Bizagenda bite nihagira umunyeshuri wandurira Coronavirus ku ishuri?

Yanditswe na Niyitanga Jean Paul
Kuya 3 Ugushyingo 2020 saa 12:22
Yasuwe :
0 0

Uko ingamba zo kwirinda ikwirakwira ry’icyorezo cya Coronavirus zoroshywa ni ko ibihugu bisigarana ihurizo rikomeye ry’uburyo bigomba kwitwara mu gihe iki cyorezo cyaba cyadutse, by’umwihariko kikadukira nk’abanyeshuri aho amashuri yafunguwe.

Mu bihugu byinshi ku Isi, amashuri yongeye gusubukura ibikorwa, ariko imikorere yayo irangwa n’ukwigengesera cyane. Gusa ariko ntibyabujije ko hamwe na hamwe icyorezo cyaduka mu mashuri n’abarimu.

Urugero ni nko muri Kenya, aho ubu ihuriro ry’abarimu rihangayitse cyane, risaba ko Guverinoma igira icyo ikora igafasha abarimu bakuze n’abandi bafite uburwayi butandukanye bashobora kwandura iki cyorezo kikabazahaza.

Muri Kenya mu cyumweru gishize habarurwaga abarimu 35 n’abanyeshuri 17 banduye Coronavirus. Ni mu gihe abarimu babiri bo bamaze kwitaba Imana bahitanywe n’iki cyorezo. Mu gihugu hose, habarurwa ibigo by’amashuri 35 bimaze kugaragaraho ubwandu bw’iki cyorezo.

Byatumye Perezida Uhuru Kenyatta atangaza ko hashobora kugira izindi ngamba zifatwa mu kwirinda ko ubwandu bw’iki cyorezo bwakwiyongera ku muvuduko wo hejuru. Iyo muri iki gihugu bapimye abantu 100, ntihashobora kuburamo 14 banduye, bigaragaza ko ubwandu buri hejuru.

Mu Bufaransa naho iki kibazo cyaragaragaye kuko muri Nzeri ubwo amashuri yafungurwaga, hashize iminsi mike ibigo 22 bihita bifungwa kubera ubwiyongere bw’iki cyorezo. Ni nako byagenze muri leta zikomeye za Amerika nka Indiana, Louisiana, Oklahoma, Tennessee na Georgia aho amashuri yafunzwe nyuma y’iminsi mike afunguwe.

Nubwo mu Rwanda ubwandu butari hejuru cyane, birashoboka ko muri iki gihe amashuri yafunguwe, hatagize igikorwa, umubare w’ubwandu ushobora kwiyongera.

Izi mpungenge ziterwa n’uko abanyeshuri benshi bashobora kudohoka ku ngamba zashyizweho mu kwirinda iki cyoreza kuko bigoye kubahozaho ijisho umwe ku wundi, mu gihe bimwe mu byo bakundaga bisaba ko babicikaho.

Bamwe mu banyeshuri baganiriye na IGIHE bagaragaje bimwe mu byabatonze ku munsi wa mbere basura ku mashuri.

Tuyisenge Jackson, umunyeshuri wo muri Lycée de Kigali yagize ati “Biragoye kuba tugiye kwiga tutabasha kwegerena kuko akenshi twigiraga mu matsinda aho mugenzi wacu uri hasi ariho yazamukiraga kandi hari n’ubwo mwarimu agenda udasobanukiwe ukaza kwegera mugenzi wawe akagusobanurira. Ubu ntibizashoboka kuko tutegeranye.”

Umuyobozi w’Ikigo cy’Igihugu Gishinzwe Ubuzima mu Rwanda (RBC), Dr Sabin Nsanzimana, yatangaje ko ishuri rizajya rigaragaramo umubare ubwandu bwa Coronavirus rizajya rihita rihagarikwa mu rwego rwo kwirinda ikwirakwira ry’ubwandu mu bantu benshi.

Umurwayi wa mbere wa COVID-19 yaragaragaye mu Rwanda ku itariki 14 Werurwe 2020. Kuva icyo gihe, ibikorwa bitandukanye byatangiye gufungwa harimo n’amashuri mu rwego rwo kwirinda ikwirakwira rya Coronavirus.

Ku wa 02 Ugushyingo 2020, ni bwo amashuri yo mu byiciro bitandukanye yongeye kwakira abanyeshuri nyuma y’amezi hafi umunani afunzwe.

Mu mashuri amwe n’amwe IGIHE yasuye, yasanze harakajijwe ingamba zo kwirinda iki cyorezo zirimo kwambara udupfukamunwa, gukaraba intoki ku banyeshuri n’abarimu bakoresheje amazi n’isabune ndetse henshi wasangaga abanyeshuri bahanye intera igaragara, buri wese yicaye ku ntebe ye.

Dr Nsanzimana yabwiye RBA ati “Icy’ingenzi tubwira abayobozi b’amashuri n’abarimu, nuko gucunga cyangwa kureba ko izi ngamba zubahirizwa. Ni ku nyungu z’igihugu ariko ni n’inyungu z’ishuri kuko ishuri rizagaragaramo uburwayi bukwirakwira byaturutse kuri ibyo bibazo bitatunganijwe rizajya rihagarikwa.”

Yakomeje agira ati “Ishuri rizajya rihagarikwa bitewe n’umubare w’abarwayi barigaragayemo. Igihe rizamara ridakora bishingiye ku barwayi bazaba bahagaragaye turimo gukurikirana [...] icyo na cyo gisobanuke kuko ntabwo twareka abana kandi icyorezo cyahakwirakwiye.”

Dr Nsanzimana yavuze ko kimwe mu byo amashuri yasabwaga gutegura harimo no kuba hari umuganga uzajya afasha abanyeshuri mu buzima bwabo bwa buri munsi.

Ati “Amashuri amwe n’amwe agira abaganga, haba hari abaforomokazi cyangwa abaforomo bareba n’ibisanzwe uretse n’ibya COVID-19, (uwo muganga) na we mu by’ukuri yarahuguwe arahari ku mashuri menshi nk’ayisumbuye na Kaminuza. Kaminuza ho haba harimo n’abaganga benshi.”

Dr Nsanzimana yavuze ko hanashyizweho itsinda ry’abantu rizajya rikurikirana uko ingamba zo kwirinda COVID-19 mu mashuri zishyirwa mu bikorwa.

Iryo tsinda ririmo abayobozi mu mashuri, abarimu, abayobozi b’inzego z’ibanze ndetse n’abaganga b’aho hafi. Yavuze ko ahazajya hagaragara ibimenyetso bya COVID-19 hari imirongo ya telefoni zo muri MINEDUC, REB, RBC na Polisi bazajya bahamagara bakamenyesha inzego z’ubuzima.

Abahuye n’uwo munyeshuri wagaragaweho ubwandu, na bo bagirwa inama yo kwishyira mu kato mu gihe cy’iminsi 14 kugira ngo hirindwe ikwirakwira rya Coronavirus mu gihe baba banduye.

Mu Rwanda hamaze kuboneka abantu 5155 banduye mu bipimo 560287, abagera ku 4922 barayikize mu gihe 198 bakitabwaho n’abaganga na ho 35 bitabye Imana.

Abanyeshuri batandukanye baganiriye na IGIHE bagaragaje ko batonzwe no kuba batazongera guhurira mu matsinda
Abanyeshuri barasabwa gukomeza kwigendesera bakubahiriza ingamba zashyizweho zo kwirinda Coronavirus
Mu mashuri menshi, abanyeshuri basigaye bicara bahanye intera, umwe ku ntebe ye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .