Urwego rw’Ubutasi mu gisirikare cya Uganda bwashimuse Umupasiteri w’Umunyarwanda wanze kuyoboka Kayumba Nyamwasa

Yanditswe na Bukuru JC
Kuya 16 Mutarama 2021 saa 08:51
Yasuwe :
0 0

Urwego rw’ubutasi mu gisirikare cya Uganda, CMI, rukomeje ibikorwa byo gushimuta no gutoteza Abanyarwanda banze gukorana n’umutwe w’iterabwoba wa RNC uyoborwa na Kayumba Nyamwasa.

Ni ibikorwa CMI imazemo igihe kinini, aho ishimuta ndetse igahohotera Abanyarwanda banze gukorana na RNC, umutwe umaze igihe kinini ufitanye umubano wihariye na CMI.

Umunyarwanda uherutse guhura n’iri toteza ni Bishop Nyirimpeta Anasthase, uherutse gufatwa ku wa 20 Ugushyingo umwaka ushize, akajyanwa gukorerwa iyicarubozo ku buryo bivugwa ko ubuzima bwe bumeze nabi muri iyi minsi.

Nyirimpeta ni umwe mu batangije itorero rya ADEPR Ishami rya Uganda, ndetse akaba atuye muri icyo gihugu mu buryo bwemewe n’amategeko.

Ku rundi ruhande, bitewe n’uko abayoboke ba ADEPR Uganda bakoresha Ikinyarwanda, ndetse abenshi bakaba bafitanye isano n’u Rwanda, byatumye CMI ishaka uburyo yakwigarurira iri torero kugira ngo irikoreshe mu bikorwa byo gushakira abayoboke umutwe w’iterabwoba wa RNC.

Ni muri urwo rwego CMI yifuje guhindura ubuyobozi bw’itorero rya ADEPR Uganda hakajyaho abemera kuzafasha CMI muri ibyo bikorwa, ari nayo mpamvu iri Shami ry’Ubutasi mu gisirikare cya Uganda ryashatse ko Bishop Nyirimpeta ashyikiriza Rwanyamuzira John impapuro zimwemerera guhagararira ADEPR muri Uganda, ariko Nyirimpeta agatsemba.

Amakuru avuga ko mu gihe Rwanyamuzira yaramuka ahawe ubushumba bwa ADEPR Uganda, ashobora gufasha CMI mu bikorwa birimo gushaka abantu bazajya gufatanya n’umutwe w’iterabwoba wa RNC.

Nk’uko bisanzwe, ubwo abakozi ba CMI bajyaga gufata Nyirimpeta, bagiye nta mpapuro zibemerera gukora ibyo bikorwa bitwaje ndetse bamaze no kumuta muri yombi, nta mpamvu y’itabwa muri yombi bigeze basobanurira uyu mugabo.

Amategeko ya Uganda avuga ko mu gihe umuntu atawe muri yombi, agomba kuba yagejejwe imbere y’ubutabera mu gihe kitarenze amasaha 48 akiregura, gusa kuri Nyirimpeta si ko byagenze.

Amakuru avuga ko CMI ishyize imbaraga cyane mu kwigarurira ADEPR Uganda kuko bayibonamo amahirwe yo kuba icyambu cyavanwamo abarwanyi bajya gukorana n’inyeshyamba za RNC mu mugambi wapfubye wo gushaka guhungabanya umutekano w’u Rwanda.

Ni ibikorwa bimaze igihe kuko nko mu mwaka wa 2019, abakozi ba CMI bateye mu buryo butunguranye abayoboke b’itorero rya ADEPR Uganda riherereye mu gace ka Kibuye mu Mujyi wa Kampala bari gusenga, icyo gihe bafunga abantu 40 barimo abagore n’abana.

Umuyobozi Mukuru wa CMI, Gen. Maj. Abel Kandiho, afitanye imikoranire yihariye na RNC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .