CBS Rwanda yashimye umusaruro mu isanamitima yakuye mu kwezi kwahariwe ubumwe n’ubwiyunge

Yanditswe na IGIHE
Kuya 8 Ugushyingo 2019 saa 09:50
Yasuwe :
0 0

Umuryango utari uwa Leta wimakaza gahunda ya ‘Mvura Nkuvure’, Community-Based Sociotherapy (CBS), wishimira umusaruro wakuye mu bikorwa bitandukanye wakoze mu kwezi kw’ubumwe n’ubwiyunge, nkaho bumvise imitekerereze y’urubyiruko ku rugendo rw’ubumwe n’ubwiyunge.

Buri mwaka mu kwezi k’Ukwakira Komisiyo y’Ubumwe n’Ubwiyunge itegura ibikorwa byahariwe ubumwe n’ubumwe, bigendanye n’amateka u Rwanda rwaciyemo ya Jenoside yakorewe abatutsi mu 1994 igatwara ubuzima bw’abantu benshi ndetse n’ibikomere ku bayirokotse.

CBS nayo nkuko biri mu nshingano zayo z’isanamitima n’ubumwe n’ubwiyunge, yakoze ibikorwa bitandukanye mu kwezi kwahariwe ibikorwa by’ubumwe n’ubwiyunge, byibanze ku guhuza abaturage n’abayobozi, guhuza abayobozi n’abagororwa, ibi byose byakorewe mu Karere ka Gasabo.

Karangwa Diogène, Umuyozi w’umushinga umwe ushyirwa mu bokorwa na CBS, avuga ko bishimira umusaruro bakuye mu kwezi kwahariwe ibikorwa by’ubumwe n’ubwiyunge, nk’aho abayobozi babashije kumva ibibazo by’abagororwa no kumenya icyo urubyiruko rutekereza ku rugendo rw’ubumwe n’ubwiyunge.

Ati “Kimwe twishimira ni uko abayobozi batandukanye babashije kumva abagororwa, abagororwa banabasangiza ibibazo bafite. Nubwo ari abagororwa tugomba kububakamo abantu beza bazubaka umuryango nyarwanda mu gihe kizaza kuruta uko baza kuwusenya.”

“Byatubereye umwanya wo kumenya uburyo urubyiruko rubona urugendo rw’ubumwe n’ubwiyunge, tumenya uburyo babona imbogamizi zirimo, cyane ko hari bamwe bagaragaje amakimbirane urubyiruko ruhura nayo mu gihe bari gutekereza gushaka. Twishimiye kandi ko amadini yatubwiye ko agiye kugira urugendo rw’ubumwe n’ubwiyunge urwabo bakarushyira no muri gahunda zabo za buri munsi.”

Bimwe mu bikorwa CBS yakoze harimo guhuriza hamwe amatsinda yabaga agizwe n’abantu 15 bafite amateka atandukanye, yaba abacitse ku icumu rya Jenoside yakorewe Abatutsi, abafunguwe n’imiryango yabo, bakaba baraganiraga hagati yabo, bagasangizanya amateka n’ubuhamya ndetse n’ibikomere bagize.

CBS ihamya ko ibi biganiro byabafashije mu rugendo rw’ubumwe n’ubwiyunge, kubabarira n’isanamitima.

Ikindi nuko CBS yateguye amarushanwa mu rubyiruko rwiga mu ishuri rya APAER. Amatsinda akaba yararushanwaga mu ndirimbo, imivugo, n’inkuru zishushanyije byose byagarukaga ku nzira y’urugendo rw’ubumwe n’ubwiyunge.

Aha buri tsinda ryahigaga andi muri buri cyiciro ryahembwaga ibihumbi 20Frw naho irya Kabiri rigahabwa ibihumbi 10Frw.

CBS ku bufatanye n’akarere ka Gasabo, bahuje abayobozi b’inzego zibanze mu mirenge 15 igize ako Karere n’abagororwa bafungiye muri gereza ya Nyarugenge muri gahunda bari bise ‘Ngwino Unyumve’. Iyi gahunda yari igamije kumva ibibazo abagororwa bafite, kugira ngo bazabashe kuba bakwibona muri sosiyete mu gihe bafunguwe.

Ikindi nuko abayobozi basabwe gukemura ibibazo by’imiryango aba bagororwa baba baturukamo mu rwego rwo kwirinda ko byatuma bongera kwisanga mu bindi byaha, ndetse no kubafasha no gusubizwa mu buzima busanzwe.

CBS ku bufatanye n’akarere ka Gasabo bahuje abahagarariye amadini atandukanye mu Rwanda basabwa gushyira gahunda y’ubumwe n’ubwiyunge muri gahunda zabo za buri munsi ndetse bakanabwigisha abayoboke bayo.

CBS yishimira umusaruro bakuye mu kwezi kwahariwe ibikorwa by’ubumwe n’ubwiyunge, nk’aho abayobozi babashije kumva ibibazo by’abagororwa
Bimwe mu bikorwa CBS yakoze harimo guhuriza hamwe amatsinda yabaga agizwe n’abantu 15 bafite amateka atandukanye, yaba abacitse ku icumu rya Jenoside yakorewe Abatutsi, abafunguwe n’imiryango yabo, bakaba baraganiraga hagati yabo
CBS ihamya ko ibiganiro byatanzwe ku bagororwa byabafashije mu rugendo rw’ubumwe n’ubwiyunge, kubabarira n’isanamitima.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza