Cimerwa Plc yungutse arenga miliyari 1.9 Frw mu mwaka ushize

Yanditswe na Ndahayo Emmanuel
Kuya 14 Ukuboza 2020 saa 08:20
Yasuwe :
0 0

Uruganda Nyarwanda rukora sima rwa Cimerwa Plc rwatangaje ko mu mwaka w’ingengo y’imari wa 2019/2020 rwinjije miliyari 63.5 Frw arimo inyungu rusange ingana na miliyari 13.5 Frw, mu gihe inyungu yabonetse nyuma yo gusora n’ibindi byangombwa yageze kuri miliyari 1.9 Frw, inyongera ya 1% ugereranyije n’umwaka ushize.

Iyi mibare yagaragajwe kuri uyu wa 14 Ukuboza 2019 ubwo CIMERWA yamurikaga raporo y’uko ubukungu bwayo bwari buhagaze mu mezi icyenda y’umwaka w’ingengo y’imari ushize.

Urwunguko uru ruganda rwabonye rutanga icyizere muri rusange, cyane cyane ku bashoramari bashya bifuza gushora imari yabo muri uru ruganda binyuze mu kugura imigabane ya Cimerwa Plc iri ku isoko ry’imari n’imigabane.

Uyu munsi kandi wabaye uwa mbere Cimerwa Plc yatangaje urwunguko rwayo nyuma yo kwiyandikisha ku isoko ry’imari n’imigabane kuva muri Kanama uyu mwaka.

Umuyobozi Mukuru wa Cimerwa Plc, Albert Segei, yavuze ko kugira ngo Cimerwa Plc igere kuri uyu musaruro byasabye imbaraga nyinshi cyane ko ibikorwa byinshi birimo n’ubucuruzi byahungabanyijwe n’ingaruka za Coronavirus, ku buryo nko mu bihe bya Guma mu Rugo ahagana muri Werurwe na Mata uyu mwaka, uru ruganda rwamaze iminsi 40 rufunze.

Kuri ibi kandi hiyongeraho ingorane zaherekejwe n’ibyo bihe zirimo kugorwa no kubona ibikoresho byo gukoramo sima bituruka hanze y’igihugu.

Segei yashimangiye ko babashije kwigobotora ibyo bibazo byose “kuko u Rwanda rwubatse ubushobozi bwo guhangana na Coronavirus kandi natwe nk’uruganda tukaba tumaze igihe twagura ubushobozi bwacu”.

Muri rusange, Cimerwa yakoze sima ingana na toni 421,000, ariko biba igitangaza muri Nyakanga uyu mwaka, ubwo uru ruganda rwakoraga toni 55,000 za sima ku kwezi, ari na yo nyinshi yakozwe mu kwezi kuva urwo ruganda rwashingwa.

Uretse igihembwe cya mbere cyaranzwe n’ibikorwa byo kuvugurura no gusana uruganda, umusaruro wa Cimerwa Plc wakomeje kwiyongera igihembwe ku kindi muri uyu mwaka, ndetse kuri ubu uru ruganda ruri gukora ku kigero cya 80% ugereranyije n’ubushobozi bwarwo bungana na toni 600,000.

Segei yakomeje ati “Dukwiye gukomereza aha ntitujye munsi, kugira ngo dukomeze duhaze isoko kandi twongere urwunguko.”

Inyungu ya Cimerwa ifitanye isano n’imishinga ikomeye y’ubwubatsi iri gushyirwa mu bikorwa, irimo imihanda n’amavuriro ndetse n’ibyumba by’amashuri birenga 22,000 biri kubakwa mu bice bitandukanye by’igihugu, aho uru ruganda rwacuruje kuri leta toni zirenga 8,000 zakoreshejwe muri iyi gahunda.

Segei avuga ko nk’abikorera, Cimerwa Plc “yashimishijwe n’umusanzu w’uruganda rwacu wo kugoboka igihugu mu gihe kidukeneye”.

Yavuze ko uru ruganda rwakuye amasomo akomeye mu bihe bya Coronavirus, birimo gushyiraho uburyo bwo kugabanya ikiguzi uru ruganda rukoresha mu gutunganya sima, kigaragazwa nk’ikikiri hejuru kuko kirenga miliyari 42 Frw.

Iki kiguzi kizamurwa cyane n’ibikoreshwa mu gutunganya umuriro n’ubushyuhe muri uru ruganda, byihariye hafi 60% by’iki kiguzi cyose. Icyakora ubuyobozi bwa Cimerwa buvuga ko “burajwe ishinga no gukomeza kuvugurura imikorere no guhanga udushya tuzatuma tugabanya igiciro dukoresha mu ikorwa rya sima dushyira ku isoko.”

Impamvu ibi ari ingenzi cyane, ni uko Cimerwa Plc iramutse ibashije kugabanya ibyo ikoresha mu ikorwa rya sima, byakongera urwunguko rwayo, ari na rwo ruzakurura abashoramari ku isoko ry’imari n’imigabane.

Ibi kandi binagabanya ikiguzi cya sima ku isoko, ku buryo bishobora kongera ingano ya sima icuruzwa kuko iba ihendutse, ariko by’umwihariko, bikanagabanya ikiguzi cyo kubaka mu gihugu, ibintu bishobora kugira uruhare rukomeye mu iterambere ry’igihugu muri rusange, kuko iyo urwego rw’ubwubatsi ruteye imbere, binateza imbere izindi nzego nyinshi zirushamikiyeho.

Segei yagaragaje ko Cimerwa Plc itewe ishema no kuba yaratanze umusanzu wayo mu guhangana n’ingaruka za Coronavirus, dore ko uru ruganda rwatanze agera kuri miliyoni 70 Frw muri rusange mu gufasha abaturage kwigobotora ingaruka batewe n’iki cyorezo.

Hashize amezi ane Cimerwa Plc yanditswe ku isoko ry’imari n’imigabane ry’u Rwanda (RSE), icyakora uru ruganda ntirurabasha kugurisha imigabane myinshi bitewe ahanini n’uko rumaze igihe gito ku isoko.

Umuyobozi Mukuru wa RSE, Pierre Célestin Rwabukumba, yavuze ko abashoramari basanzwe bari mu bihe bikomeye batewe n’ihungabana ry’ubukungu kubera Coronavirus, na bo bakiri kwiga imikorere y’uruganda ngo banarebe ko rwunguka, mbere yo gufata icyemezo cyo kurushoramo imari.

Ku ruhande rwa Segei, agaragaza nta gikwiye gutera abashoramari impungenge kuko iyagurwa rya Cimerwa Plc ridateze gusubira inyuma. Ibi abishingira ku mikorere ya Cimerwa Plc ikomeje gutanga umusaruro, ariko nanone imiterere y’isoko ry’u Rwanda ikaba itanga icyizere cy’uko sima izakomeza gukenerwa cyane mu myaka iri imbere.

Sima ikenerwa mu Rwanda iri hagati ya toni ibihumbi 700 na 800 ku mwaka, mu gihe Cimerwa Plc ishobora gukora ingana na toni 600,000 ku mwaka. Ugukenerwa kwa sima kandi kuzashingira ku iyagurwa ry’imijyi, rizatuma n’iyubakwa ryayo ryiyongera.

Nko mu mwaka wa 2024, leta iteganya ko abatuye mu mijyi bazaba bageze kuri 34% bavuye kuri 17% bariho uyu munsi, ibi kandi bikazakomeza kwiyongera uko imyaka ishira.

Segei yagize ati “Umurongo w’imikorere wacu utanga umusaruro, [kandi] dufite abakozi bafite ubunararibonye n’abayobozi bafite ubushake n’uburyo bw’ubucuruzi buteye imbere cyane tutibagiwe abafatanyabikorwa bacu baduhora hafi.”

Uyu muyobozi kandi ahamya ko Cimerwa Plc ifite ibikenewe byose kugira ngo ikomeze kuyobora isoko rya sima mu Rwanda.

Ati “Iyo ubyongeyeho ko ari twe ruganda rugari rukora sima mu Rwanda, biduha amahirwe yo gukomeza kuyobora isoko rya sima mu Rwanda.”

Hagati aho, ibyo kuba uruganda rukumbi rukora sima mu Rwanda byashyizweho iherezo kuko mu Majyaruguru y’u Rwanda hari urushya na rwo ruzajya rukora rukanacuruza sima.

Cimerwa Plc yerekana ko bitayiteye ikibazo kuko yizeye ibikorwa na serivisi itanga ariko igashima ko bizatuma Abanyarwanda bihaza mu kugira sima nyinshi.

Iti “Ibyo nta cyo bidutwaye, natwe twakwishimira ko sima yose ikoreshwa mu Rwanda inahakorerwa, ndetse twanagize uruhare mu gufasha ruriya ruganda, turuha sima yarwubakiye uruganda ndetse twanarufashije mu bindi birimo tekiniki.”

Segei yavuze ko ibanga rya Cimerwa Plc ari ugufata neza abakiliya bayo, ati “mu by’ukuri ni zo mbaraga ziri inyuma y’iterambere ryacu, turabashimira cyane.”

Cimerwa Plc itangaza ko yongereye ubushobozi bw'uruganda rwayo ku buryo byanongereye umusaruro rutanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .