CNLG yamaganye ibihugu bicumbikiye abicanyi n’ibikomeje guha urubuga abapfobya n’abahakana Jenoside

Yanditswe na Rabbi Malo Umucunguzi
Kuya 9 Ukuboza 2019 saa 12:22
Yasuwe :
0 0

Komisiyo y’igihugu yo kurwanya Jenoside, CNLG, yasabye ibihugu bicumbikiye abagize uruhare muri Jenoside yakorewe Abatutsi, kubaburanisha cyangwa bikabohereza mu Rwanda ngo bakurikiranweho ibyaha bakoze, ndetse ibiha urubuga abashaka guhakana no gupfobya Jenoside bikwiye kubihagarika.

Ni ubutumwa bwatanzwe mu gihe hizihizwa ku nshuro ya 71 amasezerano mpuzamahanga yo gukumira no guhana icyaha cya jenoside.

Ku wa 21 Ukuboza 1947 nibwo Inteko Rusange y’Umuryango w’Abibumbye yemeje ko ‘Jenoside’ ari icyaha mpuzamahanga kigomba gukurikiranwa ku rwego rw’igihugu no ku rwego mpuzamahanga, cyakorwa n’abantu ku giti cyabo cyangwa na za Leta.

Yanemeje Amasezerano Mpuzamahanga yo Gukumira no Guhana icyaha cya Jenoside mu cyemezo cyayo 260 A (III) cyo kuwa 9 Ukuboza 1948, atangira gushyirwa mu bikorwa guhera tariki ya 12 Mutarama 1951.

U Rwanda rwashyize umukono ku Masezerano Mpuzamahanga yo Gukumira no Guhana icyaha cya Jenoside tariki ya 16 Mata 1975 kuri Repubulika ya kabiri, ariko rurifata ku ngingo ya 9, iteganya ko igihugu gishobora kuregerwa Urukiko Mpuzamahanga rw’Umuryango w’Abibumbye mu gihe kidashyira mu bikorwa aya masezerano cyangwa kigaragayemo icyaha cya jenoside n’ibyaha biyishamikiyemo.

CNLG ivuga ko uko kwifata kwerekana ko abayoboraga u Rwanda bari bazi ko bashobora kubazwa ubwicanyi bwagiye bwibasira Abatutsi kuva mu 1959, ndetse bikanerekana ko u Rwanda rutashakaga kureka politiki yarwo y’ivangura n’amacakubiri rwagenderagaho, yagejeje kuri Jenoside yakorewe Abatutsi muri 1994 igahitana abarenga miliyoni.

Umunyamabanga Nshingwabikorwa wa CNLG, Dr Bizimana Jean Damascène, avuga ko nyuma ya Jenoside yakorewe Abatutsi mu Rwanda hakozwe byinshi mu guhangana n’ingaruka nyinshi yasize, uhereye ku guhana abakoze ibyaha bya Jenoside mu rwego rwo guca umuco wo kudahana.

Gusa hanatangiye ibikorwa bibi by’abayihakana n’abayipfobya, haba mu gihugu no hanze yacyo. Zimwe mu ngingo abahakana bashingiraho ni ukuvuga ko itateguwe, ko mu Rwanda habaye isubiranamo ry’amoko atari Jenoside no kuvuga ko habaye Jenoside ebyiri (iyakorewe Abatutsi n’iyakorewe Abahutu mu Rwanda no muri Congo).

Dr Bizimana yakomeje ati “Abapfobya Jenoside yakorewe Abatutsi bakunze kunenga imibare itangwa y’abishwe, gutanga ishingiro ryayo cyangwa kuyoroshya, guhisha cyangwa konona ibimenyetso byayo no guhohotera abacitse ku icumu. Hariho n’abanyapolitiki bayikoresha mu nyungu zabo basenya ibyagezweho.”

“Mu Rwanda ibyo bikorwa bikunda kugaragara cyane mu gihe cyo kwibuka (Urugero muri 2019 hagaragaye abantu 227), mu gihe mu mahanga bigaragara cyane muri bamwe mu Banyarwanda bahungiyeyo biganjemo abagize uruhare muri Jenoside bafatanya n’abanyamahanga biganjemo abanyamakuru, abanditsi, abanyapolitiki, abarimu ba kaminuza n’abashakashatsi.”

Yavuze ko nubwo u Rwanda rumaze gukora byinshi mu gushyira mu bikorwa Amasezerano Mpuzamahanga yo Gukumira no Guhana Icyaha cya Jenoside cyane cyane guhana ingengabitekerezo ya Jenoside n’ibyaha bifitanye isano na yo, hakiri inzitizi zikomeye kubera uburyo abayikwirakwiza mu mahanga bakoramo bugenda buhindura isura kandi bwifashisha iterambere rigezweho.

Yakomeje ati “Muri iki gihe hari abantu ku giti cyabo n’imitwe y’iterabwoba yiyise P5 ibumbye udutsiko turwanya Leta y’u Rwanda kandi bamwe mu bayigize bashinjwa uruhare muri Jenoside yakorewe Abatutsi (FDLR/RUD-Urunana). Hari n’amashyirahamwe y’abaharanira kwemerwa kwa Jenoside yakorewe Abahutu akorera i Burayi.”

Gusa Dr Bizimana yashimangiye ko u Rwanda ruzakomeza gushyigikira ibikorwa n’ingamba bigamije kurwanya Jenoside n’ingengabitekerezo yayo aho ariho hose ku isi no guteza imbere indangagaciro zubaha ubuzima n’ikiremwamuntu muri rusange nk’uko rwabigaragaje rwakira impunzi z’Abanyafurika bavanywe muri Libya.

Ati “Komisiyo y’Igihugu yo Kurwanya Jenoside iributsa ibihugu bicumbikiye abicanyi bagize uruhare muri Jenoside yakorewe Abatutsi ko bikwiye kubahiriza amategeko mpuzamahanga bikabacira imanza cyangwa bikabohereza mu Rwanda. Kugeza ubu u Rwanda rumaze kohereza impapuro 1144 zishakisha abakoze Jenoside bari mu mahanga.”

“Komisiyo y’Igihugu yo Kurwanya Jenoside irasaba kandi ibihugu byose biha urubuga abapfobya n’abahakana Jenoside yakorewe Abatutsi, cyane cyane bimwe mu bihugu by’i Burayi, ko bikwiye kubahiriza Icyemezo n°2150 bigahana abo bantu.”

Nyuma ya Jenoside, abenshi mu bayigizemo uruhare barafashwe baryozwa ibyo bakoze, ariko hari abandi umunani babarwa nka ba ruharwa, barimo Kabuga Félicien, Mpiranya Protais, Bizimana Augustin, Kayishema Fulgence, Munyarugarama Pheneas, Ndimbati Aloys, Sikubwabo Charles na Ryandikayo Charles, bagishakishwa bikekwa ko bihishe mu bihugu bitandukanye.

Umunyamabanga Nshingwabikorwa wa Komisiyo y’Igihugu yo kurwanya Jenoside (CNLG), Dr. Jean Damascène Bizimana yasabye ibihugu guhagarika gukingira ikibaba abakoze Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza