00:00:00 IGIHE NETWORK KN KINYARWANDA EN ENGLISH FR FRANCAIS

Burera: Abadepite basabye abaturage gukura amaboko mu mifuka aho ‘kugonda ijosi’

Yanditswe na Ndikumwenayo Thierry
Kuya 30 Ugushyingo 2022 saa 08:08
Yasuwe :

Kuva ku itari ya 17 kugeza kuya 30 Ugushyingo, Abadepite basuye uturere tugize u Rwanda, muri gahunda iba kabiri mu mwaka aho bumva kandi bagaha umurongo ibibazo bitandukanye biba byagaragaye mu karere basuye.

Mu karere ka Burera, Abadepite basabye abaturage gukora cyane aho guhora bategereje guhabwa.

Babisabye nyuma y’uko hari abaturage batanze ibibazo basaba ko bagezwaho gahunda zihabwa abatishoboye, nyamara abaturage bakagaragaza ko batazikwiye.

Ubwo aba Badepite basuraga umurenge wa Kinyababa wo muri aka karere, hari umuturage wasabye guhabwa inka ya “Girinka”. Mu kubaza impamvu uyu muturage adahabwa inka, ubuyobozi bw’akagari ka Kaganda atuyemo bwemeje ko afite inka ebyiri, ibi binemezwa n’abaturage.

Twagirayezu Jonas atuye mu kagari ka Kaganda, avuga ko hari bamwe bafite umuco wo kumva bahabwa ibyo batavunikiye, avuga ko ibi bidakwiriye.

Ati “Hari ibintu abantu bashyira mu muco atari ngombwa, umuntu akumva yahora abona ikintu cy’ubusa! Ibi byagaragaye ko ari nko gusabiriza, ni ukugaragaza isura mbi! Ubundi umuntu yakavuze ati mfite imbaraga reka nkore iki, kandi n’utazifite biba bigaragara, niyo mpamvu hari za VUP n’izindi nkunga z’ingoboka.”

Yasabye bagenzi be kwishimira ibyo bafite kandi bakagerageza kubibyaza umusaruro kugira ngo bibashe kubatunga.

Nizeyimana Gerard na we yagize ati “Ubundi niba umuntu afashijwe yakakombye kwiyubakira ubushobozi kugira ngo igihe iyo nkuga yaba idahari azabe afite icyamugoboka. Niba ahawe akazi akizigama duke ku buryo nyuma y’akazi yaba afite icyamufasha kwiyubakira ubuzima.”

Uwera Kayumba Marie Alice ayobora Komisiyo y’Ubutaka Ubuhinzi n’ibidukikije mu nteko ishinga amategeko umutwe w’Abadepite.

Nyuma yo kwakira ibibazo by’abaturage yabasabye kudahora bategereje kwakira aho gutanga. Yabasabye gusaba akazi aho gusaba ubufasha nk’uko byagaragaye kuri bamwe bagaragaje ibibazo byabo.

Ati “Umusaza w’imyaka 90 asebe ubufasha, n’umusore w’imyaka 20 asabe ubufasha? Ubu se birakwiye! Hari aho twagiye tubibona, ngo mwatwubakiye inzu ariko igikoni nta muryango! Ntacyo Perezida wa Repubulika atabakoreye ariko natwe reka tureke gukabya kugonda ijosi!”

Iyi ntumwa ya Rubanda iganira na IGIHE, yavuze ko hari abaturage batangiye guhindura imyumvire kuri izi gahunda z’abatishoboye, atanga urugero rwo mu murenge wa Kinoni muri aka karere; aho umuturage wasabaga ugufashwa atabikwiriye yatamazwaga na bagenzi be.

Yakomeje asobanura ati “Igikorwa cyose kigira ibyiza ariko kikagira n’imbogamizi. Hajya kujyaho gufashwa byari ugutuma abaturage bava mu bukene nabo bagashobora kwifasha bagafasha na bagenzi bako n’igihugu kigatera imbere. Ariko hari abaturage babifashe nabi. Ari ukwiriye gufashwa, ari utabikwiriye bose barashaka kujya mu murongo wo gufashwa.”

Umuyobozi w’akarere ka Burera, Uwanyirigira Marie Chantal yatangaje ko batangiye ubukangurambaga buhindura abaturage bakumva ko bakwiriye gutera intambwe bava mu byiciro byo hasi by’ubudehe.

Yasabye aabaturage guharanira kujya mu byiciro by’abafasha aho guhora bifuza gufashwa.

Uwera Kayumba Marie Alice yasabye abaturage gukura amaboko mu mufuka
Hatanzwe umwanya abaturage babaza ibibazo bitandukanye
Abaturage basabwe gushyira imbere kwishakamo ibisubizo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .