00:00:00 IGIHE NETWORK KN KINYARWANDA EN ENGLISH FR FRANCAIS

Bugesera: Abarokotse Jenoside batishoboye bahawe inzu za miliyoni 20 Frw

Yanditswe na IGIHE
Kuya 19 June 2022 saa 11:30
Yasuwe :

Kuri uyu wa Gatandatu, ku Cyicaro cy’Ikigo Gasore Serge Foundation giherereye mu Karere ka Bugesera, Umurenge wa Ntarama, habereye umuhango wo gutaha ku mugaragaro inzu imwe irimo ebyiri (two in one) yubakiwe abacitse ku icumu rya Jenoside yakorewe Abatutsi muri Mata 1994.

Ni igikorwa cyakozwe na Gasore Serge Foundation ku bufatanye n’ubuyobozi bw’Akarere ka Bugesera ndetse na Sport Club La Palisse.

Uyu muhango wabanjirijwe n’igikorwa cyo kunamira Abatutsi bashyinguye mu rwibutso rwa Jenoside yakorewe Abatutsi rwa Ntarama ndetse no gushyira indabo ku mva rusange ishyinguwemo imibiri y’Abatutsi bishwe muri Jenoside yo muri Mata 1994.

Nyuma y’igikorwa cyo kunamira abashyinguye mu rwibutso rwa Ntarama, hakurikiyeho igikorwa gutaha ku mugaragaro inzu yubakiwe abacitse ku icumu rya Jenoside batishoboye, bo mu Kagali ka Kibungo, Umurenge wa Ntarama, Akarere ka Bugesera.

Abahawe inzu ni Mugabo Séraphin, uzwi cyane kubera umukino wa gusiganwa ku maguru (athlétisme), akaba yarahagarariye u Rwanda mu marushanwa mpuzamahanga atandukanye arimo n’imikino Olempike mbere na nyuma ya Jenoside yakorewe Abatutsi mu 1994.

Undi ni Gatera Alphonse warokotse Jenoside, akaba yari yarashegeshwe n’ihungabana ariko ubu akaba yaragaruye icyizere cy’ubuzima. Aba bombi banahawe akazi muri Gasore Serge Foundation.

Umunyamabanga Nshingwabikorwa w’Umurenge wa Ntarama, Martha Uwamugira, yashimiye Gasore Serge Foundation n’abafatanyabikorwa bayo kubera uruhare rukomeye bagira mu bikorwa biteza imbere umuturage.

Yagize ati “Turashimira Ikigo Gasore Serge Foundation ndetse n’abafatanyabikorwa bacyo ku bikorwa byiza nk’ibi bakomeje gukora bateza imbere abaturage by’umwihariko ab’i Ntarama”.

Gosore Serge washinze Ikigo Gasore Serge Foundation yagarutse ku mateka ashaririye y’abahawe iyi nzu, yibutsa abitabiriye uyu muhango ko “nta kure habaho umuntu atava igihe abishyizemo ubushake no gukora cyane”.

Yanashimiye kandi ubuyobozi b’Umurenge wa Ntarama n’Akagari ka Kibungo batanze ikibanza iyi nzu yubatsemo.

Iyi nyubako yatashywe ifite agaciro ka miliyoni 20 Frw yatanzwe na Gasore Serge Foundation. Ibijyanye n’ibikoresho byo mu nzu bikaba byatanzwe na Sport Club La Palisse.

Izi nzu zuzuye zitwaye asaga miliyoni 20 Frw
Mugabo wahawe inzu yashimiye Gasore Serge Foundation yamufashije, akubakirwa inzu
Uwamahoro Innocente, Umuyobozi wa Foundation Gasore Serge ashyikiriza urufunguzo rw'inzu Mugabo Seraphin wahawe inzu
Martha Uwamugira, Umunyamabanga Nshingwabikorwa w’Umurenge wa Ntarama wafunguye ku mugaragaro uyu muhango wo gutaha iyi nzu
Hashyizwe indabo ku mva zishyinguyemo abazize Jenoside, ku rwibutso rwa Ntarama
Gatera Alphonse yishimiye kuba yahawe inzu yo kubamo nyuma y'ibihe bikomeye yanyuzemo muri Jenoside
Shinga Ntaganzwa Albert ageza ijambo ku bitabiriye iki gikorwa
Shinga Ntaganzwa Albert uhagarariye Sport Club La Palisse ageza ubutumwa bwe kubitabiriye uyu muhango wo kunamira abashyinguwe muri uru rwibutso rwa Ntarama
Gatera Alphonse na Mugabo Seraphin basangira ku ntango nk'abagiye guturana
Ntarama ni hamwe mu hafite amateka akomeye kubera ubugome Jenoside yakoranywe
Abagize Sport Club La Palisse basobanuriwe amateka y'urwibutso rwa Ntarama mu gihe cya Jenoside yakorewe Abatutsi
Bamwe mu bafite ababo bashyinguye muri uru rwibutso rwa Ntarama bagize Sport Club La Palisse, bashyize indabo ku mva
Ubwo basobanurirwaga amateka y'urwibutso rwa Ntarama
Abagize Sport Club La Palisse basobanurirwa amateka y'ibyabereye mu rwibutso rwa Ntarama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .