CNLG yavuze ku cyemezo cyo gutesha agaciro isubirwamo ry’imikirize y’urubanza rwa Ngirabatware Augustin

Yanditswe na Cyprien Niyomwungeri
Kuya 27 Nzeri 2019 saa 02:23
Yasuwe :
0 0

Tariki 24 Nzeri 2019 Urwego Mpuzamahanga rwashyiriweho gukora imirimo y’insigarira y’inkiko mpanabyaha (MICT), rwafashe icyemezo cyo kudasubirishamo imikirize y’urubanza rwa Ngirabatware Augustin, wari minisitiri w’igenamigambi mu gihe cya Jenoside.

Augustin Ngirabatware yafatiwe i Frankfurt mu Budage mu 2007 ashinjwa uruhare muri Jenoside, yoherezwa kuburanira Arusha, ahamywa n’urukiko ibyaha birimo gushishikariza no gufasha gukora Jenoside mu yahoze ari komini Nyamyumba.

Yahamijwe kandi icyaha cyo gufata ku ngufu nk’icyaha cyibasiye inyoko muntu, maze ku wa 20 Ukuboza 2012 urukiko rwa Arusha rumuhanisha gufungwa imyaka 35.

Ku wa 18 Ukuboza 2014 urugereko rw’Ubujurire rwashimangiye ko Ngirabatware ahamwa n’ibyaha bya Jenoside, ariko rumuvanaho icyaha cyo gufata ku ngufu, igihano cye kiragabanywa kigirwa imyaka 30.

Ku wa 8 Nyakanga 2016 Ngirabatware yandikiye MICT asaba gusubirishamo iburanisha ku byaha yahamijwe kuko afite ibimenyetso bishya bimushinjura, icyifuzo cye cyemerwa ku wa 19 Kamena 2017.

Komisiyo y’Igihugu yo kurwanya Jenoside (CNLG), yishimiye ko muri iki cyumweru hafashwe icyemezo cyo kudasubirishamo imikirize y’urubanza rwa Ngirabatware, kuko n’ubundi itahwemye kugaragariza MICT imbogamizi zo kwakira ubusabe bwe bwo kumuhanaguraho icyaha cya Jenoside.

CNLG yari yagaragarije MICT ko kwakira ubusabe bwa Ngirabatware ari ugutesha agaciro ibyemezo by’Urukiko Mpuzamahanga Mpanabyaha (ICTR), kudaha uburemere jenoside yakorewe abatutsi no kwimakaza umuco wo kudahana.

Itangazo rya CNLG rivuga ko ‘icyari cyihishe inyuma y’isubirishamo ry’imikirize y’urubanza rwa Ngirabatware, si ukumugira umwere gusa ahubwo bwari uburyo bwo guha inzira abashaka kubishingiraho mu bihe bizaza mu gufata ibindi byemezo by’isubirwamo ry’imikirize y’imanza zamaze gucibwa burundu na TPIR, bityo zigafatwa nk’izaciwe mu buryo budakurikije amategeko zigateshwa agaciro’.

Ruswa mu rubanza rwa Ngirabatware

CNLG kandi ivuga ko nyuma y’uko hatangajwe ko tariki 16 Nzeri 2019, ari bwo hazasubirishwamo imikirize y’urubanza rwe, Ngirabatware, yahise ashyiraho itsinda ariha inshingano yo guha ruswa abatangabuhamya kugira ngo bamufashe kugirwa umwere ku byaha byose yahamijwe n’urukiko.

Iryo tsinda rigizwe na Maximilien Turinabo, Anselme Nzabonimpa, Jean de Dieu Ndagijimana, Marie Rose Fatuma na Dick Prudence Munyeshuli.

Aba ngo bakoresheje guha ruswa abatangabuhamya bacungiwe umutekano no kubayobya mu buryo butandukanye.

Inyandiko y’ibirego bya Porokireri wa MICT yemejwe n’Umucamanza Seon Ki Park ku itariki ya 24 Kanama 2018, igaragaza ko Dick Prudence Munyeshuli na Maximilien Turinabo basuzuguye, kandi babigambiriye, ibyemezo byafashwe n’Urwego byo kurinda umutekano w’abatangabuhanya, ibyo bakabikora batangaza imyirondoro yabo kandi bitemewe.

Iyo nyandiko ya Porokireri igaragaza kandi ko Dick Prudence Munyeshuli yavuganye n’abo batangabuhamya kandi bitemewe, akabikora azi neza ko ari kurenga ku mabwiriza y’Urukiko.

CNLG ikavuga ko ‘Icyo cyaha ubwacyo ni ikimenyetso simusiga kigaragaza ko hari umugambi wo guharanira ko Ngirabatware agirwa umwere hakoreshejwe uburyo bwose bushoboka harimo n’ubunyuranyije n’amategeko ku buryo bukabije’.

Umucamanza Meron mu rubanza rwa Ngirabatware

Umucamanza Theodor Meron, ni imwe mu bari bagize inteko iburanisha isubirishwamo ry’imikirize y’urubanza rwa Ngirabatware. Uyu mucamanza azwiho kuba yarafashe ibyemezo byinshi agamije kugira Ngirabatware umwere, bityo icyo akaba ari ikimenyetso cy’imyitwarire ye yo kubogama.

CNLG ivuga ko ikimenyetso cya mbere kigaragaza uko kubogama kwa Meron ari uko urugereko rw’ubujurire rwa TPIR rwari ruyobowe na we rwafashe icyemezo cyo kugabanya mu bujurire igihano Ngirabatware yari yarahanishijwe maze rukivana ku myaka 35 y’igifungo rugishyira ku myaka 30 kandi ibyo bikorwa hatagaragajwe impamvu zifatika.

Ibi byakurikiwe no gukora agashya, aho ku itariki ya 19 Kamena 2017 yaje gutangaza abantu ubwo yemeraga icyifuzo cyo gusubirishamo imikirize y’urubanza rwa Ngirabatware yitwaje ko hari ingingo nshya Ngirabatware yigaragarije we ubwe.

Mu nyandiko CNLG yanditse isaba ko gusubirishamo imikirize y’urubanza bikurwaho yavuze ko ‘ikibabaje kurushaho kandi ni uko uwo mucamanza Meron ari na we ugomba guca urubanza muri iryo subirishwamo ry’imikirize y’urwo rubanza’.

Yanibukije ko nta na rimwe umucamanza Meron yigeze atega amatwi cyangwa ngo ahe agaciro ibyifuzo by’abakorewe ibyaha cyangwa ngo yumve imibabaro yabo.

Yagiye afata ibyemezo yita gusa ku ngingo ziri mu nyungu z’abakoze jenoside, ibyo akabikora yirengagiza ingingo z’amabwiriza agenga ibishingirwaho mu gufata icyemezo cyo kurekura abakatiwe n’Urukiko mbere yo kurangiza ibihano bahawe, kandi na we ubwe yaragize uruhare mu gutegura ayo mabwiriza.

Mu itangazo rya CNLG, ivuga ko kuba humviswe ubusabwe bwayo hagendewe ku bimenyetso bifatike ‘yizeye ko iki cyemezo kizashingirwaho mu kuburizamo ubusabe bwose bw’abahamijwe ibyaha bya jenoside bugamije gutesha agaciro ishingiro rya TPIR”.

CNLG ihamagarira MICT gushyira ingufu mu gukurikirana abateguye jenoside yakorewe abatutsi bakanayishyira mu bikorwa bakidegembya hirya no hino ku Isi aribo; Bizimana Augustin, Mpiranya Protais, Kabuga Felicien, Kayishema Fulgence, Munyarugarama Pheneas, Ndimbati Aloys, Ryandikayo Charles na Sikubwabo Charles.

Ngirabatware Augustin yari minisitiri w’igenamigambi mu gihe cya Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .