Bombori bombori muri RNC: Ben Rutabana yaburiwe irengero, Kayumba ari ku gitutu

Yanditswe na IGIHE
Kuya 4 Ukwakira 2019 saa 12:37
Yasuwe :
0 0

Umuryango wa Benjamin Rutabana ubarizwa mu Mutwe wa RNC, uri mu rungabangabo rwo kubura uyu mugabo kuva mu kwezi gushize ubwo yajyaga mu bikorwa by’uwo mutwe muri Uganda, ugashinja Kayumba Nyamwasa n’abandi bayobozi bawo kuba inyuma y’ibura rye.

Ni nyuma y’umwiryane n’inkundura yo kumaranira ubutegetsi bimaze iminsi muri uyu mutwe ugamije guhungabanya umutekano w’u Rwanda, kugeza ubwo bamwe mu bawugize bamaze igihe bishishanya, bikanga ko bashobora no kuvutsanya ubuzima.

Rutabana yari umuhanzi wanditse izina rikomeye mu Rwanda, ariko aza gutana, ubu ni umuyobozi muri RNC ushinzwe Ibikorwa byo kongerera ubushobozi uyu mutwe.

Ibaruwa ivuga ku ibura rye yasakaye ku mbuga nkoranyambaga igaragaza ko yanditswe ku wa 2 Ukwakira 2019, igenewe Umuhuzabikorwa wa RNC, Jérôme Nayigiziki. Iriho amazina y’abayanditse aribo Tabitha Mugenzi, William Mugenzi, Jason Muhayimana, Simeon Ndwaniye, Vidah Ndwaniye, Louis Rugambage, Diane Rutabana, Emérance Sikubwabo na Max Sikubwabo.

Rutabana ngo yahagurutse i Bruxelles ku wa Gatatu tariki 4 Nzeri 2019 saa 21:45 n’indege ya Emirates Airlines, agana Entebbe muri Uganda. Yabanje guhagarara i Dubai mbere yo kugera ku kibuga cy’indege cya Entebbe ku wa 5 Nzeri saa 13:50.

Yakomeje kuvugana kuri telefoni n’umugore we Diane Rutabana hagati y’itariki 5-8 Nzeri, ntiyongera kumva ijwi rye. Rutabana ngo yagombaga gusubira mu Bubiligi ku wa 19 Nzeri nabwo akoresheje Emirates Airlines, ariko baramutegereje baraheba.

Iyo baruwa ikomeza iti “Nyamara ku mpamvu zitamenyekanye, Rutabana ntabwo yigeze afata indege, binatandukanye n’uko asanzwe abigenza, ntiyavugishije umugore we ngo amumenyeshe ugutinda uko ari ko kose cyangwa niba hari gahunda yahindutse, ndetse inshuro telefoni ye yahamagawe ntiyitabwa.”

“Ku wa 19 Nzeri, umunsi Rutabana yari ategerejwe mu Bubiligi, umugore we yakiriye amakuru ko umugabo we afunzwe mu buryo butemewe n’abarwanyi ba RUD Urunana bifitanye isano na Major Faustin Ntilikina; General Jean Michel Afurika; Rachidi na Frank Ntwali. Iri fungwa ryahuriranye n’uko uwo wa nyuma yari mu karere.”

Uyu Frank Ntwali ni muramu wa Kayumba akaba ashinzwe Ubukangurambaga muri RNC, ni umwe mu bagize uwo mutwe bafite imikoranire ihambanye n’ubuyobozi bwa Uganda, bigatuma imitwe igamije guhungabanya umutekano w’u Rwanda ikorera muri icyo gihugu nta nkomyi.

RNC yashyizwe mu majwi ku ibura rya Rutabana kuko ngo hagati ya tariki 28 Nzeri n’iya 1 Ukwakira, habaye ibiganiro hagati y’umuryango wa Rutabana n’abagize ubuyobozi bwa RNC, barimo Umuhuzabikorwa wungirije, Kayumba Nyamwasa; ushinzwe dipolomasi Charlotte Mukankusi; Ushinzwe Ubushakashatsi Jean-Paul Turayishimye n’abanyamuryango barimo Théogène Rutayomba na Rugema Kayumba.

Iyo baruwa yakomeje iti “Rutayomba na Rugema bageze aho bizeza gukora ibishoboka byose bagahuza kuri telefoni Rutabana n’umugore we bitarenze ku wa Kane tariki 3 Ukwakira 2019. Iki ni ikindi kimenyetso ko RNC cyangwa bamwe mu bayobozi bayo bazi aho Rutabana afungiwe.”

Ukunyurana kw’amakuru yagiye atangwa n’abayobozi ba RNC bavugwa muri iyi baruwa, kwatumye umuryango we urushaho kumva ko abayobozi ba RNC bazi aho Rutabana yaba aherereye.

Ibaruwa ikomeza iti “Kumwe mu kuvuguruzanya gukomeye ni ukuvuga ko Rutabana atamenyesheje ubuyobozi bukuru ibijyanye n’ubutumwa bwe muri Uganda, bityo ko batari kumenya aho ari. Ariko nanone, babiri mu bayobozi ba RNC bemeje ko abayoboke ba RNC muri Kampala babonye Rutabana ari muzima kandi ameze neza, bivuga ko RNC yemerewe kugera aho ari.”

Umuryango we uvuga ko Rutabana yari akiri Umuyobozi ushinzwe kongera ubushobozi muri RNC, kandi yari yabwiye umugore we n’abandi bayobozi ba RNC ku bijyanye n’ubutumwa bwe muri Uganda mbere yo kugenda ku wa 4 Nzeri 2019.

Guhindukwa na RNC ngo byaba byaratewe n’ubwumvikane buke amaze iminsi afitanye na Kayumba Nyamwasa.

Ibaruwa ikomeza iti “Mu byumweru byabanjirije ibura rye ndetse na mbere gato y’igenda rye, Rutabana yabwiye umugore we, umuryango n’inshuti ze za hafi ko afite ubwoba ku mutekano we kubera kutemeranya gukomeye n’Umuhuzabikorwa wungirije wa RNC, Lt. General Kayumba Nyamwasa ndetse na muramu we Frank Ntwali.”

“Ubwoba bwe bwashimangiwe n’iterabwoba yashyizweho n’abandi bayobozi ba RNC ko ashobora gufatwa niyongera kugera muri Uganda. Amakuru aturuka muri RNC avuga ko Ntwali yahise yihutira kujya mu cyerekezo kimwe na Rutabana, bagenda mu gihe kimwe cyangwa se nyuma ye gato.”

Ku bw’izo mpamvu kimwe n’izindi nyinshi, ngo kubera igihe gishize batazi irengero rya Rutabana no kuba Frank Ntwali yarakomeje kwijundika Rutabana mbere y’uko abura, umuryango ngo usaba RNC gusubiza Rutabana mu muryango we mu Bubiligi.

Uganda yahindutse isibaniro rya RNC, Museveni akomeje gutamazwa

Amakuru y’uburyo Rutabana yafatiwe bugwate n’abataramenyekana muri Uganda, agiye hanze nyuma y’ibirego u Rwanda rwakomeje gushinja Uganda byo guha icyuho ibikorwa by’imitwe igamije kuruhungabanyiriza umutekano, ibintu icyo gihugu cyo cyakomeje guhakana.

Nyamara kuba ifatwa rya Rutabana ribaye mu gusubiranamo kw’imitwe irwanya Leta y’u Rwanda kurusha kuba byari gukorwa n’ubutegetsi bwa Uganda kuko ashakishwa n’u Rwanda kandi Uganda ibizi neza, ni ikimenyetso cy’uburyo icyo gihugu cyahaye rugari imitwe yitwaje intwaro, kugeza ubwo yenda kwicanira muri icyo gihugu ikanahagira kasho.

Rutabana yakunze kugenda muri Uganda kimwe na bagenzi be bo muri RNC nta nkomyi, ari mu bikorwa bya RNC byo gushaka ubushobozi n’abayoboke, abifashijwemo n’inzego zirimo urushinzwe ubutasi bwa gisirikare, CMI n’urw’iperereza ry’imbere mu gihugu, ISO. Ifatwa rye ngo ryagizwemo uruhare na CMI atanzwe na Frank Ntwali, muramu wa Kayumba.

Uyu Rutabana asanzwe ari na Musaza wa Adeline Rwigara, umugore wa Assinapol Rwigara.

Rutabana yaba azira iki ?

Amakuru ahamya ko Rutabana yagiranye ubwumvikane buke na bagenzi be b’abayobozi muri RNC, cyane cyane ubwa gisirikare bukuriwe na Kayumba Nyamwasa, bashinjanya ko Kayumba ashaka kwiyegereza abo bafitanye isano, ndetse ko Rutabana yababajwe n’abantu bafatiwe muri Congo mu mutwe wa P5 uyoborwa na Kayumba, ubu bari mu nkiko mu Rwanda.

Rutabana ngo yarakajwe n’uko inama ze zitubahirijwe, kuko mu gihe uko barimo kuburana ari 25, Umushinjacyaha aheruka kubwira urukiko ko bajya gufatwa, Kayumba yahaye itegeko Major Habib Mudathiru wari ubayoboye kubavana muri Kivu y’Amajyepfo bakajya ku mupaka wa Uganda, aho bazahabwa inkunga zihagije kurusha izo bahabwaga hafi y’u Burundi.

Muri uwo mugambi ngo bakoresheje $12000 yoherejwe na Ben Rutabana kuri Western Union i Bujumbura. Bari mu nzira bimuka nibwo bafashwe, abandi baricwa.

Uburakari bwa Rutabana agashaka kwaka ibisobanuro Kayumba wagushije ingabo zabo mu biganza by’uwo bahanganye, ngo byaba impamvu yatumye ashaka ‘kumwumvisha’ kuko umusirikare muto yari ashatse kubaza byinshi ‘Jenerali’, ndetse bikekwa ko ubwo Rutabana yajyaga muri Uganda yari agiye mu bikorwa bya gisirikare, arenze ku gushaka kwa Kayumba.

Umwiryane si mushya muri RNC

Amakimbirane muri RNC si mashya kuko Kayumba Nyamwasa yakunze gushinjwa amacakubiri, ari nayo yashegeshe RNC kuva ikivuka mu mwaka wa 2010.

Ni nayo yahitanye abari ingenzi muri uyu mutwe nka Col. Patrick Karegeya wari umuntu uzi gucengera cyane, uwa vuba ni Camir Nkurunziza uheruka kurasirwa muri Afurika y’Epfo, wahoze ari muri RNC akaza kuyipakurura kubera ubwumvikane bucye mu bijyanye n’imicungire y’umutungo.

Muri Nyakanga 2016 nabwo Kayumba na Théogène Rudasingwa barashwanye karahava ndetse Rudasingwa yutse Kayumba ibitutsi bikomeye. Kayumba nk’uwabaye umusirikare yari ashyigikiwe n’abandi babaye abasirikare, Rudasingwa afite abasivili bamuri inyuma.

Muri uwo mwaka Rudasingwa yanditse avuga ko uyu mutwe wasubiye inyuma ku buryo budasanzwe mu myaka itanu yari ishize, ukagira “ubuyobozi bubi butigeze bubaho.”

Rudasingwa yashyize Kayumba mu majwi ko yashinze agatsiko k’Abatutsi bahoze mu gisirikare kahawe kuyobora RNC nubwo ubuyobozi bwari busanzweho bwageragezaga kugatesha agaciro, ku buryo bisa “nk’aho Kayumba yaremeye ishyaka mu rindi.”

Kayumba nawe yashinjaga Rudasingwa ko hari agatsiko yashinze agamije kumuvana ku buyobozi bwa RNC ubwo yari akiyiyoboye cyane cyane mu myaka ibiri yari ishize, akamushinja kumusuzugura, kumutuka n’ibindi yavuze ko atari agishoboye kwihanganira.

Ubu bwumvikane buke bwatumye Rudasingwa amwiyomoraho, ashinga umutwe we yise New RNC, ajyana n’abari bamushyigikiye b’abasivili, abasirikare basigara mu rundi ruhande muri RNC ya Kayumba. Bahise biyemeza kandi kwitandukanya n’umuntu uwo ariwe wese ushyigikiye Kayumba ndetse wemera amatwara ye.

Kumaranira ubutegetsi nibyo bikomeje kuranga uyu mutwe, ari nacyo gituma bamwe mu bawugize batangiye kubara ubukeye kubera gushimutana no kugambanirana.

Kayumba Nyamwasa yashinjwe uruhare mu kurigisa Ben Rutabana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza