibanza guterwa imiti, bigapakururwa hakaza izindi modoka zijya kubitunda zibijyana i Kigali n’ahandi. Niba ikamyo igomba gusubira i Dar Es Salaam kuzana ibindi bicuruzwa, ikatira ku mupaka n’umushoferi wayo itinjiye mu gihugu.

U Rwanda rwemeye kwakira abashoferi b’abanyamahanga

Mu buryo bwo guhererekanya imizigo, hagiye habaho nk’impungenge z’uburyo umushoferi yageza umuzigo ku mupaka, akawuhereza undi muntu wo mu Rwanda atamuzi, hakabamo ikibazo cy’icyizere.

Minisitiri Gatete yavuze ko bemeye ko ibigo bibishaka, bishobora kohereza abashoferi mu Rwanda bakahaguma, bakajya bakirira bagenzi babo ku mupaka, ariko bo badakora ingendo zambukiranya ibihugu.

Ati “Bashobora kuzana umushoferi wabo hano agahabwa icyemezo cy’igihe gito cyo gukorera mu gihugu, ariko ni ukuvuga ko mu Rwanda baba bamupimye ameze neza, noneho abavanye imizigo Dar es Salaam bakagira ahantu bacumbikirwa [ku mupaka], wawundi uzava mu Rwanda agakomezanya ibicuruzwa, ya kamyo bakongera bakayisubizayo.”

Ni icyemezo Minisitiri Gatete avuga ko gikomeye, kuko ubusanzwe bitakabaye byoroshye ko umunyamahanga ahita ahabwa uburenganzira bwo gukorera mu Rwanda ari umushoferi, kandi mu gihugu bahaboneka ku bwinshi.

Yakomeje ati “Turavuga ngo ushobora kuzana umushoferi wawe akaguma mu Rwanda, agatura hano agahabwa uburenganzira bwo gukora izo ngendo, ni umushoferi wizeye, wazana ikamyo akayinjiza mu gihugu wowe ukaguma ku mupaka.”

Ibicuruzwa ntibigomba gutinda ku mupaka

Minisitiri Gatete avuga ko kugira ngo ibicuruzwa bikomeze kwinjira mu gihugu bitabangamiwe, bitagomba gutinda muri gasutamo zo ku mipaka, ahubwo bigomba kwihutishwa bikagezwa i Kigali.

Niba ngo umuntu aziko ibicuruzwa yatumije i Dar es Salaam bigera mu Rwanda nk’uyu munsi, aba akwiye gushaka umushoferi bahurirayo agahita abizana i Kigali.

Ikindi ngo ahubatswe gasutamo ku mupaka hateganyirijwe imodoka zirengaho gato 150 za rukururana, ku buryo zihatinze zateza ikibazo. Kugira ngo abantu bumve ubwihutirwe bwabyo, hashyizweho ikiguzi cy’ubukererwe.

Minisitiri Gatete yavuze mu buryo busanzwe, ku bicuruzwa bikigera mu bubiko abantu bishyuzwa ifaranga rimwe, amafaranga make kuko “biriya bikorwa remezo ni twe twabyubatse nka leta, ariko bigakoreshwa n’abandi bantu babigenewe bakora ibijyanye n’ububiko nka Dubai Port, Bolloré na Magerwa.”

Yakomeje ati “Imodoka ishobora guparika umunsi umwe wose, ariko ku munsi wa kabiri turatangira kubaca amande, ni amafaranga abiri ku kilo ku munsi, bitewe n’ibilo ufite ku modoka iri aho iparitse.”

“Niba ari ibicuruzwa biri mu bubiko kuko dushaka kugira ngo bigende bihe umwanya ibindi bicuruzwa bizaza, turavuga tuti turaguha umunsi wa mbere, ariko umunsi wa kabiri turatangira kubara amafaranga abiri ku kilo, ku bicuruzwa bibitse ahongaho.”

Ibicuruzwa ngo nibirenza indi minsi ibiri, Leta ubwayo izabipakiza imwe mu ikamyo zitegereje ibicuruzwa, ibigeze kuri nyirabyo yishyure ikiguzi cyabyo.

Abashoferi boroherejwe mu mabwiriza mashya

Minisiteri y’Ibikorwa remezo yatangaje ko abatwara amakamyo bagomba gusaba uruhushya muri iyi minisiteri, kugira ngo bazarusheho gufashwa kubera ko mu mabwiriza mashya yo gukumira Coronavirus mu Rwanda, ingendo hagati y’intara ebyiri zitemewe, kandi bazajya bakora ingendo bajya kwakira ibicuruzwa ku mupaka.

Minisitiri Gatete ati “Ni ukugira ngo tubanze tumenye imibare yabo, abo aribo, barashaka kugenda n’imodoka yihe, ba nyir’imizigo ni aba he, ibintu nk’ibyo, kugira ngo dufate iyo lisiti tuyihe polisi, kugira ngo buri gihe ntagombe gusaba uruhushya ahubwo bimworohere, kuko ntabwo dushaka ikimutinza ngo noneho n’imizigo itinde hariya cyangwa imodoka yari agiye kuzana itinde hariya.”

Ngo ni ibikorwa bizatuma umuntu atagenda mu bihe bitari ngombwa, ariko n’ugomba kugenda yoroherezwe, ingendo zihute.

Minisitiri Gatete avuga ko hakomeje gushakishwa uburyo gutwara ibi bicuruzwa byanozwa kurushaho, cyane ko hejuru ya 80% y’ibicuruzwa byinjira mu Rwanda, binyura i Dar Es Salaam.

Mu buryo busanzwe, amakamyo yose yinjiraga mu gihugu yishyuzwaga $152 kubera gukoresha imihanda. Kubera ko izo modoka zitagera i Kigali ahubwo zinjira mu gihugu umwanya muto, ayo nayo yakuweho.

U Rwanda kandi rwemeye ko uretse kuba abashoferi bategereje imodoka zabo bashyirwa ahantu hamwe hagenwe, ababishaka bashobora gusubira muri Tanzania, imodoka zabo zahindukira bakajya kuzifata.

Minisitiri Gatete ati “Tumaze gukemura ibibazo byinshi byagiye bibaho, ubu turi no mu biganiro na Tanzania tureba niba hari ibyakongerwamo imbaraga, tunakorana n’abandi mu karere mu kureba uburyo twagira ibyo duhuriyeho n’uburyo byakorwa.”

Ingamba zirimo gutanga umusaruro

Minisitiri Gatete avuga ko ku wa Kane w’icyumweru gishize ari bwo abayobozi bagiye kureba ukuntu kwimurira ibikorwa byose ku mupaka byakorwa, ku wa Gatanu imyiteguro iratangira, ku wa Mbere nimugoroba batangira kuhakorera.

Ubu harimo gushakwa amacumbi y’abahakorera aharimo gutegurwa ahazaba hari ibyumba 172 n’ahandi bacumbika baba abashinzwe iby’imisoro, abakora muri gasutamo no mu nzego z’ubuzima.

Ati “Mbere batangira byari bitanoze, ariko ejo tugiyeho n’uyu munsi uko nagiye mbaza, abantu bamaze kumenyera imikorere mishya kandi biranihuta cyane.”

Mbere ngo wasangaga hari abantu badafite amakuru ahagije, ubu hashyizweho itsinda na nimero amakuru yose abonekaho ya 913.

Minisitiri Gatete ati “Dushaka kugira ngo dukumire, bikorerwe hariya aho kugira ngo bize hano muri Kigali kuko ntiwamenya ingaruka yabyo.”

Minisitiri Gatete yatangaje ko hafashwe ingamba zigamije koroshya urujya n'uruza, ariko hakirindwa Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .