00:00:00 IGIHE NETWORK KN KINYARWANDA EN ENGLISH FR FRANCAIS

Burera: Girinka yamuhinduriye ubuzima, aho atuye bamwita umukire

Yanditswe na Ndikumwenayo Thierry
Kuya 10 Mutarama 2023 saa 05:45
Yasuwe :

Hambere aha mu myaka isaga gato 10, Gakwenza Servilien, yari umwe mu baturage bakennye cyane ku rwego rwo kujya gufata ifu y’igikoma n’isukari ku kigo nderabuzima kugira ngo abana yabyaye na we baramuke kabiri.

Bwari ubuzima bushaririye cyane uyu muturage wo mu mudugudu wa Byorera, Akagari ka Tumba, Umurenge wa Bungwe mu Karere ka Burera, yabagamo. Yategerezaga imfashanyo akaniyandayanda agakora imirimo iciriritse ngo abone uko aramuka. Tekereza nawe umuturage wo mu cyiciro cya mbere cy’ubudehe mu myaka 15 ishize.

Kimwe nk’abandi banyarwanda, gahunda ya Girinka yageze kuri Gakwenza mu 2008, arayorora, ayifata neza imubyarira umusaruro mu ngeri zinyuranye ku buryo uyu munsi hari abamwita umukire kubera urwego agezeho abikesha inka.

Mu kiganiro yagiranye na IGIHE, Gakwenza yahishuye ko ubuzima yari abayemo bwari ku rwego rwo kujya ku kigo nderabuzima gufata ifu ya Sosoma n’isukari. Nyuma yo guhabwa inka imibereho yarahindutse.

Ati “Noneho bamaze kumpa inka nakomeje kubifata ariko imaze kubyara nahise ndekera aho, mu muryango dutangira kunywa amata. Nari nkennye wumve ngo nari nkennye!”

Nyuma yo guhabwa inka ndetse akanaziturira undi muturage nk’uko bisanzwe bigenda muri iyi gahunda ya Girinka, yatangiye urugendo rw’iterambere. Buri uko inka yabyaraga, inyana yamaraga gukura akayigurisha akagura umurima.

Ushobora kumva ari igitangaza kugurisha inka ukagura umurima. Ibi kuri Gakwenza si igitangaza, umurima wa mbere yawuguze ibihumbi 90Frw. Uwo aheruka yawuguze ibihumbi 500Frw, ni mu mwaka ushize wa 2022.

Ati “Ubu maze kugira imirima itatu n’amashyamba atatu; byose mbikesha gahunda ya Girinka. Nazituye ikimasa, ubwa kabiri ibyara inyana ari yo naguze umurima wa mbere. Ntabwo navuga ko ari njye njyenyine kuko nafashwaga n’umuryango wanjye.”

Gakwenza avuga ko mbere yo guhabwa inka yari atuye mu nzu y’amabati 12 nayo yari yarahawe nyuma yo guhunguka. Gusa ngo muri 2008 yari yarashaje. N’ubwo yamaze kubaka indi nzu, ngo ntiyigeze asenya iyi ishaje nk’urwibutso rw’ubuzima yanyuzemo.

Ati “Ubu mfite inzu y’amabati 40, irimo sima ndetse narirariye ntera akarangi imbere mu nzu inyuma nteraho ishwagara. Aho nari ntuye haracyahari. Ugiye iwanjye ugafotora aho nari ntuye n’aho ntuye ubu; wahita umenya ko nari nkennye! Ubu nanjye abaturage banyita ‘Boss!”.

Si Gakwenza ushimira gahunda ya Girinka ndetse n’izindi gahunda za Leta. Abaturage bavuga ko iri terambere barikesha umuryango FPR-Inkotanyi urimo wizihiza imyaka 35 umuze uvutse.

Mbakurizehe Anatalie w’imyaka 74 na Mbwirabumva Celestin w’imyaka 65 bombi bavuga ko ubuzima bwahindutse kubera ibikorwa bya FPR-Inkotanyi.

Mbakurizehe ati “FPR yamfashije guhunguka. Ngeze ngarutse inaha bagiye gutanga amabati ni njye wayahawe bwa mbere mu mudugudu. Nabaye aho ngeze mu zabukuru Kagame Paul yampaye ingoboka. Ubu mbona agasabune, utuvuta nkanabona icyo kurya.”

Umuyobozi w’Akarere ka Burera, Uwanyirigira Marie Chantal, akaba n’umuyobozi w’umuryango FPR-Inkotanyi muri aka karere, yatangaje ko mu byakoze mu kwizihiza isabukuru y’uyu muryango harimo kuremerana bigamije kwikura mu bukene ndetse n’ibikorwa byo kurwanya igwingira.

Ati “Icyo tugiye gushiramo imbaraga dufatanyije n’abanyamuryango, ni ikibazo cy’imirire mibi mu bana n’igwingira, tugiye kubishyiramo imbaraga nk’abanyamuryango ku buryo buri kagari kagira intego ko nta mwana uzongera kugwingira muri aka karere.”

Mu kwizihiza isabukuru y’imyaka 35 umuryango FPR-Inkotanyi umaze uvutse, muri aka karere abaturage 22 bahawe Girinka bituye bagenzi babo, hatangwa imbabura ku baturage 483, inkoko 4; ndetse n’abejeje baganuza bagenzi babo.

Muri aka karere, kuva gahunda ya Girinka yatangira hamaze gutangwa inka 15297 muri izi harimo 9314 zituwe n’abazihawe mbere.

Abanyamuryango ba FPR Inkotanyi baganuje bagenzi babo
Abanyamuryango ba FPR Inkotanyi bahaye abana amata
Mu kwizihiza imyaka 35 ya FPR Inkotanyi mu Karere ka Burera hatanzwe imbabura zirondereza inkwi
Gahunda ya Girinka imaze guhindura ubuzima bw'abaturage
Uyu munsi ubuzima bwa Gakwenza bwarahindutse yapimaga ibiro 50 ubu arengeje ibiro 75
Mu kwizihiza isabukuru y'imyaka 35 harahiye abanyamuryango bashya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .