COPEDU Plc yungutse miliyari 1,475 Frw mu 2019, umutungo wayo uzamukaho 22%

Yanditswe na Mukahirwa Diane
Kuya 7 Ukuboza 2020 saa 06:00
Yasuwe :
0 0

Ikigo cy’Imari cya COPEDU Plc cyatangaje ko mu mwaka ushize wa 2019 cyungutse miliyari 1,475 Frw, bingana n’izamuka rya 50% ugereranyije n’umwaka wari wabanje bituma urwunguko rugera kuri miliyoni 979 Frw nyuma yo gutanga imisoro.

Iyi mibare yatangajwe COPEDU Plc mu nama rusange y’abanyamigabane yagaragarijwemo ko umutungo bwite wiyongereye ku kigero cya 22% aho ungana na miliyari 4,400 Frw.

Inyungu yazamutse biciye mu nguzanyo zatanzwe ahanini zirimo izishyigikira imishinga y’abagore dore ko ari nayo ntego nyamukuru y’iki kigo cy’imari. Inguzanyo zatanzwe mu mwaka ushize ziyongereyeho 18% zigera kuri miliyari 15 Frw.

Kuba COPEDU Plc yaragize uru rwunguko, abanyamigabane basobanura ko byatewe no kuba yarakomeje intego zayo zo guteza imbere umugore kandi n’abagore bakitinyuka.

Umuyobozi w’Inama y’Ubutegetsi ya COPEDU Plc, Gashumba Liliane, yagize ati “Urwunguko twabonye mu 2019 rwarazamutse. Ni ibintu byo kwishimira cyane, kuko biba bigaragaza ko ikigo kiri gutera imbere kandi ahanini biterwa n’ibikorwa bihari byo korohereza abagore gutera imbere kandi nabo babikora neza inyungu zikaboneka.”

Yakomeje avuga ko bafite intumbero z’uko COPEDU Plc yahinduka banki y’icyitegererezo mu guteza imbere umugore muri Afurika.

Ati “Dufite icyerekezo cy’uko COPEDU Plc yacu twazayigira banki y’icyitegererezo mu guteza imbere umutegarugori muri Afurika ku buryo n’abandi bajya baza kutwigiraho tukagira banki y’abagore ihamye.”

Mukarugambwa Ntwali Anne Marie yashimye umusanzu wa COPEDU Plc mu iterambere ry’umugore mu Rwanda.

Ati “ COPEDU Plc yateje imbere abagore, babashije gukora bagira aho bava n’aho bagera, bateza imiryango yabo n’igihugu imbere. Ibi byose nibyo bituma COPEDU Plc itera imbere.”

COPEDU Plc ni ikigo cy’imari kimaze imyaka 23 gitanga serivisi zo kubitsa no kuguriza abantu bose, ariko kikagira umwihariko ku bagore. Gikorana n’ikigega cy’ingwate, BDF mu gutanga inguzanyo.

COPEDU Plc yatangaje ko mu mwaka ushize wa 2019, yungutse miliyari 1,475, bingana ni izamuka rya 50% ugereranyije n’umwaka wari wabanje
Inyungu ya COPEDU Plc yazamutse kuri 50% ugereranyije n'umwaka wabanje
Inama yari yitabiriye n'abahagarariye abanyamigabane
COPEDU Plc intego yayo ni uguteza imbere umugore
Inyungu za COPEDU Plc izikesha kuba ishyigikira abagore nabo bakabasha gutanga umusanzu mu iterambere
Mukarugambwa Ntwali Anne Marie ni umwe mu bashima uruhare rwa COPEDU Plc mu iterambere ry'umugore
Umuyobozi w’Inama y’Ubutegetsi ya COPEDU Plc, Gashumba Liliane, yavuze ko bishimiye urwunguko bagize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .