00:00:00 IGIHE NETWORK KN KINYARWANDA EN ENGLISH FR FRANCAIS

CHENO yasabye urubyiruko kudasiganira kubaka igihugu

Yanditswe na Ntabareshya Jean de Dieu
Kuya 25 Mutarama 2023 saa 07:57
Yasuwe :

Urwego rw’Igihugu rushinzwe Intwari, Imidali n’Impeta by’Ishimwe (CHENO), rwasabye urubyiruko guharanira gutanga umusanzu mu iterambere ry’igihugu, kurangwa n’umuco w’ubutwari n’imyitwarire myiza.

Ibi byagarutsweho n’Umuyobozi ushinzwe Ubushakashatsi muri CHENO, Rwaka Nicolas mu kiganiro na RBA, ubwo yagarukaga ku byo urubyiruko rusabwa mu guharanira kubaka igihugu.

Yagize ati “Bagomba kumenya ko iki gihugu cyubatswe n’abana b’u Rwanda kandi kizakomeza kubakwa na bo. Bamenye ko iki gihugu nta we bagisiganira. Ikindi ni ukwigira ku ntwari zababanjiririje ndetse bakigira ku buyobozi buriho.”

Yavuze ko urubyiruko rukwiye guharanira kurangwa n’umuco w’ubutwari ndetse rukanazirikana agaciro k’ubumwe bw’Abanyarwanda.

Ati “Iyo urangwa n’umuco w’ubutwari ubanza kureba ibiri mu nyungu rusange. Ugomba kuba kandi azi agaciro k’ubumwe bw’Abanyarwanda mu guhuza imbaraga, ni cyo twifuza kandi buriya abahuje imbaraga n’ubundi barajyana."

Tariki ya 1 Gashyantare u Rwanda ruzizihiza Umunsi w’Intwari ku nshuro ya 29, ku nsanganyamatsiko igira iti ‘Ubutwari bw’Abanyarwanda, agaciro kacu’.

Shumbusho Augustin, umwe mu bashinze Umuryango w’Urubyiruko utari uwa Leta wita ku bana bahoze ku Muhanda, OHOD IHUMURE, yavuze ko kuwutangira babikomoye ku bwitange bwaranze Intwari z’u Rwanda.

Ati "Ni ukwigomwa kuko intwari ifite icyo iba yigomwe buri gihe, rero navuga ko natwe twigomwe kwa kwinezeza kose kugira ngo tubonere aba bana umwanya n’ubushobozi."

Ishimwe Teddy ni umwe mu bana bakiri mu ishuri wifatanyije na bagenzi be bagashinga umuryango ugamije gufasha abana bafite ubumuga yagaragaje ko na bo bafite umusanzu batanga.

Yagize ati “Nubwo bafite ubumuga ariko bazakorera igihugu mu mbaraga zabo bafite. Ni yo mpamvu natwe twavuze ngo reka tubafashe bazamuke bagere aho bagera kuko na bo ni ari nka twe.”

Urwego rw’Igihugu rushinzwe Intwari z’Igihugu, Imidari n’Impeta by’ishimwe rugaragaza Umunsi w’Intwari uzarangwa n’ibikorwa bitandukanye bizabera mu midugudu yose, hakaba hazatangwa ibiganiro bigamije kurushaho kubaka ubutwari mu Banyarwanda.

Umuyobozi ushinzwe Ubushakashatsi muri CHENO, Rwaka Nicolas, yavuze ko urubyiruko rukwiye kurangwa n'imyitwarire myiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .