Bunani warokoye umwana wari ugiye gutwarwa n’umuvu agiye gushimirwa

Yanditswe na Twarabanye Venuste
Kuya 6 Gashyantare 2020 saa 01:23
Yasuwe :
0 0

Minisiteri y’Ibikorwa by’Ubutabazi (Minema) yahishuye ko igiye kugenera ishimwe umusore warokoye umwana wari ugiye gutwarwa n’umuvu watewe n’imvura nyinshi yaguye ku wa Gatandatu tariki 1 Gashyantare 2020.

Imvura yaguye kuwa Gatandatu yasanze umwana uri mu kigero cy’imyaka 10 uba mu buzima bwo ku muhanda aryamye muri ruhurura, abura uko yavamo amazi amubana menshi aramutwara. Yamugejeje Nyabugogo afata ku ibuye rinini aribwo abantu bamubonye.

Mu gihe abantu benshi bareberaga, bamwe bafata amashusho abandi babuze uko babigenza ngo bamufashe, hagobotse uwitwa, Jean Claude Bunani w’imyaka 26 y’amavuko usanzwe akora akazi ko kwikorera imizigo kuri gare ya Nyabugogo, amukuramo.

Uyu musore yabwiye Radiyo Rwanda ko atatekerezaga ko amazi yamujyana ahubwo icyo yatekereje ari ukurokora uwo mwana.

Ati “Naraje mvuye mu kazi mbona umwana ahagaze ahangaha mu mazi huzuye cyane mbona umuvu wenda kumujyana, mbona abantu bashungera mbona ntakundi byagenda ntawundi muntu ndeba uri kujyamo, ndababwira nti nimunzanire urwego njyewe manukire ahangaha nibwo nahise manukamo ngenda nkambakamba kuri aya mabuye ndangije mushyira mu mugongo. Nibwo nahise muzamukana ku rwego muhereza abari hejuru.”

Akimara kurokora uwo mwana abantu babiri mu babonye igikorwa akoze nk’ikidasanzwe, bahise bamuha 6000 Frw; harimo umwe wamuhaye 5000 Frw n’undi wamuhaye 1000 Frw. Avuga ko abamutije urwego yabahayeho 3000 Frw nawe asigarana andi nk’ayo

Umuyobozi muri Minisiteri y’Ibikorwa by’Ubutabazi, yabwiye itangazamakuru ko iyo Minisiteri iri gutegura uburyo bwo gushimira uwo musore kandi ko ishimwe azarishyikirizwa vuba nubwo atavuze iryo ari ryo.

Yagize ati “Turashima ibyo uriya mugabo yakoze kandi akwiye ishimwe. Turateganya guhura na we kuwa Kane tukamushimira mu buryo bukwiye.”

Uyu musore ashobora kubona ibihembo byinshi ndetse ubu ku mbuga nkoranyambaga yahigitse Emmanuel Niringiyimana wakoze umuhanda wari umaze iminsi yamamaye.

Impuzamiryango iharanira uburenganzira bwa muntu Cladho, na yo yatangaje ko ishaka uyu musore ngo imushimire ku byo kurokora umwana dore ko uwo muryango urajwe ishinga no kurengera umwana.

Imvura imaze iminsi igwa guhera mu ijoro ryo ku wa 31 Mutarama 2020 imaze guhitana abantu 19 abandi 8 barakomeretse, inzu 98 nizo zasenyutse mu gihe ubutaka bungana na hegitari 21 bwangiritse mu gihe n’uruganda rumwe rutunganya amazi rwangiritse.

Bunani ari kumwe n'umwana yarokoye agiye gutwarwa n'umuvu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .