Burera: Imiryango yakuwe mu kizima yahize kwiteza imbere ikoresheje amashyanyarazi

Yanditswe na N.Kubwimana Janvière
Kuya 14 Ukwakira 2019 saa 08:49
Yasuwe :
0 0

Abaturage bo mu Kagari ka Nkumba mu Murenge wa Kinoni mu Karere ka Burera bahize ko bagiye kwesa umuhigo wo kwiteza imbere nyuma yo kuvanwa mu icuraburindi bagahabwa umuriro w’amashanyarazi.

Iyi mihigo bayihize ku wa 13 Ukwakira 2019 ubwo ingo 98 zahabwaga amashanyarazi na Sosiyete y’u Rwanda Ishinzwe Ingufu (REG), muri gahunda yihaye yo kongera umubare w’Abanyarwanda ageraho.

Abaturage bahawe amashanyarazi bavuze ko bateye intambwe idasanzwe mu buzima bwabo izabafasha gukora imishinga bitabasabye gukora ingendo ndende.

Bagirimbikira Théogène yagize ati “Ubu ntiwareba ku mutima ibyishimo ni byinshi, twari twaraheze mu icuraburindi, wakeneraga gukoresha urugi ugakora urugendo rw’ibilometero bibiri, twari twaragowe.

Yakomeje avuga ko agiye gutangira ishoramari ry’ubworozi bwa kijyambere. Ati “Ndahita ngura icyuma gituraga amagi ubundi norore kandi noroze abandi inkoko za kijyambere, uyu ni wo mwanya tubonye ngo twiteze imbere.”

Sinzumunsi Mathias w’imyaka 59 y’amavuko yabwiye IGIHE ko amashanyarazi bahawe azahindura ubuzima bwabo.

Ati “Ni igitangaza kuri uyu musozi kuba ducanye amashanyarazi, bwiraga tukamurikisha imbingo n’udutadowa ubu hehe nabyo. Icya mbere ni uko ngiye guhita ngura imashini yogosha nkajya mbikorera aha mbifatanije no gusudira. Bizanatuma urubyiruko rwajyaga mu mujyi gushaka akazi kubera ko nta muriro tugira rutongera kugenda, mudushimire Paul Kagame wacu utwibutse.”

Umukozi wa REG ushinzwe abakozi, Geofrey Zawadi, yavuze ko gahunda bihaye ari ugufasha urubyiruko by’umwihariko gukora imishinga ibyara inyungu.

Yagize ati “Umuhigo twahawe na Perezida Paul Kagame ni uko mu 2024 buri muturage azaba afite amashanyarazi, ahageze umuriro hakurikiraho iterambere ryihuse. Ibi bizafasha abaturage cyane urubyiruko kwihangira imirimo bakayikorera iwabo mu byaro bidasabye ko bajya mu mijyi bakurikiye aho umuriro uri, iyi mihigo irakomeye ariko kandi irashoboka, ubu twatangiye gahunda ya kora ndebe.”

Gahunda yo gutanga amashanyarazi yahuye n’iyo gusoza icyiciro cya kabiri cy’Itorero ku bakozi ba REG bagera ku 199, bari bamaze icyumweru mu Kigo cy’Ubutore cya Nkumba mu Karere ka Burera.

Kugeza ubu hamaze gutozwa abagera kuri 278, bikaba biteganyijwe ko abakozi bose ba REG uko basaga 1000 bazanyura mu itorero.

U Rwanda rwihaye intego ko ingano y’amashanyarazi iziyongera akava kuri MW 224.6 akagera kuri MW 556, ndetse abaturarwanda bose bakayagezwaho ku gipimo cya 100% bitarenze 2024.

Abakozi ba REG bagize uruhare mu gutanga amashanyarazi ku baturage b'i Burera
Abaturage bo mu Kagari ka Nkumba mu Murenge wa Kinoni batangiye gukanda ku gikuta bacana
Abakozi ba REG bitabiriye igikorwa cyo gutanga amashanyarazi ku baturage bo mu Murenge wa Kinoni muri Burera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza