Carnegie Mellon University igiye gutaha icyicaro cyayo gishya muri Kigali Innovation City

Yanditswe na Rabbi Malo Umucunguzi
Kuya 17 Ugushyingo 2019 saa 03:23
Yasuwe :
0 0

Carnegie Mellon University Africa igiye gutaha icyicaro cyayo gishya cyubatswe mu gice cyahariwe inganda i Masoro mu Karere ka Gasabo, mu rwunge rw’ibikorwaremezo bigezweho bizaba bigize umushinga uzwi nka Kigali Innovation City (KIC).

KIC ni umwe mu mishinga y’u Rwanda igize icyerekezo 2020 ugamije kuzamura urwego rw’ikoranabuhanga mu gihugu, ukazatwara miliyari $2. Ugizwe n’inyubako zizacumbikira kaminuza mpuzamahanga, ibigo by’ikoranabuhanga, inyubako z’ubucuruzi n’ibindi, ukazubakwa ku buso bwa hegitari 70.

Carnegie Mellon igiye kubimburira ibindi bigo bizaba bigize uyu mushinga, aho yujuje inyubako idasanzwe bibarwa ko yatwaye miliyoni hafi 10 z’amadolari.

Izindi nyubako zigize umushinga wa Kigali Innovation City zirimo icyicaro cya African Leadership University (ALU), nayo mu minsi ishize yatangiye kuzamura inyubako yayo.

IGIHE yabonye ubutumwa butumira abantu mu gutaha ku mugaragaro icyicaro gishya cya kaminuza ya Carnegie Mellon, “giherereye muri Kigali Innovation City, ku wa 21 Ugushyingo 2019 saa tatu za mu gitondo.”

Bukomeza buti “Iyi kaminuza yakoreraga muri Telecom House ku Kacyiru, icyicaro gishya kingana na metero kare 6000 gishobora kwakira abanyeshuri basaga 300. Kizaba kirimo laboratwari zikubye kabiri izisanzwe, ibikorwa remezo bigezweho kandi byorohereza buri wese n’ikoranabuhanga rifasha kwiga mu buryo bw’iyakure, gukorana inama abantu batari kumwe, guhuza CMU-Africa n’abashakashatsi bakomeye n’ibice bitandukanye byigirwamo.”

Iri shami rya Kaminuza y’Abanyamerika ya Carnegie Mellon ryatangiye nyuma y’inama ya Connect Africa yabereye mu Rwanda mu 2007, hagafatwa icyemezo ko hakwiye kwigishwa ibijyanye n’ikoranabuhanga. Byaje gushyirwa mu bikorwa mu mwaka wa 2012 itangizwa ku mugaragaro.

U Rwanda ku nkunga ya Banki Nyafurika Itsura Amajyambere (AfDB) rwabaye urwa mbere mu Karere rwatangije ishami ry’iyi kaminuza. Yigiramo abanyeshuri bo mu bihugu bya Afurika, mu cyiciro cya gatatu cya Kaminuza mu ikoranabuhanga.

Umunyeshuri wiga muri CMU ari muri Leta zunze Ubumwe za Amerika yishyura ibihumbi $48, ariko abigira i Kigali bishyuzwa ibihumbi $16. Umunyarwanda yishyuzwa ibihumbi $8 nayo akayishyurirwa n’inkunga ya leta.

Kugira ngo Umunyarwanda yemererwe kwiga muri iyi kaminuza asabwa kuba yaratsinze ku rwego rwo hejuru muri kaminuza, ariko na CMU ikamukoresha ibizamini byayo birimo n’icy’Icyongereza.

Amasomo atangirwa muri iyi kaminuza ni ajyanye n’ikoranabuhanga, mu cyiciro cya gatatu cya Kaminuza (Masters’ Degree) mu mashami arimo Electrical and Computer Engineering na Information Technology.

Ku bijyanye n’ibindi bikorwa bishya bizajya mu mushinga wa KIC, Guverinoma y’u Rwanda iheruka kwemeranya n’ikigega gitera inkunga imishinga y’ibikorwa remezo ku mugabane wa Afurika, Africa50, ku masezerano afite agaciro ka miliyoni $400 yo kunoza no gutera inkunga uyu mushinga.

Ikigo cy’Igihugu cy’Iterambere, RDB na Africa50 bazashyiraho ikigo gishya banakorane n’abafatanyabikorwa mu kunoza, gutera inkunga no kubyaza umusaruro umushinga wa KIC. Guverinoma y’u Rwanda izatanga ibikorwa bizatuma utangira nk’ubutaka bwo kubakaho, n’ibindi by’ibanze nk’imihanda, amashanyarazi n’ibindi.

RDB na Guverinoma y’u Rwanda kandi bazakurikirana ko iby’ibanze byashyizweho mu korohereza uyu mushinga, nko mu bijyanye n’imisoro n’ibindi byatuma abikorera bawubona nk’umushinga bashyiramo amafaranga yabo.

Icyicaro gishya cya CMU cyubatswe mu buryo bugezweho
CMU ifite ikibuga gito gishobora gukorerwamo ibirori hicaye neza abantu 500
Icyicaro cya Carnegie Mellon University cyubatswe na Leta y'u Rwanda
Icyumba cya Carnegie Mellon University i Kigali, abanyeshuri bashobora kwicaramo bakigishwa n' umwarimu uri muri Amerika
Inyubako ya CMU irimo ikoranabuhanga rituma amazi arimo aba yamaze kuyungururwa umuntu agahita ayanywa
Iyi nyubako ya CMU ifite ubushobozi bwo kwakira abanyeshuri basaga 300
Umushinga w'icyicaro cya Carnegie Mellon University i Kigali wakozwe na RDB

Amafoto: Moses Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza