00:00:00 IGIHE NETWORK KN KINYARWANDA EN ENGLISH FR FRANCAIS

Brig.Gen Murenzi yagaragaje ibyafasha mu rugamba rwo gukumira ibyaha

Yanditswe na Hakizimana Jean Paul
Kuya 27 Nzeri 2021 saa 09:30
Yasuwe :
0 0

Umuyobozi wa diviziyo ishinzwe ibikorwa byihariye, Brig Gen Murenzi Evariste yagaragaje ko kugira ngo habeho imidugudu itarangwamo icyaha bikwiriye gushingira ku kugira amakuru y’ingenzi.

Ibi yabigaragaje kuri uyu wa Mbere tariki ya 27 Nzeri 2021 ubwo hatangizwaga igikorwa cyo guhugura abaturage 179 bo mu Karere ka Gatsibo batoranyijwe nk’imboni zigiye gufasha inzego z’ibanze mu kugira imidugudu itarangwamo ibyaha.

Brig Gen Murenzi Evariste yavuze ko kugira ngo habeho umudugudu utarangwamo ibyaha bikwiriye kubakirwa ku kugira amakuru y’ibanze yose y’umudugudu abawutuye bakamenya n’uburyo bayahererekanya.

Ati “Kugira ngo imibereho myiza n’iterambere ry’umuturage wa Gatsibo bize ku isonga mufite inshingano zikomeye zo kubacungira umutekano na bo ubwabo babigizemo uruhare rukomeye cyane cyane ku bijyanye no gutanga amakuru kandi akayatangira igihe.”

“Umudugudu rero uzira icyaha birasaba amakuru, amakuru ku muturage akanamenya no kuyatanga mukayasangira kugira ngo mushobore kugira umudugudu wanyu utekanye.”

Umuyobozi w’Akarere ka Gatsibo, Gasana Richard, yavuze ko nk’abayobozi batangiye gukangurira abaturage kugera ku isibo kujya muri iyo gahunda ariko ngo baje gusanga bakeneye abandi bantu b’inyangamugayo bafite ubushake mu kubafasha kugira umudugudu utarangwamo icyaha.

Ati “ Ni abantu 179 turi kubaha amahugurwa ajyanye n’uburyo uwo mudugudu wazira icyaha, ibyo bakoresha, uburyo bazafatanya n’abayobozi ndetse n’uburyo bazajya baduha amakuru kugira ngo dukumire icyaha kitari cyaha.”

Meya Gasana yavuze ko abari guhugurwa bose bazakomeza gukurikiranwa bagasurwa hagira urenga ku byo yigishijwe agakeburwa.

Umuryango ni wo ugiye kwibandwaho cyane

Umuyobozi w’Akarere ka Gatsibo Gasana Richard, yavuze ko izi mboni bazisabye kwita cyane ku muryango ngo kuko uri mu biteza ibibazo byinshi iyo utabanye neza.

Ati “ Turashaka cyane kwibanda ku muryango, ihohotera ryo mu miryango n’ibibazo byo mu mibanire itari myiza mu miryango kuko twasanze ibibazo by’imibanire biri mu biduteza ibibazo cyane kuko iyo umugabo n’umugore batabanye neza bituma abana babo bava mu rugo bakajya kuba ku mihanda abangavu na bo bagaterwa inda ku buryo iyo umuryango udatekanye ariho ibyaha bituruka.”

Gahunda y’umudugudu utarangwamo icyaha yatangijwe muri Mata uyu mwaka mu Ntara y’Iburasirazuba ikaba igamije kurandura ibyaha bikorerwa hirya no hino muri iyi Ntara cyane cyane ibishingiye ku ihohoterwa ryo mu miryango, ibiyobyabwenge na magendu, ubujura n’ibindi bibangamiye imibereho myiza y’abaturage.

Brig Gen Murenzi Evariste yavuze ko kugira ngo habeho umudugudu utarangwamo ibyaha bikwiriye kubakirwa ku kugira amakuru y’ibanze
Abaturage bo mu Karere ka Gatsibo batoranyijwe nk’imboni zigiye gufasha inzego z’ibanze mu kugira imidugudu itarangwamo ibyaha.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .