BRD yahawe asaga miliyari 6 Frw yo kugoboka ubucuruzi buto bwahungabanyijwe na COVID-19

Yanditswe na Iradukunda Serge
Kuya 25 Ugushyingo 2020 saa 06:31
Yasuwe :
0 0

Banki y’Abadage y’Iterambere (KfW) yahaye Banki y’Amajyambere y’u Rwanda (BRD) miliyoni 5£ (miliyari 6,589 Frw) azifashishwa mu kugoboka ibigo by’ubucuruzi bito n’ibiciriritse byohereza ibicuruzwa mu mahanga byagizweho ingaruka n’icyorezo cya COVID-19.

Mu muhango wo gusinya amasezerano y’iyi nkunga wabaye kuri uyu wa 25 Ugushyingo impande zombi zavuze ko aya mafaranga agamije kuramira imirimo ibigo by’ubucuruzi byatangaga no gufasha ba nyirabyo kudahagarara kubera ibihombo.

Aya masezerano agena ko aya mafaranga yashyikirijwe BRD azahabwa ibigo by’imari bisanzwe bikorana nayo, nabyo bikazayageza ku bigo by’ubucuruzi bizaba byagaragaye koko ko byahungabanyijwe na COVID-19.

Umuyobozi wa KFW muri Afurika yo Hagati, Stefan Zeeb, yavuze ko bahisemo guha BRD aya mafaranga kubera ko ari ingenzi mu gusigasira urwego rw’umurimo muri ibi bihe bya COVID-19.

Ati “Muri iki gihe cy’ingaruka zikomeye za COVID-19 ku bukungu n’imibereho haba ku rwego rw’Isi n’u Rwanda, ibikorwa byihuse kandi bikwiye ni ingenzi mu gufasha kurinda umurimo, ubushobozi bwo gutunganya ibintu runaka no kubigeza ku masoko ndetse no gufasha mu kuzahura urwego rw’u Rwanda rw’ibyoherezwa mu mahanga.”

Umuyobozi wa BRD, Kampeta Sayinzoga, yavuze ko aya mafaranga azafasha ibigo by’ubucuruzi byari byarahungabanyijwe na COVID-19 kongera kubyutsa ibikorwa.

Ati “Iyi nkunga izakoreshwa kugira ngo abagizweho ingaruka bongere gusubukura imirimo no gutunganya ibintu runaka ndetse hanabungabungwe umurimo cyane ko ibigo bito n’ibiciriritse ari ingenzi mu ihangwa ry’umurimo no kongerera agaciro.”

Kampeta yashimye u Budage na KFW bikomeje gutera inkunga ibigo by’ubucuruzi byo mu Rwanda byagizweho ingaruka na COVID-19.

Binyuze mu Kigega cya Export Growth Fund (EGF), BRD isanzwe ifasha abohereza ibicuruzwa mu mahanga kubona inguzanyo ziborohereza gukora imishinga yabo.

Kuva mu 2019 ubwo iki kigega cyatangiraga kimaze gutanga miliyari 5,4 Frw ku bacuruzi bohereza ibicuruzwa mu mahanga bagera kuri 31, byateganywaga ko BRD izanabafasha kwishyura arenga miliyoni 600 Frw.

Muri Gashyantare 2019, Banki Nkuru y’Igihugu, BNR, yatangaje ko mu 2018 u Rwanda rwohereje mu mahanga ibicuruzwa bifite agaciro ka miliyoni 995.7$ avuye kuri miliyoni 943.5$ mu 2017.

Umuyobozi wa BRD, Kampeta Sayinzoga, yavuze ko amafaranga bahawe azakoreshwa mu kuramira umurimo mu bigo byohereza ibicuruzwa mu mahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .