Burera: Abadepite basabwe ubuvugizi ku kibazo cy’ibiribwa byahenze, bikagora amashuri

Yanditswe na N.Kubwimana Janvière
Kuya 6 Gashyantare 2020 saa 02:09
Yasuwe :
0 0

Kuva mu mpera z’umwaka ushize wa 2019, hirya no hino ku masoko yo mu Rwanda, ibiciro by’ibiribwa byagiye bizamuka cyane, bimwe birahenda kurusha uko byari bisanzwe.

N’ubwo hari bimwe mu byatangiye kugabanuka ku biciro ariko ibindi biracyahenze.

Kuri uyu wa Gatatu, tariki 5 Gashyantare 2020, Komisiyo y’Abadepite ishinzwe Uburezi, Ikoranabuhanga, Urubyiruko n’Umuco yagiriye uruzinduko mu mashuri yo Karere ka Burera kureba ibibazo bikibangamiye ireme ry’uburezi, yakirizwa n’ikibazo cyo guhenda kw’ibiribwa kiri kubangamira gahunda yo kugaburira abana ku mashuri.

Bamwe mu barezi n’abayobozi b’ibigo by’amashuri bagaragarije aba badepite ko kuba ibiciro bya bimwe mu biribwa bakenera umunsi ku wundi byarazamutse, byagize ingaruka zikomeye ku kunoza indyo yuzuye igenerwa abana ku mashuri.

Umuyobozi ushinzwe amasomo ku Rwunge rw’Amashuri rwa Kagitega yagize ati "Kuba ibiciro ku masoko byarazamutse ni ikibazo, byakongeraho ko hakiri n’ababyeyi bagenda biguru ntege mu kwishyura ifunguro ry’abana ku mashuri, byose bikagira ingaruka ku kunoza ifunguro ritegurirwa aba bana.”

Yavuze ko mbere ibiribwa birimo ibigori, imboga, ibirayi n’ibindi byari bihendutse, bigatuma habaho guhinduranya indyo ku banyeshuri.

Bimaze guhenda, Hirwa avuga ko byabaye ngombwa ko indyo abana bahabwa zigabanywa.

Ati “Ibigori byavuye kuri 200 Frw ubu ni 500 Frw, ishu ryari 100 Frw ubu ni 200, umuceri wo ni ibindi, bituma guhaha bigorana cyane, ahubwo iyo Leta itongeraho 56% ku yo igenera buri mwana byari kutugora n’ubwo akiri make.’’

Yasabye ubuvugizi, ibiciro bikagabanuka cyangwa amashuri agashakirwa ikindi gisubizo.

Bamwe mu banyeshuri biga mu bigo by’amashuri by’umwihariko mu burezi bw’imyaka icyenda, bavuga ko igaburo bafatira ku mashuri hari ubwo riba ridahagije ndetse bakarya indyo imwe.

Nyirakanyange Chantal wiga mu ishuri ryisumbuye rya Kagitega yagize ati "Aha turya kawunga gusa, tukarya amashu n’ibishyimbo cyangwa bagashyiramo ibidodoki, baduhindurira tukarya ibijumba nka rimwe mu cyumweru.”

Ingabire Jeniffer wiga ku Ishuri ryisumbuye rya Butete na we yavuze ko ibiciro by’ibiribwa bitarazamuka, baryaga neza bagahaga.

Ati “Mbere twararyaga tukanabisigaza, ariko ubu byaragabanutse. Uko twahinduranyaga ibiryo ntibikibaho, ubu bibanda ku kawunga cyane.”

Perezida wa Komisiyo y’Abadepite ishinzwe Uburezi, Ikoranabuhanga, Urubyiruko n’Umuco, Nyabyenda Damien, yavuze ko ikibazo kijyanye no kugaburira abana ku mashuri n’ubwo Leta ibyitaho badakwiriye kubiyiharira yonyine, hakenewe ubufatanye n’ababyeyi.

Ati "Ntabwo Minisiteri y’Uburezi yigeze ibuza abayobozi b’ibigo kongeza amafaranga mu gihe bibaye ngombwa, icyo twanze ni akajagari bikorwamo, ariko babiganiriyeho n’ababyeyi bakabereka ko mu mihahire hakirimo ikibazo, bakumvikana uburyo bagaburira abana kandi bagahaga, hakabonekamo wenda amata n’amagi.’’

Yakomeje avuga ko ababyeyi babyemeye babimenyesha Akarere, nako kakabimenyesha komisiyo kandi byagenda neza.

Imibare y’Ikigo cy’Igihugu cy’Ibarurishamibare mu Rwanda, NISR, yerekana ko ibiciro ku masoko byazamutseho 6.9% mu Ugushyingo 2019, bivuye kuri 4.4 ku ijana yabarurwaga mu Ukwakira 2019.

Mu Ugushyingo 2019, ibiciro by’ibicuruzwa by’umwimerere (fresh products) bihingwa mu gihugu nk’ibishyimbo, imboga n’ibindi, byazamutseho 25.3 % ugereranyije n’igihe nk’icyo mu 2018.

NISR ivuga ko izamuka ry’ibiciro ku isoko ryatewe n’ibiribwa Abanyarwanda bakoresha cyane birimo ibigori, ibishyimbo n’inyama byahenze. Ibyo nibyo ibigo by’amashuri bikunze gukenera bitanga ifunguro ku banyeshuri.

Hasobanuwe ko mu mpera z’umwaka umusaruro uba warabonetse muri Nyakanga uba uri gushira bigatuma ibihari bihenda kuko biba bikenewe n’abajya kurya, abacuruzi n’inganda zikenera umusaruro ukomoka ku buhinzi.

Ibiribwa by'ibanze nk'akawunga byarahenze bigira ingaruka ku mafunguro ibigo by'amashuri bitanga
Abayobozi b'amashuri bagaragaza ko amafunguro bagenera abanyeshuri yagabanutse kubera ibiciro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .