00:00:00 IGIHE NETWORK KN KINYARWANDA EN ENGLISH FR FRANCAIS

Bugesera: Urugaga rw’abagenagaciro rwatashye inzu yasaniwe uwarokotse Jenoside

Yanditswe na Kubwimana Yvan
Kuya 5 June 2022 saa 01:03
Yasuwe :

Abakozi n’abanyamuryango b’urugaga rw’Abagenagaciro ku mutungo utimukanwa mu Rwanda (Institute of Real Property Valuers in Rwanda, IRPV) batashye inzu basaniye umwe mu barokotse Jenoside yakorewe Abatutsi mu 1994, wo mu Karere ka Bugesera mu Murenge wa Nyamata.

Ni igikorwa cyabaye kuri uyu wa Gatanu tariki ya 3 Kamena 2022. Aba bagenagaciro babanje kunamira inzirakarengane zisaga 45 000 ziruhukuye mu Rwibutso rwa Nyamata, ndetse basobanurirwa ubugome bw’indengakamere Jenoside yakoranywe muri aka gace.

Iyi nzu yasaniwe umuryango wa Rwabusaza Jean Baptitse, gusa we ntiyabashije kugira amahirwe yo kuyibamo kuko yitabye Imana mu minsi ishize. Yashyikirijwe umugore n’abana be.

Umugore wa nyakwigendera Tuyishimire Gratiene, yabwiye IGIHE ko ashimishijwe n’iki gikorwa cy’urukundo yakorewe n’abagiraneza babatekereje.

Ati "Tukibyumva twumvaga ari nk’inzozi. Twabanje kugira ngo ni ba bandi bazaga bagapima bakigendera bikarangira, kuko hari abajyaga baza mbere bakaza bagapima bikarangirira aho, ariko ubwo aba bazaga bakatubwira ko bagiye gutangira kudusanira, twumvise bidushimishije."

Yakomeje ashimira abagize urugaga rw’abagenagaciro mu Rwanda rwabashije kubasanira iyi nzu yendaga kubagwaho.

Ati "Mboneyeho gushimira aba bagenagaciro babashije kutwubakira, ni ukuri Imana isubize aho bakuye kandi ikomeze kubongerera imbaraga ngo babashe no gufasha abandi bababaye."

Umunyamabanga Nshingwabikora w’Urugaga rw’abagenagaciro ku mutungo utimukanwa mu Rwanda, Ganza Patrick, yashimiye umuryango wa IBUKA mu Karere ka Bugesera wabafashije kubona uyu mugenerwabikorwa basaniye.

Yakomeje avuga ko nk’urugaga, buri mwaka mu kwifatanya n’Abanyarwanda mu Kwibuka, bagira igikorwa bategura ku bufatanye na IBUKA mu kuremera uwarokotse Jenoside.

Ati "Buri mwaka tugira igikorwa dukora mu rwego rwo gufasha abarokotse Jenoside. Umwaka ushize twari mu Karere ka Gicumbi, uyu munsi iki gikorwa twatekereje kugikorera muri aka Karere ka Bugesera, ubutaha tuzagera n’ahandi, hari abandi bagenerwabikorwa bababaye kurusha abandi. Iki gikorwa tuba twagikoze mu rwego rwo gufasha Leta mu kugaragariza abacitse ku icumu ko batari bonyine."

Umukozi ushinzwe imari n’abakozi mu Murenge wa Nyamata, Umurerwa Adeline, yashimiye urugaga rwabafashije gusanira umugenerwabikorwa warokotse Jenoside.

Yashimangiye ko nubwo mu ntangiriro z’iki gikorwa Rwabusaza yahise yitaba Imana, batacitse intege, ahubwo barushijeho gushyiramo imbaraga kugira ngo umuryango yari asize udasembera.

Yaboneyeho umwanya wo gusaba uyu muryango wasizwe na nyakwigendera gufata neza iki gikorwa babashije gusanirwa, bakarushaho kwiteza imbere.

Iyi nzu yasaniwe uyu muryango igizwe n’ibyumba bitatu, igikoni n’ubwogero byo hanze ndetse n’indi nzu yakorerwamo ubucuruzi.

Yuzuye itwaye asaga miriyoni esheshatu z’amafaranga y’u Rwanda.

Visi Perezida wa IBUKA mu karere ka Bugesera, Nambajimana Jean Pierre yashimiye abagize urugaga rw'abagenagaciro ku bw'igikorwa cyiza bakoreye uwarokotse Jenoside
Abagize urugaga biyemeje guteza imbere u Rwanda, basigasira amateka
Muberuka Leon, Umuyobozi w'urwibutso rwa Nyamata ubwo yasobanuriraga amateka abagenagaciro
Ganza Patrick yavuze ko urubyiruko rufite umukoro wo kubungabunga amateka ndetse no kurushaho kuyasigasira
Ganza Patrick, umunyamabanga w'urugaga rw'abagenagaciro mu Rwanda
Ubwo bari bageze ku rwibutso rwa Jenoside rwa Nyamata
Abagenagaciro biyemeje guhashya uwo ari we wese washaka gusubiza u Rwanda ahabi rwavuye
Bunamiye inzirakarengane za Jenoside yakorewe Abatutsi zishyinguye muri uru rwibutso
Abagenagaciro ku mutungo utimukanwa basobanirwe amateka ya Jenoside yakorewe Abatutsi
Byabaye ngombwa ko iyi nzu isanwa yose kugira ngo isubire kuba nshya
Tuyishimire wasaniwe inzu yiyemeje kuyifata neza
Inzu yasaniwe uyu muryango kuri ubu imeze neza
Imbere mu Nzu yari yarasadutse bisaba kuyisana
Iyi nzu yatashywe ifite agaciro ka miliyoni zisaga 6 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .