CNLG yamaganye ikiganiro cy’abahakana n’abapfobya Jenoside giteganyijwe mu Bubiligi

Yanditswe na IGIHE
Kuya 22 Gashyantare 2019 saa 03:44
Yasuwe :
0 0

Komisiyo y’Igihugu yo kurwanya jenoside (CNLG), iramaganira kure ikiganiro mpaka cy’abahakana n’abapfobya Jenoside yakorewe Abatutsi cyateguwe n’ishyirahamwe ‘Institut Seth Sendashonga’ mu Bubiligi kuri uyu wa Gatandatu tariki 23 Gashyantare 2019.

Iryo shyirahamwe ryashyizweho kuwa 01 Gicurasi 1999 rigaragara nk’irikoraniwemo cyane cyane abantu biyemeje guhakana no gupfobya Jenoside yakorewe Abatutsi, bakoresheje imvugo yuko mu Rwanda haba harabaye jenoside ebyiri.

CNLG ivuga ko icyo kiganiro kizaba gikoreshejwe amezi abiri mbere y’igikorwa cyo kwibuka Jenoside yakorewe Abatutsi, ari ikimenyetso simusiga cy’uko hariho agatsiko k’abantu bishyize hamwe kugira ngo basibanganye amateka ya Jenoside yakorewe Abatutsi, nyamara yemewe ku mugaragaro n’inzego mpuzamahanga zibifitiye ububasha.

Biteganyijwe ko abazafata ijambo muri icyo kiganiro, nka Filip Reyntjens, Faustin Twagiramungu, Jean Baptiste Nkuliyingoma, Johann Swinnen, Gustave Mbonyumutwa, na Dr Innocent Biruka, bose basangiye ubuhakanyi bwa Jenoside yakorewe Abatutsi kandi bashishikajwe no gushinyagurira abazize Jenoside yakorewe Abatutsi kimwe no gusibanganya burundu amateka y’iyo Jenoside yabaye bwa nyuma mu kinyejana cya 20.

Abo bahakanyi bimakaza inyito ‘Jenoside nyarwanda’ bagamije gushimangira ko hanabayeho jenoside yakorewe Abahutu.

Nyamara birazwi nta shiti ko mu Rwanda habaye Jenoside imwe rukumbi ariyo yakorewe Abatutsi nk’uko byanashimangiwe n’Urukiko Mpanabyaha Mpuzamahanga rwashyiriweho u Rwanda mu rubanza rwaciye ubwa mbere rwa Akayesu.

Mu rubanza rwa Akayesu, kuwa 2 Nzeli 1998, igika cya 18 hagira hati "Biragaragara neza ko ubwicanyi bwabereye mu Rwanda muri 1994 bwari bugamije intego imwe rukumbi: gutsemba Abatutsi, bazira gusa ubwoko bwabo, batazira ko baba ari abarwanyi ba FPR (…) Iyo Jenoside yabaye mu Rwanda muri 1994, ikorerwa Abatutsi nk’abantu basangiye ubwoko”.

Mu nyandiko nyinshi za Filip Reytjens yanditse nyuma ya Jenoside yakorewe Abatutsi, huzuyemo ibinyoma bishaka gusibanganya amateka nyakuri. Akunze gushaka kuzana urujijo akoresheje ibitabo n’izindi nyandiko ze kimwe n’ibiganiro binyuranye agamije gushinyagurira abazize Jenoside yakorewe Abatutsi, kwanduza ubuyobozi bw’u Rwanda burangajwe imbere na FPR Inkotanyi, byose bigamije gushimangira imvugo y’uko Abatutsi ngo baba ari bo bateguye bakanashyira mu bikorwa Jenoside.

Bene iyo myifatire inagaragarira kuri Johan Swinnen, wabaye Ambasaderi w’u Bubiligi mu Rwanda kuva muri Kanama 1990 kugeza muri Mata 1994. Mu buryo bugayitse cyane, Johan Swinnen yirengagiza ukuri akemeza ko nta jenoside Abatutsi bakorewe, ahubwo ko habaye ubwicanyi gusa. Nyamara, mbere ya Jenoside, yari i Kigali ari incuti y’ingoma ya Habyarimana yateguye ikanashyira mu bikorwa Jenoside.

Muri iyo myaka, yamenye imyiteguro yose ya Jenoside, ntiyagira icyo abikoraho aricecekera. Mu gihe yari akwiye kwisuzuma, ahitamo gukorana n’abahakanyi no gukwiza ibinyoma bigamije kugoreka amateka ashaka kwerekana ko nta Jenoside Abatutsi bakorewe.

Uko kugoreka amateka kugaragarira no kuri Gustave Mbonyumutwa n’ishyirahamwe Jambo ASBL izwi nk’ihakana ikanapfobya Jenoside. Iryo shyirahamwe ryashyizweho mu Bubiligi n’abana cyangwa abandi bakomoka ku babyeyi kubateguye bakanashyira mu bikorwa Jenoside yakorewe Abatutsi, bakaba baraciriwe imanza n’urukiko mpuzamahanga rwa Arusha, inkiko z’u Rwanda cyangwa z’ibindi bihugu.

Abagize Jambo ASBL bakoresha uburyo bwinshi bwo gukwirakwiza ibitekerezo byabo, byaba gutegura ibiganiro abahakanyi bakoraniramo, kwiyamamaza mu matora mu bihugu batuyemo, kuregera inkiko bagamije kuzana imanza zizabafasha gukwirakwiza ibitekerezo byabo bibi.

Faustin Twagiramungu umenyereye ibiganiro n’imvugo zihakana jenoside, nawe azaba ari umwe uzafata ijambo muri icyo kiganiro mpaka. Akunze gukoresha imvugo ‘jenosidenyarwanda’, akemeza ko mu Rwanda habayeho guhangana hagati y’ubwoko nyamwinshi n’ubwoko nyamucye, nyamwinshi ikaba ariyo ifite ukuri mu gihe nyamucye nta kuri ifite. Mbese mu buryo bweruye ahakana Jenoside yakorewe Abatutsi. Yirengagiza ko Jenoside yabereye mu maso ye kandi ko, niba uyu munsi akiri muzima, abikesha ingabo za FPR zamukijije abajenosideri bashakaga kumwirenza bamuziza ko yarwanyaga Leta ya Habyarimana.

Jean Baptiste Nkuliyingoma nawe ni umwe mu bari kw’isonga rya MDR-PARMEHUTU, ishyaka ryuzuye ingengabitekerezo y’urwango ryashizweho muri 1959 rikaza kuzuka muri 1991 rizanywe n’abahembera amacakubiri n’urwango hagati y’amoko.

Abayobozi benshi bo muri iryo shyaka, barimoShingiro Mbonyumutwa na Jean Baptiste Nkuliyingoma wahoze ari umunyamakuru wa radiyo y’igihugu yagenzurwaga n’ishyaka rukumbi MRND, na n’ubu bagaragara nk’abashyigikiye ingengabitekerezo y’amacakubiri bakwirakwiza mu Bubiligi bagamije kubangamira imyiteguro y’igikorwa cyo kwibuka Jenoside yakorewe Abatutsi ku nshuro ya 25.

Ibyo byose byerekana ko bene ibyo biganiro mpaka nk’icyo cyateguwe n’ishyirahamwe ‘Institut Seth Sendashonga’ kizabera mu Bubiligi kuwa 23 Gashyantare 2019, biba biri mu murongo w’ibikorwa bihakana Jenoside yakorewe Abatutsi biba byateguwe n’abari bashyigikiye Leta y’abajenosideri ya Habyarimana.

Itangazo ryashyizweho umukono n’Umunyamabanga Nshingwabikorwa wa CNLG, Dr Bizimana Jean Damascène, rivuga ko ‘Kubera izo mpamvu, ibyo bikorwa n’ababitegura bagomba kwamaganirwa kure, isura yabo nyakuri ikamenyekana. Yashishikarije Abanyarwanda n’inshuti z’u Rwanda gufatanya mu kurwanya ibikorwa byo guhakana Jenoside yakorewe Abatutsi.

Umunyamabanga Nshingwabikorwa wa CNLG, Dr Bizimana, yashyize umukono ku itangazo ryamagana ikiganiro cy’abahakana n’abapfobya Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza