BSC yahaye telefone 100 zigezweho abamugariye ku rugamba rwo kubohora igihugu

Yanditswe na Mutangana Gaspard
Kuya 29 Kanama 2020 saa 08:44
Yasuwe :
0 0

Ikigo gicuruza ‘internet’ cyitwa Broadband System Corporation (BSC), cyahaye telefone 100 zigezweho bamwe mu bahoze mu ngabo z’u Rwanda, bamugariye ku rugamba rwo kubohora igihugu.

Ni igikorwa cyabereye mu Mujyi wa Kigali no mu Karere ka Nyagatare, aho telefone 50 zahawe abo mu Murenge wa Kanombe, Akarere ka Kicukiro, izindi 50 zigahabwa abo mu Karere ka Nyagatare.

Izi telefone zatanzwe zirimo ‘internet’ y’ubuntu mu gihe cy’amezi 12. Iki kigo kandi ku bufatanye na MTN Rwanda, uwahawe telefoni azaba yemerewe guhamagara aho ari hose ku buntu.

Umuyobozi wa Komisiyo y’Igihugu yo gusezerera no Gusubiza mu Buzima busanzwe Abahoze nu ngangabo z’u Rwanda (RDRC), Valerie Nyirahabineza, yashimiye ikigo BSC igikorwa cyakoze, asaba abahawe izi telefone kuzazikoresha neza.

Yagize ati “Ndashimira byimazeyo ikigo BSC cyahaye telefone aba bagenerwabikorwa. Izi telefone muhawe zizababere inzira igana ku iterambere. Zifite ubushobozi bwo kubafasha muri gahunda zitandukanye kuko muzaziboneraho serivisi nka; Irembo n’izindi. Wavugana na muganga akagusuzuma, akaguha ibisubizo, akaguha imiti, cyangwa akanaguha gahunda.”

Umudepite mu nteko Ishinga Amategeko uhagarariye abafite ubumuga, Eugene Musolini, yavuze ko nubwo gutanga telefoni byahereye kuri bamwe mu bamugariye ku rugamba n’abandi bafite ubumuga bazagerwaho.

Yagize ati “Nagira ngo dusubize umutima impembero twibuke abaduhaye igihugu. Ndashimira BSC yatanze izi telefone, na MTN Rwanda, yashyizemo uburyo bwo guhamagara ku buntu”

Umwe mubamugariye ku rugamba (Rtd) Lt Joseph wari uhagararuye abandi, yavuze ko telefone bahawe zigiye kubunganira, zikagabanya imbogamizi bahuraga na zo mu mirimo yabo, zishingiye ku kuba bafite ubumuga.

Yagize ati “Turashimira abaduhaye izi telefone, kuko uretse gukuraho zimwe mu nzitizi nyinshi twahuraga na zo mu buzima, izi telefone zigiye kudukura mu bwigunge. Zizaduteza imbere mu mibanire, mu miyoborere, mu bukungu, kandi zidufashe kugira ubuzima buzira umuze, kuko zizadufasha kuvugana n’abaganga”.

Yakomeje agira ati “Ikindi izi telefone zizadufasha ni ukurwanya amakuru y’ibihuha, bitewe n’uko zemerera umuntu gutanga igitekerezo kikagera ku isi hose. Nkatwe tuzi ukuri ku gihugu cyacu rero, biradufasha kubwira Isi ibyiza by’igihugu cyacu.”

Abahawe izi telefone mu karere ka Nyagatare, batangaje ko bajyaga babona amakuru yerekeranye n’umutekano bakabura uko bayatanga bitewe no kutagira telephone nk’izatanzwe.

Umuyobozi wa BSC, Christian Muhirwa, yavuze ko agaciro k’ibyo bakoze batakabara mu mafaranga ahubwo kagaragarira mu musaruro bizatanga. Uretse gutanga izi telefone, ikigo BSC cyashyize umurongo wa ‘internet’ (wireless) aho zatangiwe mu murenge wa Kanombe-Kicukiro ndetse no mu karere ka Nyagatare.

Ikigo Broadband System Corporation (BSC) ni kimwe mu bigo bikomeye mu Rwanda, gitanga serivisi za ‘internet’ n’iz’ikoranabuhanga. Kuri ubu kikaba cyagize uruhare muri gahunda ya ConnectRwanda, igamije gufasha Abanyarwanda gutunga telefone sigezweho, mu rwego rwo guteza imbere ikoranabuhanga.

(Rtd) Lt Joseph uhagarariye abahawe telefoni i Kanombe
Valerie Nyirahabineza ashyikiriza telefoni umwe mu bazigenewe
Depite Musolini yavuze ko n'abandi bafite ubumuga iki gikorwa kizabageraho
Umwe mu bamugariye ku rugamba wahawe telefoni na BSC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .