CNLG na NURC bavuze kuri Ingabire uvugwaho gushinga umutwe ashingiye ku bwoko

Yanditswe na Habimana James
Kuya 14 Gicurasi 2019 saa 11:16
Yasuwe :
0 0

Nyuma y’amezi umunani gusa asohotse muri gereza ku bw’imbabazi za Perezida wa Repubulika, Ingabire Victoire, yongeye kugaragara ku ipaji ya mbere y’ibitangazamakuru byo mu Rwanda no mu mahanga, avugwaho gushaka gushinga umutwe w’iterabwoba ugizwe n’ubwoko bumwe.

Kuwa Gatandatu tariki 11 Gicurasi nibwo hasakaye amakuru y’uko Ingabire yitabiraye inama yari yitiriwe iyo guhura n’abayoboke b’ishyaka rye FDU-Inkingi, ritemewe mu Rwanda yabereye mu Murenge wa Kigina mu Karere ka Kirehe ahazwi nka Sun City Motel.

Abari bayirimo bahamije ko abantu 22 aribo bitabiriye nyuma yo guhabwa ubutumire n’uwitwa Ndatinya wababwiraga ko ari amahugurwa bagiye kwitabira nyuma bakaza guhabwa insimburamubyizi.

Bakihagera, bahawe icyo kunywa n’aho kwicara, mu gihe gito Ingabire na we ngo aba arahageze atangira avuga ingingo ziganirwaho.

Umwe mu bari bitabiriye inama wahishuye amakuru, yavuze ko Ingabire yabasabye kumushakira abandi bantu binjira mu ishyaka rye rya FDU- Inkingi ariko abaha gasopo yo kutamuzanira abatutsi.

Ni igikorwa cyabyukije ibyiyumviro bya benshi bibaza uburyo Ingabire wakatiwe igifungo cy’imyaka 15 ahamijwe ibyaha byo kugambanira igihugu agamije kukibuza umudendezo no kurema umutwe w’abagizi ba nabi, yirengagiza imbabazi yahawe n’Umukuru w’Igihugu, agashaka kubisubira.

Aha niho bahera bamuciraho umugani ko ‘akabaye icwende katoga...’, bagasaba ko adakwiye kwihanganirwa kubera ibi bikorwa bye bihembera amacakubiri.

Ingabire akwiye kwamaganwa

Umunyamabanga Nshingwabikorwa wa Komisiyo y’Ubumwe n’Ubwiyunge (NURC), Ndayisaba Fidèle, yabwiye IGIHE ko umuntu uwo ariwe wese ugaragaweho ibikorwa by’ivangura no gukwirakwiza amacakubiri akwiriye gukurikiranwa agahanwa n’amategeko.

Ati “Biramutse ari byo twe uko tubibona nka Komisiyo y’Igihugu y’Ubumwe n’Ubwiyunge, byaba bibabaje ariko ntibikwiye no kwihanganirwa. Ikindi ni uko nta n’ukwiye kubyitwaza ngo byitirirwe imikino ya politiki nk’uko twumvise bivugwa, nta n’ukwiye kandi kwihisha inyuma y’iyo mikino ya politike akinisha kugarura amacakubiri mu banyarwanda, dukomeje gushimira abanyarwanda batabyihanganiye bakabyamagana bakanatanga amakuru.”

Ndayisaba yakomeje avuga ko uwo ari we wese washaka gukurura amacakubiri akwiye kwamaganwa ndetse bikamenyeshwa inzego z’ubuyobozi n’ubugenzacyaha.

Ati “Ingabire si umunyapolitike kuko umunyapolitiki ni wa wundi ureba ibifitiye abanyarwanda akamaro.”

“Ikindi ni uko tugomba kwibuka ko Ingabire ari hanze ku bw’imbabazi z’umukuru w’igihugu ariko ni umunyabyaha wahamijwe ibyaha n’urukiko mu Rwanda, ikigaragara rero ni uko n’ubundi agitsimbaraye ku byaha yakoze, dukwiye kumugaya ariko ibyo yakoze na we agomba kumenya ko bitihanganirwa mu Rwanda kandi agomba kwitegura kubibazwa n’amategeko.”

Ndayisaba yagiriye inama Ingabire yo guhinduka nk’abandi banyarwanda akayoboka inzira y’ubumwe n’ubwiyunge kuko ari cyo gishobora kumugirira akamaro, naho ibindi ngo bishobora kumushyira mu kaga.

Tom Ndahiro asanga Ingabire aberewe no kuba muri gereza

Umushakashatsi akaba n’umusesenguzi kuri Jenoside yakorewe Abatutsi, Tom Ndahiro, yabwiye IGIHE ko iyo urebye inyandiko ebyiri yamwanditseho agifungurwa, uyu munsi zemeza ko Ingabire ari umuntu mubi kandi ingengabitekerezo ya Jenoside afite idashobora kumwemerera kuba muzima.

Ati “Ntushobora kuba mu kintu cyashyigikiye Jenoside mu myaka irenga 10 ngo uzahinduke. Jenoside ubwo yabaga Ingabire ntabwo yari umwana kuko yari afite imyaka 25 kandi tuzi ko abantu bishe u Rwanda bari muri iyo myaka, ni ukuvuga ko ibyo akora byose arabizi.”

Ingabire ntiyigeze ahinduka

Ndahiro yavuze ko urugero rwa vuba rugaragaza ko Ingabire atigeze ahinduka ari uko yafashe inzu atuyemo akayisiga amabara ya FDU-Inkingi, icyo kikaba ari ikimenyetso gikomeye kigaragaza ko ibi ari ibintu bimurimo.

Ikindi ni uko ngo ubwe ubwo yahabwaga imbabazi na Perezida Kagame avuye muri gereza, yivugiye ko uko yagiye muri gereza ari nako avuyemo.

Yagize ati “Uyu munsi umbajije navuga ngo ‘Ingabire asubiye muri gereza niho hamubera niba ubuzima bwo kwigenga bwaramunaniye’, ubona ko we yumva ko uyu ari umwanya wo gukwirakwiza ingengabitekerezo ya Jenoside.”

Yasabye leta gufata inshingano kugira ngo Ingabire areke gukomeza kuroga abanyarwanda n’urubyiruko muri rusange.

CNLG yamaganye ibikorwa bya Ingabire

Umunyamabanga Nshingwabikorwa wa Komisiyo y’Igihugu yo kurwanya Jenoside (CNLG), Dr Bizimana Jean Damascène, avuga ko ishyaka rya Ingabire ritemewe mu Rwanda bityo atanemerewe gukoresha inama mu baturage.

Ati “Nta shyaka tuzi mu Rwanda riyobowe n’umuntu witwa Ingabire Victoire, ubwabyo rero ntabwo yagombye gukoresha inama rusange y’abaturage igamije ibikorwa bya politike bishingiye ku ishyaka ritariho”.

“Icya kabiri niba iyo nama yaranayikoresheje akavuga ko ashaka Abahutu gusa icyo ni cyo ni kimwe mu bikorwa gihanirwa n’itegeko rihana ingengabitekerezo ya Jenoside n’ibindi byaha bifitanye isano nayo kubera ko kurobonanura abantu ushingiye ku bwoko icyo ni icyaha, harimo ivangura n’irondakoko n’ingengabitekerezo ya Jenoside.”

Dr Bizimana yavuze ko gutandukanya abantu ushingiye ku bwoko biri muri kimwe mu bihanirwa kuko ushobora no gushakamo umugambi wo kugira ngo abo bantu bakorerwe Jenoside.

Yavuze ko niba Ingabire yarabikoze yishe Itegeko Nshinga ryatowe kandi rishyirwaho n’abanyarwanda, kikaba ari icyaha yagombye kubazwa.

Nyuma y’uko aya makuru asakariye, Ingabire yumvikanye hanze yamaganira kure ibyavuzwe, avuga ko ari ibihimbano bidafite aho bihuriye n’ukuri.

RIB iri gukora iperereza kuri Ingabire Victoire uvugwaho gushinga umutwe ugendeye ku moko /Ifoto: Muhizi Serge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza