00:00:00 IGIHE NETWORK KN KINYARWANDA EN ENGLISH FR FRANCAIS

BK General Insurance yahuguye abakozi bafasha abahinzi n’aborozi mu bwishingizi

Yanditswe na Akayezu Jean de Dieu
Kuya 4 May 2022 saa 01:28
Yasuwe :

Sosiyete y’Ubwishingizi ya Banki ya Kigali [BK General Insurance Company] yahuguye abakozi baturutse mu turere 30 bagiye gufasha abahinzi n’aborozi muri gahunda y’ubwishingizi bw’amatungo n’ibihingwa.

Aya mahugurwa yagenerwaga abahuza b’abafata ubwishingizi n’iki kigo kibutanga cya BK General Insurance, yasojwe kuwa 29 Mata 2022, aho abayitabiriye bahize kujya gukangurira abahinzi n’aborozi kwitabira gahunda y’ubwishingizi bw’ibihingwa n’amatungo.

Iyi ni gahunda izwi ku izina rya ‘Tekana Urishingiwe Muhinzi Mworozi’ yatangiye muri Mata 2019, ubu ikorera mu turere twose tw’Igihugu. Yatangiye yishingira ubuhinzi bw’ibigori n’umuceri, n’inka z’umukamo.

Kuri ubu igoboka abahinzi n’aborozi mu gihe cy’ibiza bituruka ku mihindagurikire y’ikirere n’indwara, ibyorezo ndetse n’impanuka ku matungo, mu gihe ku bihingwa ari imvura nyishi iteza imyuzure, izuba riteza amapfa n’imiyaga ,indwara z’ibihingwa ndetse n’ibyonyi.

Umuyobozi ushinzwe ibikorwa muri BK General Insurance Company, Ngunga Adolphe yavuze ko bahisemo guhugura aba bahuza abaturage n’ibigo by’ubwishingizi kugira ngo bajye gusobanurira abo baturage impamvu ari ngombwa gushinganisha ibihingwa n’amatungo.

Yavuze ko Abanyarwanda bari mu bikorwa by’ubuhinzi n’ubworozi ari benshi kandi batunze igihugu cyose ari nayo mpamvu bagomba gukora ibikorwa byabo batekanye kugira ngo babashe kugera ku musaruro wifuzwa.

Ati “Twumvikane ko niba 70% by’Abanyarwanda bari mu buhinzi n’ubworozi, nta kuntu umuntu yatekereza ko Abanyarwanda bashobora kuva ku rwego rumwe ngo bagere ku rundi bariya 70% ubasize ku ruhande.”

Yakomeje agira ati “Twe impamvu twahisemo gufasha leta muri iyi gahunda, nta yindi ni ukugira ngo dufashe muri iryo terambere ry’umuhinzi n’umworozi, kuko umuturage naramuka abonye uburyo bwo kuzamura imibereho, aribyo bizatuma anatera imbere noneho abe umukiriya wa banki cyangwa agure n’iyo modoka aza kuyishinganisha.”

Umuyobozi ushinzwe gahunda y’Ubwishingizi bw’ibihingwa n’amatungo muri Minisiteri y’Ubuhinzi n’Ubworozi, Museruka Joseph yavuze ko guhugura aba bakozi bazajya begereza serivisi z’ubwishingizi abahinzi ari ingenzi kuko bazunganira leta mu bukangurambaga.

Ati “Turahamya ko biraza kongera imibare kuko niba bakoreraga mu turere 10, ubu bakaba bagiye gukorera mu turere 30 kubera ko ubu bwishingizi abaturage bose barabukeneye.”

Museruka yavuze ko kuva uyu mwaka wa 2022 watangira, inka zigera ku bihumbi 21 zimaze kujya mu bwishingizi mu gihe ubuso bw’ibihingwa bungana na hegiteri ibihumbi 15 bumaze kujya mu bwishingizi.

Abahuguwe bagaragaje ko biteguye kujya gufasha abaturage gusobanukirwa neza impamvu ari ngombwa gushyira ibihingwa n’amatungo mu bwishingizi.

Kwizera Emmanuel ukorera mu turere twa Kayonza, Ngoma, Kirehe na Rwamagana yagize ati “Abahinzi n’aborozi baragenda babisobanukirwa cyane cyane abibumbiye muri za koperative, kandi twizeye ko bazagenda biyongera bitewe n’uko dukomeza ubukangurambaga.”

Rutaremara Jules yagize ati “Batwigishije ko amakoperative asanzwe ahinga cyangwa akora ubworozi, muri za nka borora aho kugira ngo zipfe babure aho birukira, ubwishingizi bwaje kugira ngo bubagoboke. Tugiye kubibakangurira kandi imyumvire y’Abanyarwanda imaze gutera imbere.”

Umuhinzi cyangwa umworozi ushaka ubwishingizi bw’ibihingwa n’amatungo asabwa kuba abikora kinyamwuga nko guhinga akoresha ifumbire neza, imbuto z’indobanure, n’ibindi, kandi yororera mu kiraro, avuza inka ndetse ayigaburira neza.

Muri gahunda ya ’Tekana Urishingiwe Muhinzi Mworozi’, umuturage atanga 60% naho andi mafaranga 40% asigaye agatangwa na Leta muri gahunda ya nkunganire.

Ni ukuvuga ko nko kuri iyi koperative ya Corimoru, umuntu ufite hegitari imwe ihingwaho umuceri aba agomba kwishyura 41.795Frw.

Umuhinzi yishyura ibihumbi 25Frw naho Leta ikamwishyurira ibihumbi 16Frw. Iyo bagiye kumuha ingurane ni ibihumbi 590Frw kuri hegitari.

Abitabiriye aya mahugurwa baturutse mu turere twose tw'igihugu
Ni amahugurwa yitabiriwe n'abasanzwe batanga izi serivisi z'ubwishingizi mu bice bitandukanye by'igihugu
Bahize kujya gukangurira abahinzi n'aborozi kwitabira serivisi zo gushyira ibyo bakora mu bwishingizi
Umuyobozi ushinzwe ibikorwa muri BK General Insurance Company, Ngunga Adolphe yashimye Leta yatekereje iyi gahunda y'ubwishingizi bw'ibihingwa n'amatungo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .