Bwa mbere i Iwawa hageze itumanaho rya telefoni kubera umunara mushya wa MTN

Yanditswe na Mukwaya Olivier
Kuya 15 Ukuboza 2019 saa 09:19
Yasuwe :
0 0

Sosiyete y’itumanaho ya MTN Rwanda yagejeje Ku kirwa cya Iwawa kiri mu Kiyaga cya Kivu mu Karere ka Rutsiro, umunara wa mbere w’itumanaho ugiye gukemura imbogamizi zabagaho mu guhanahana amakuru no gukoresha ikoranabuhanga mu kugorora urubyiruko.

Abakozi bakorera kuri iki kirwa, n’akanyamuneza, bavuga ko uyu munara ugiye kubafasha mu kazi ka buri munsi by’umwihariko bakava mu bwigumge kuko ubu bagiye kujya bavugana n’imiryango yabo.

Mukasine Libérée ukorera kuri iki kirwa nk’umujyanama, yagize ati "Twanezerewe kuko nubwo dukorera hano, imiryango yacu iba idukeneye. Byagoranaga kubavugisha, n’iyo twazaga hano ntibamenyaga ko twahageze. Turashima Imana, MTN iradufashije ubu n’imiryango yacu igiye gutuza kuko ubu bagiye kumenya ko dukorera ahantu hatari habi."

Habimana Vénuste, umuganga w’indwara zo mu mutwe, yagize ati ’’Byari bigoranye kuvugana n’imiryango yacu nabo badushaka ntituboneke, no mu kazi gasanzwe mu ikoranabuhanga ntabwo twamenyaga ubumenyi aho bugeze, wasangaga telefoni yacu yibereyemo amasosiyete yo muri Congo. Uyu munara uzadufasha no kongera ubumenyi bwacu n’urubyiruko rujye rubasha kuvugisha imiryango yabo.’’

Umunyamabanga wa Leta muri Minisiteri y’Ubutegetsi bw’Igihugu, ushinzwe imibereho myiza y’abaturage, Nyirarukundo Ignacienne, yashimye MTN, asaba abazakoresha uyu munara kubyaza umusaruro amahirwe babonye.

Ati "Ndashimira MTN kuko hano hari urubyiruko, hari abakozi wibaza uti ’bavugana n’abandi gute, habaye ikibazo byagenda gute’, ni cyo kibazo ubu gikomeye."

Umuyobozi Mukuru w’Ikigo k’Igihugu gishinzwe igororamuco, Bosenibamwe Aimé, yavuze ko uyu munara uje gukemura ikibazo cy’itumanaho Ikigo cya Iwawa cyari gifite, aho bitorohaga guhanahana amakuru hagati y’ababyeyi n’abana.

Ati "Hano dufite abana 4000 barimo kugororwa, byagoraga abarimu kuko nta kuvugana no hanze byabaga hano, ntabwo washoboraga kuvugisha umwarimu hano nta nubwo umubyeyi yashoboraga kubaza amakuru y’umwana we, n’umutekano wari ugoranye kuko hagize ikiba byasaba ko uhamagara uwo ariwe wese nko mu munota umwe ukamubona, ariko ntibyashobokaga."

"Ubu birashoboka ko umwana ashobora kuganira n’umubyeyi we bidasabye ko ababyeyi 4000 baza n’ubwato.’’

Umuyobozi ushinzwe ibikorwa muri MTN Rwanda, Yvonne Mubirigi, avuga ko atari ubucuruzi ahubwo ari umusanzu wa MTN ku iterambere, uyu munara ukaba uje kuvana mu bwigunge abantu baba n’abakorera i Iwawa.

Ati ’’Iri tumanaho ni amajyambere, ni ugukura umuntu mu bwigunge rwose kuko nko kubona umuntu aje i Iwawa ntabashe kuvugana n’undi, ntibabashe gukoresha mudasobwa. ubu bakaba babashije kubibona, uyu munara ntabwo ari uwo kugurisha ni umusanzu wa MTN mu gufatanya mu iterambere ry’igihugu.’’

Uyu munara watwaye miliyoni 100 Frw, ukaba ubimburiye indi 66 MTN yasabwe n’Urwego Ngenzuramikorere, RURA, kuhubaka mu gihembwe cya mbere cya 2020.

Abayobozi bafata ifoto y'urwibutso nyuma yo gutaha umunara
Bosenibamwe, Umunyamabanga wa Leta Nyirarukundo n'umuyobozi uhagarariye MTN Rwanda bafungura umunara ku mugaragaro
Uhagariye MTN yavuze ko uyu munara ubimburiye indi 66 irimo kubakwa na MTN
Ukigera ku kirwa uhita ubona uyu munara
Uyu munara watwaye miliyoni 100 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza