Bugesera: Abagabo 100 bakurikiranyweho gutera inda abangavu mu 2019

Yanditswe na Thamimu Hakizimana
Kuya 30 Mutarama 2020 saa 11:04
Yasuwe :
0 0

Abana b’abakobwa bari munsi y’imyaka 18 y’amavuko batuye mu Mirenge itandukanye y’Akarere ka Bugesera, mu Ntara y’Iburasirazuba, batewe inda zitateganyijwe mu mwaka ushize wa 2019.

Ubuyobozi bw’aka karere bwabitangaje muri iki cyumweru ubwo Plan Rwanda, yashyikirizaga imashini zidoda abakobwa 100 bari munsi y’imyaka 18 batewe inda bari basoje amahugurwa y’amezi atandatu yo kudoda.

Meya w’Akarere ka Bugesera, Mutabazi Richard, yabwiye IGIHE ko batishimiye uyu mubare w’abana b’abakobwa batewe inda kuko uri hejuru cyane ndetse bahangayikishijwe n’uko abakoze ibi byaha benshi muri bo bakidegembya.

Mutabazi avuga ko abagabo 100 gusa mu bateye inda aba bakobwa 559 ari bo bakurikiranyweho iki cyaha ndetse abakorewe idosiye ari 50 gusa.

Ati “Imibare dufite y’umwaka ushize igaragaza ko abana 559 ari bo batewe inda, ikigaragara n’uko iri hejuru kandi ntitubyishimiye. Ikindi ni uko abagera ku 100 nibo bakurikirwanywe kandi nabo abahamwe n’icyaha cyangwa abakorewe dosiye ntibarenze 50.”

Meya Mutabazi yakomeje agaragaza ko guta muri yombi abateye aba bana inda bigoye kubera ko ababyeyi babo usanga babahishira kubera utuntu babashukisha.

Ati “Mu by’ukuri biracyari imbogamizi kuko abakabashije gutanga amakuru ari na bo batewe inda batarumva impamvu yo gushinja ababateye inda. Ni ikintu kiri mu muryango tugomba gufatanya kugira ngo kivemo kuko usanga umuryango w’umwana watewe inda ariwo ujya guhishira uwamuteye byagera mu rukiko hakabura umushinja kandi iyo bigenze bityo umunyabyaha aridegembya.”

Yongeyeho ko hari ubukangurambaga buzamara ibyumweru 52 bateguye bafatanyije na Polisi y’u Rwanda bufite insanganyamatsiko igirira iti “Rengera umwana” ashimangira ko ari bwo bazashishikarizamo ababyeyi gutanga amakuru y’ababatereye inda abana.

Meya Mutabazi avuga ko hari ababyeyi badafasha ubutabera mu gushaka abateye abana inda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .