00:00:00 IGIHE NETWORK KN KINYARWANDA EN ENGLISH FR FRANCAIS

BK igiye kwizihiza imyaka 50 ishyigikira iterwa ry’ibiti miliyoni muri Nyagatare

Yanditswe na Kanamugire Emmanuel
Kuya 29 June 2016 saa 07:42
Yasuwe :

Banki ya Kigali, BK, yasinyanye amasezerano n’ikigo kirengera ibidukikije, Compagnie Agricole et Environment (CAE), gifite intego yo gutera ibiti miliyoni imwe mu karere ka Nyagatare, mu myaka itatu iri imbere.

Banki ya Kigali yemeye gutanga miliyoni 25 Frw azakoreshwa mu myaka itatu iri imbere mu gutera ibiti 150 000 muri Nyagatare,akarere gakunze kwibasirwa n’izuba n’amapfa, cyane cyane mu bihe by’impeshyi.

Ikibazo cy’ihindagurika ry’ibihe ahanini rishingiye ku kwangirika kw’amashyamba n’ibyuka byoherezwa mu kirere, ni kimwe mu bibazo by’ingutu Isi ifite, kongera amashyamba bikaba umuti ukomeye.

Ikigega mpuzamahanga kirengera ibidukikije,WWF,kivuga ko amashyamba yihariye 31% by’ubutaka bw’Isi, ariko hagati ya Km2 120 na 150 zangizwa buri mwaka, kandi miliyari 1.6 y’abaturage bayakesha amaramuko arimo ibiribwa, amazi meza, imyambaro, imiti gakondo n’aho gutura.

Umuyobozi wa Banki ya Kigali, Dr Diane Karusisi, yavuze ko mu gihe BK mu Ukuboza izaba yizihiza imyaka 50 ikora ubucuruzi mu Rwanda, bifuje kuyizihiza bafatanya n’abandi Banyarwanda gutera ibiti.

Yagize ati “Turabyishimiye cyane, turanahamagara abakiliya bacu, abandi dukorana ubucuruzi, kugira ngo icyo gikorwa bagishyiremo ingufu kuko turashaka ko abana bacu n’abuzukuru bazabona ahantu baba heza, n’u Rwanda rukomeze rutere imbere.”

Muri iyo myaka itatu, BK ivuga ko buri mwaka izajya itera ibiti bigera ku 50 000 buri mwaka, ibya mbere bikazaterwa muri Nzeli,CAE ikavuga ko ingemwe y’igiti itunganyije neza iba ihagaze 167 Frw.

Umuyobozi wa CAE, Mutabaruka Jean Baptiste, yavuze ko batangiye gutera ibiti mu 2005, babitera mu karere ka Bugesera, Umujyi wa Kigali no muri Nyagatare, ariko ngo bigasa no gutandukanya imbaraga cyane ntizihurizwe ahantu hamwe.

Yakomeje agira ati “Mu maso yacu uko tubibona, u Rwanda ruramutse [Ntawe ubyifuza birumvikana] rusagariwe n’ubutayu, irembo ni i Burasirazuba, cyane cyane Akarere ka Nyagatare. Ni yo mpamvu tuvuga tuti uzadufasha wese, azadufashe turi i Nyagatare.”

Banki ya Kigali yashinzwe kuwa 22 Ukuboza, muri iyo myaka yose ikaba yarakomeje kwigaragaza nka Banki nini mu gihugu, aho muri Werurwe 2016, yari yihariye 33.0% by’isoko ry’u Rwanda.

Umuyobozi ushinzwe ibikorwa rusange muri BK, Shivon Byamukama, yavuze ko uku gutera ibiti ari kimwe mu bikorwa bya BK bigenewe kwita ku baturage, birenze gutanga serivisi za banki gusa.

Yagize ati “Tugira uruhare mu bikorwa by’uburezi nk’aho dufasha abanyeshuri basaga 200, dufatanya n’ishuri ry’icungamutungo n’amabanki, tugena ibihembo ku banyeshuri bitwaye neza mu mashuri, dukora mu nzego z’ubuzima aho dutanga ubusha mu bikorwa byo kurwanya kanseri y’ibere, kurwanya ubukene…”

Imibare yo mu 2007 igaragaza ko mu Rwanda ikibazo cy’abatema amashyamba bashaka gutwika amakara cyiharira 78.3%, mu gihe ku rwego rw’Isi, ikoreshwa ry’impapuro ryiyongereyeho 400% mu myaka 40 ishize, kandi 90% by’impapuro zigakorwa mu biti.

BK imaze guteza imbere ikoreshwa ry’ikoranabuhanga hanagabanywa impapuro zifashishwa, aho hejuru ya 60 ku ijana bya serivisi za BK zishobora gutangirwa mu ikoranabuhanga.

Umuyobozi wa BK n'uwa CAE bashyira umukono ku masezerano
Umuyobozi wa Banki ya Kigali, Dr Diane Karusisi ahererekanya amasezerano n'Umuyobozi wa Compagnie Agricole et Environnement
Umuyobozi wa Banki ya Kigali, Dr Diane Karusisi
Umuyobozi wa CAE, Mutabaruka Jean Baptiste
Umuyobozi ushinzwe ibikorwa rusange muri BK, Shivon Byamukama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .