Charles Onana na Vincent Hervouet basabiwe kugezwa imbere y’ubutabera

Yanditswe na IGIHE
Kuya 9 Ugushyingo 2019 saa 11:06
Yasuwe :
0 0

Umuryango ufasha mu gukurikirana no kugeza mu nkiko abahakana bakanapfobya Jenoside yakorerwe Abatutsi ‘Umurinzi Initiative’ watangaje ko wifuza ibisobanuro byimbitse kuri Televiziyo LCI yo mu gihugu cy’u Bufaransa ku mpamvu z’ikiganiro umwanditsi w’ibitabo Charles Onana yayinyujijeho.

Uvuga ko umunyamakuru wayo, Vincent Hervouet wamwakiriye mu kiganiro yafatwa nk’umufatanyacyaha mu guhakana no gupfobya Jenoside yakorewe Abatutsi.

Ku wa Gatandatu, tariki 26 Ukwakira 2019, nibwo umunyamakuru Vincent Hervouet wa Televiziyo y’Abafaransa LCI y’Ishyirahamwe TF1, yakiriye Charles Onana, mu kiganiro ‘Tout un Monde’ aho yaganiraga n’umunyamakuru Vincent Hervouët ku gitabo yanditse kuri ‘Operation Turquoise’.

Muri icyo kiganiro, kijya kurangira nibwo yeruye avuga ko nta Jenoside yabayeho yakorewe Abatutsi mu Rwanda, yongeraho ko nta n’indi Jenoside yabayeho kuva 1900 kugeza 1994.

Umuryango ufasha mu gukurikirana no kugeza mu nkiko abahakana bakanapfobya Jenoside yakorerwe Abatutsi ‘Umurinzi Initiative’ watangaje ko kiriya kiganiro cyabaye urubuga rusesuye rwo gukwirakwiza ubutumwa bupfobya bukanahakana Jenoside yakorewe Abatutsi muri 1994.

Itangazo washyize ahagaragara rigira riti “Charles Onana asanzwe azwiho gupfobya no guhakana Jenoside yakorewe Abatutsi abinyujije mu bitabo yandika. Igishya ni uko Televiziyo yubashywe kandi ikurikirwa cyane n’abantu benshi yemeye kuba umufatanyacyaha mu gupfobya no guhakana Jenoside, kandi izi neza uburemere bwabyo.”

Mu kiganiro yakoze, Charles Onana avuga ko yakoze inyigo yo mu rwego rwo hejuru, akoresheje inyandiko zashyizwe ahagaragara na Leta y’u Bufaransa, agakora n’ubushakashatsi bwimbitse kugira ngo yandike igitabo yise “Rwanda, la verite sur l’operation Turquoise”.

Gusa uyu muryango wemeza ko ari iturufu yo kumvikanisha ibitekerezo bye by’ubuhakanyi, yiyita inararibonye mu Karere k’ibiyaga bigari no gukoresha imbaraga nyinshi ngo yumvikanishe ibitekerezo bye mu Bufaransa.

Igitabo avuga yanditse kuri ‘Operation Turquoise’ ngo ni igitabo yaterateranyije akoresheje ibyo asangiye n’abandi bahakana bakanapfobya Jenoside yakorewe Abatutsi, nka Judi River, Pierre Pean (uherutse gupfa), Robin Philipot, Peter Verlinden, Luc Marchall n’abandi.

Charles Onana ashyigikira ko Jenoside yakorewe Abatutsi itateguwe, akavuga ko imbarutso yabaye Indege ya Habyarimana yahanuwe akabigereka kuri FPR, akiyibagiza Akanama k’impuguke z’Abafaransa n’Abongereza hamwe n’igisobanuro kizwi cya Jenoside yateguwe neza, igakorerwa Abatutsi.

Muri iryo tangazo ‘Umurinzi initiative’ usanga umunyamakuru Vincent Hervouet wahaye Onana ijambo yafatwa nk’umufatanyacyaha.

Rikomeza riti “Abayobozi ba Televiziyo LCI basobanura bisesuye impamvu y’ikiganiro cya Onana kandi bakerekana icyo batekereza ku munyamakuru wayo Vincent Hervouet ndetse bakaba bamuhanira ubufatanyacyaha mu gupfobya no guhakana Jenoside yakorewe Abatutsi.”

Charles Onana agerageza kugaragaza ko ngo hari indi Jenoside yakorewe abahutu. Ibitekerezo bye abinyuza mu bitabo, mu biganiro mbwirwaruhame, kuri radiyo na televiziyo aho aba yatumiwe.

Charles Onana ni umugabo ukomoka mu gihugu cya Cameroun akaba afite n’ubwenegihugu bw’u Bufaransa.

Umurinzi Initiative ushimangira bidasubirwaho ko uretse ibisobanuro by’abayobozi ba Televiziyo, Charles Onana na Vincent Hervouet bombi bagomba kugezwa imbere y’ubutabera.

Kugeza ubu icyaha cya Jenoside cyahamye abantu batatu baba mu Bufaransa; Pascal Simbikangwa, Tito Barahira na Ngenzi Octavien. Ibirego ku bantu 25 bakoze jenoside byashyikirijwe inkiko z’u Bufaransa, guhera muri 1995.

U Bufaransa bwashyizeho italiki ya 7 Mata ya buri Mwaka nk’umunsi wo kwibuka Jenoside yakorewe abatutsi muri 1994. Ibi bituma hibazwa uburyo Televiziyo y’Abafaransa inyuranya n’icyo cyemezo igaha urubuga abapfobya bakanahakana Jenoside.

Guhera mu 2017 kandi mu Bufaransa hashyizweho itegeko rihana umuntu wese uzajya ahakanira Jenoside yakorewe Abatutsi ku butaka bw’icyo gihugu.

Iri tegeko rihanisha icyaha cy’ihakana n’ipfobya rya Jenoside yakorewe Abatutsi igifungo cy’umwaka umwe n’ihazabu y’amayero 45000. Iri tegeko riteganya kandi ingingo iha uburenganzira amashyirahamwe yose arengera abarokotse gukurikirana mu nkiko abantu bose bahakana jenoside cyangwa se bakayipfobya, mu gihe cyose ubushinjacyaha butabikoze cyangwa buzaririye mu kubakurikirana.

Charles Onana uzwiho guhakana no gupfobya Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza